Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Onompa nosinggai kom poramean kon Singgai Moḷoben Paskah, ki Yesus minayak kon lipuí im Betania. lipuí inta pinogutunan i Lazarus, intau inta biniag bui i Yesus nongkon sigad in intau mita minatoi.
2 Kon tua, ki Yesus inoḷudan monia, ki Marta in nogoḷud kong ka'anon tatua. Ki Lazarus bo tamu mita ilimituí nonga'an noyotakin i Yesus.
3 No'iduduimai kon tua, ki Maria namangoi takin kodia-dia in ḷana mobondu degaí tobotakmai in liter ḷana mobondu narwastu inta totok momahaḷ im bolinya. Pinopobutaknya in ḷana tatua kon si'oḷ i Yesus, onda intua iradatannya bui im bu'oknya. Daí tombonu im baḷoi tatua nobondudon im bo ḷana tatua.
4 Ta'e ki Yudas Iskariot, tobatuí murií i Tuhan Yesus -- inta kon singgai no'iduduimai nopotaḷui ko'i Yesus -- noguman,
5 "Nongonu sin ḷana mobondu tanion diaíbií inta pinotaḷui toḷunogatut nodinar, bo doit bolinya ogoidon kon intau bogaí?"
6 Ki Yudas noguman natua, de'emanbií lantaran sia mo'ibog monarukira kon intau bogaí ta'e lantaranbií sia mononakow. Sia mokakitdon mogamaí kon doit nongkon kas in doit inta pinoki kadai ko'inia.
7 Ta'e ki Yesus noguman, "Pomayakdon makow pogaidan bobay tatua kon natua! Sia nogaid kon natua sim moposadia kom ponguburan ko'i-Nakoí.
8 Intau bogaí umuranpabií kotaki-takin monimu, ta'e Aku'oi in diaíbií."
9 Nobayong intau Yahudi nokodongog kong ki Yesus kom Betania, daí mosia minayak intua. Mosia minayak de'emanbií tongaí lantaran ki Yesus, ta'e lantaranbií doman mosia mo'ibog mo'indoi ko'i Lazarus inta aim biniag bui i Yesus nongkon kinopatoiannya.
10 Tuamai imang mita itoi mo'ibog doman molimod ko'i Lazarus.
11 Lantaran sia nobalií sobab nobayongdon intau Yahudi nonaḷaímai ko'i monia bo nopirisayadon ko'i Yesus.
12 Nopo'ikoḷommai kon singgai intau moaíntoí inta ain namangoi sim poramean kon Singgai Moḷoben Paskah nokodongogdon kong ki Yesus niondon kon daḷan mopoaíngoi in Yerusalem.
13 Daí mosia nogamaídon kon daun mita im palem bo minayak nonontomu ko'i Yesus. Takin sanang ing gina mosia noguman, "Dayowdon ki Allah! Binarakatandon Sia inta namangoi kom bonu in tangoi Tuhan, Raja Israel!"
14 Ki Yesus nokodungkuḷ kon tobatuí keledai inta nogu'odpa, bo sinumakoi in Sia kong keledai tatua. Daí nobaliídon onu inta aim pinais kom bonu im Buk Mosuci,
15 "Dona'ai mo'ondok, mongodeyaga mita in Sion! Indoiaikah rajamu namangoi, Sia sinumakoi kon tobatuí keledai inta nogu'odpa!"
16 Dodai intua diaípa nodait kinomangalean im murií mita i Yesus intua. Ta'e naonda ing ki Yesus pinomulia, bain tua bo kinotoropan monia kon onu inta aim pinomia in intau mita ko'i Yesus, aim bidon pinais kom bonu im Buk Mosuci.
17 Intau mita inta noko'ontong tonanií wakutu ing ki Yesus nogoinií ko'i Lazarus iḷumuai nongkon kubur bo nomiag bui ko'inia nongkon kinopatoiannya, umuran mongonguman magií-makow kon soaáḷ tatua.
18 Tuamai nobayong intau namangoi nonontomu ko'i Yesus sin dinongogdon monia kon Sia tua inta nogaid kon inta mokoherang tatua.
19 Daí intau mita im Parisi mulaidon nosigumanan, "Diaí mokopongonu ing kita! Indoiaikah bayongan intau kon dunia na'a mayak dumudui ko'i-Nia!"
20 Kon sigad in intau mita inta minayak in Yerusalem sim mo'ibadah kom porayaan tatua oyuíon doman in tongonumai intau in Yunani.
21 Mosia namangoi ko'i Pilipus bo noguman, "Utat, aka mota'au, daí kami im mo'ibog moyodungkuḷ i Yesus." (Ki Pilipus na'a nongkon Betsaida kon Galilea.)
22 Daí binayak i Pilipus pinota'au ko'i Andreas in soaáḷ tatua, bo onda intua taya duadon i minayak ko'i Yesus bo nopota'au.
23 Ki Yesus noguman ko'i monia, "Wakutunyadon Adií Intau pomuliaan.
24 Na'adon im poguman-Ku ko'i monimu: Aka batoḷ ing gandum diaí ḷobongon kom butaí bo matoi, yo sia in tongaíbií umuran tougat. Ta'e aka batoḷ ing gandum tatua matoi, bain tuata bo sia momungai ing gandum mobayong.
25 Intau inta motabi kong kobiagannya, yo kobulian sia ing kobiagannya tatua. Ta'e intau inta diaí motabi kong kobiagannya kon dunia na'a, yo sia tua im moḷukadbií kong kobiagannya inta mononoi.
26 Intau inta mo'ibog mogaid kon oaíidan-Ku musti dumudui ko'i-Nakoí kon ondakabií im bayaían-Ku; simbaí kon onda im bayaían-Ku yo kon tua doman in sia. Intau inta mogaid kon oaíidan-Ku hormatonbií i Amaí-Ku."
