Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wolongguyi mola tou dipo ledungga dulahe poelaliyo obebasi lo tawu lo Yahudi lonto lipu lo Mesir, ti Isa lohuwalingao ode kambungu lo Betaniya, tambati le Lazarus pilopobongu-Liyo mayi lonto kuburu.

² Ti Isa tilamela limongoliyo wawu ti Marta ta lohinta olimongoliyo. Te Lazarus wolo tawu wuwewo ma yilonga pe'epe'enta woli Isa.

³ Lapatao ti Mariya lohama mayi minya monu asli ngoputu loliteri u mahale haragaliyo. Minya monu boyito pilolohiyo mota to oati Isa wawu hesilekaliyo mao lo huwoiyo. Wonu lo minya boyito lolo'opo lomota to delomo bele boyito.

⁴ Te Yudas Iskariyot tala ngota lo muri li Isa, ta ma mohiyanati o-Liyo loloiya,

⁵ ”Yilongola minya monu boti dila pilotali mao tolohetuto doyi tala'a wawu doyiliyo posadaka mao ode ta misikini?”

⁶ Te Yudas loloiya odito, dila sababu tiyo motoliango ta misikini, bo sababu tiyo memangi ta mototaowa. Tiyo dihu-dihu kasi lo doyi wawu layito hemolohamawa doyi boyito.

⁷ Ti Isa loloiya, ”Hulimao tabuwa boti lohutu u odiye, utiye pilopowatuliyo mao ode dulahe polobungaliyo ola-U.

⁸ Ta misikini layito woluwo to wolota limongoli, bo Wau dila mololayita woli mongoli.”

⁹ Ngohuntuwa da'a tawu lo Yahudi ta lo'odungohu deu ti Isa woluwo to kambungu lo Betaniya. Timongoliyo lonao mao ohila momilohe o-Liyo wawu timongoliyo olo ohila momilohe ole Lazarus ta pilopobongu-Liyo mayi lonto kuburu.

¹⁰ Mongotauwa lo imamu ma loheluma mohinggi nyawa le Lazarus olo,

¹¹ sababu te Lazarus ma lowali sababu tawu lo Yahudi ngohuntuwa ta ma lolola mao olimongoliyo wawu lapatao ma pilaracaya ode li Isa.

¹² Lolombuliyo mola tawu ngohuntuwa ta hewulata dulahu buka lo'odungohe habari deu ti Isa ma nao-nao mayi ode kota lo Yerusalem.

¹³ Timongoliyo lohama mayi dungo patuhu lapatao lonao mota lolutula o-Liyo, wolo uhewuwa-wuwatia odiye, ”Totonulala dewo ode Allahuta'ala! O barakati Tiyo ta nao-nao mayi to delomo tanggulo Allahuta'ala Eya! O barakati Olongiya lo tawu lo Israel!”

¹⁴ Ti Isa lo'odungga mao wadala muda tuwawu lapatao ma tilaeya-Liyo. Pasali boti motu'ude odelo u tula-tuladu to kitabi odiye,

¹⁵ ”Dila pohe, weyi timongoli ta hetolawa to kota lo Yerusalem! Bilohi, Olongiya limongoli dungga-dungga mayi, tae-tae to wadala muda!”

¹⁶ Mongomuri li Isa bobohuwaliyo mao dipo mongarati lo pasa-pasaliyala boyito. Bo tou ti Isa ma pilopomasahuru lo Allahuta'ala, deuwito timongoliyo lo'oela deu totonulalo u ma lowali wawu u ma pilohutu limongoliyo to o-Liyo ma woluwo tula-tulade to kitabi.

¹⁷ Tawu-tawuwala ta woluwo to wakutu ti Isa loibodeyi ole Lazarus yilumuwalayi lonto kuburu wawu lopotumula oliyo monto opopate, turu-turusi heposakusiya tomimbihu pasali boyito.

¹⁸ Sababu uwito, ta ngohuntuwa boyito ma lolutula o-Liyo, sababu ma ilodungohe limongoliyo ti Isa ta ma lohutu tuwota u mo'olinggolabe boyito.

¹⁹ Tawu-tawuwala ta o pahamu Parisi ma bibisalawa odiye, ”Bilohi, ito dila mowali mohutu wolo-wolo, buktiliyo tawu ta ngoyilanggubu duniya boti ma lodudua o-Liyo.”

²⁰ To wolota lo ta lonao ode kota lo Yerusalem mota motabiya to dulahu buka boyito, woluwo ngololota tawu lo Yunani.

²¹ Timongoliyo lonao mao ode le Pilipus tala ngota lo muri li Isa lonto kota lo Betsaida to lipu lo Galileya wawu timongoliyo loloiya odiye, ”Tuwani, wonu mowali, amiyatiya ohila modudunggaya woli Isa.”

²² Te Pilipus lopohabari mao lo pasali boyito ode le Andreyas ta muri li Isa olo, lapatao timongoliyo dulota loposambewo mao ode li Isa.

²³ Tameti Isa ode olimongoliyo, ”Ma ledungga wakutuliyo Walao Manusiya ma popomasahuruwo lo Allahuta'ala.

²⁴ Tutuliyotutu polele-U mayi ode olimongoli: Wonu pale ngobotu yito dila pomulola to huta wawu dila yilate, tiyo debo tatapu ngobotu. Bo wonu tiyo ma yilate, deuwito tiyo ma momungo ngohuntuwa.

²⁵ Titalotita ta motoliango nyawaliyo, ma enggila lo nyawaliyo. Bo titalotita ta dila motoliango nyawaliyo to duniya boti, nyawaliyo debo tatapu woluwo to oliyo sambe ode tutumula kakali.

²⁶ Titalotita ta mohinta ola-U, tiyo musi modudua ola-U; wawu toutonu ilowoluwowa-U teto olo ta mohinta ola-U woluwo. Wawu titalotita ta mohinta ola-U, tiyo ma hurumatiyoliyo li Papa.”

²⁷ Ti Isa loloiya poli odiye, ”Hila-U sukari da'a masatiya; wolo u mowali loiya-U mayi masatiya? Wonu Wau moloiya ode Allahuta'ala, ’Papa, salamatiya mayi Watiya to wakutu lo sikisa botiya.’ Bo uwito dila mowali, sababu makusudu lo nonao-U mayi botiya bome modutola to wakutu lo sikisa boti.”

²⁸ Ti Isa loloiya ode Allahuta'ala, ”Papa, popomasahuruwa lomola tanggulu-Mu!” Lapatao ilodungohe mayi suwara lonto soroga odiye, ”Ma pilopomasahuru-U mayi wawu ma muli popomasahuruwo-U mayi!”

²⁹ Ta ngohuntuwa boyito lo'odungohe suwara boyito wawu timongoliyo loloiya, ”Uwito suwara lo bulonggodu!” Tawu wuwewo poli hepoloiyawa, ”Malaikati bibisalawa wo-Liyo.”

³⁰ Ti Isa loloiya mao ode olimongoliyo, ”Suwara boyito ode olimongoli, dila ode ola-U.

³¹ Masatiya duniya boti ma mo'otapu hukumani wawu masatiya olo ta hekawasawa to duniya boti ma pomai lo Allahuta'ala.

³² Bo Wau boti ma popolanggato