27 "Moaíjar totok ing ginaku. Onu degaí im musti singogon-Ku in tana'a? Musti degaí Aku'oi moguman, 'Amaí, potalibdon ko'i-Nakoí in roriga tana'a makow? Diaí! Sin tuabií im mangale inangoian-Ku.
28 Amaí, pomuliadon in tangoi-Mu!'" Daí kino dongogandon in singog nongkon soroga noguman, "Aindon pinomulia-Ku, bo buipabií doman pomuliaan-Ku."
29 Intau mobayong kon tua nokodongog doman kon singog tatua. Mosia noguman, "Gotup intua!" Ta'e oyuíon doman in noguman, "De'eman! Malaekatbií nosingog ko'i-Nia!"
30 Bo ki Yesus noguman ko'i monia, "Singog tatua kino dongogan, de'emanbií lantaran kopontingan-Ku, ta'e kopontinganmubií.
31 Tana'a wakutunyadon dunia hakimon; bo tana'adon makow mongongawasa kon dunia na'a pogarabdon kon ḷuai.
32 Ta'e Aku'oi na'a, aka Aku'oi aindon poḷantudon kon dunia na'a, yo daiton-Kudon diaan in intau inta mamangoi ko'i-Nakoí."
33 Sia noguman natua sim mopota'au kon naonda ing kopopatoi-Nya.
34 Intau mobayong kon tua noguman ko'i-Nia, "Podudui kom Buk Hukum agama nami, Raja Mopoposaḷamat tua im mobiagbií mononoi. Yo nongonu sin Ikow i mogumanbií kong ki Adií Intau poḷantudonbií kon dunia na'a? Ki inebií ing ki Adií Intau tatua?"
35 Ki Yesus notubag: "Tongaíbií samantara im bayag tatua kon yuaí-yuaík monimu. Tuamai bayakdon solama bayag tatua kon yuaí-yuaíkpa monimu, simbaí mo'ikow diaí kokawasa'an in sindip, sin intau inta mayak kom bonu in sindip diaíbií kota'auannya im bayaíannya.
36 (12-36a) Popirisayadon kom bayag tatua, solama im bayag tatua oyuíonpa ko'inimu, simbaí mo'ikow mobalií ki adií mita im bayag." (12-36b) Nopaḷut makow ing Yesus nosingog natua, minayakdon Sia nongkon tua bo diaídon nokipogontong ko'i monia.
37 Umpakah nobayongdon in soaáḷ mita inta mokoherang im pinomia i Yesus kon tayowon monia tua, ta'e mosia diaíbií mopirisaya ko'i-Nia.
38 Daí nobaliídon onu inta pinoguman i Nabi Yesaya, nana'a: "Tuhan, ki inebií im mopirisaya kon habar inta pinoyaput nami? Ko'i ine im popo-ontongan ing kawasa i Tuhan tatua?"
39 Tuamai mosia diaí mopirisaya, sing ki Yesaya ain noguman doman,
40 "Ki Allah noguman, 'Binilogan-Kudon im mata monia, binalií-Kudon mosia motogat ing gina; simbaí mosia diaí moko'ontong, bo raian monia diaí momangale. Simbaí mosia diaí mamangoi bui ko'i-Nakoí, bodongka undaman-Ku i mosia.'"
41 Ki Yesaya noguman natua sin sia ain noko'ontong kong kamulia'an i Yesus, bo nongongumandon soaáḷ Sia.
42 Umpakah natua, nobayongbií intau, nodapot in oyuíon itoi mita in Yahudi nopirisayadon ko'i Yesus. Ta'e mosia diaí mokobalií im mongaku taran-tarangan, sim mo'ondok dikabo diaídon ogoi intau im Parisi mosia tumu'ot kom baḷoi pososambayangan.
43 Sim mosia mo'ibo-ibogbií ing kahormatan intau daripada kahormatan i Allah.
44 Bo ki Yesus nobaḷuí, "Intau inta mopirisaya ko'i-Nakoí, sia tua in de'emanbií mopirisaya ko'i-Nakoí, ta'e mopirisayabií ko'i-Nia inta nopotabaí ko'i-Nakoí.
45 Bo intau inta noko'ontong ko'i-Nakoí, noko'ontong ko'i-Nia inta nopotabaí mangoi ko'i-Nakoí.
46 Aku'oi namangoi in dunia na'a saḷaku bayag, simbaí bayongan intau inta mopirisaya ko'i-Nakoí diaí mogutun kom bonu in sindip.
47 Intau inta nokodongog kon totunduí-Ku, ta'e diaí mopoaíid, yo de'emanbií Aku'oi im mohakim ko'inia. Sin Aku'oi in namangoi de'emanbií mohakim kon dunia na'a, ta'e moposaḷamatbií kon dunia na'a.
48 Intau inta doií motarima ko'i-Nakoí, bo doií mokidongog kon singog-Ku, oyuíonbií im mohakim ko'inia. Singogbií inta aim pinoyaput-Ku tua im mohakim ko'inia kon singgai ponantuían.
49 Sin Aku'oi mosingog de'emanbií podudui in ibog-Ku tontanií, ta'e ibogbií i Amaí inta nopotabaí ko'i-Nakoí. Siabií tua in nomarentah ko'i-Nakoí kon onu i musti singogon-Ku bo pota'au-Ku.
50 Bo kinota'auan-Kubií kom parentah-Nya tatua im mobogoibií ing kobiagan mopia bo mononoi. Daí Aku'oi im mopota'au kon naí inta sinunduí i Amaí ko'i-Nakoí."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA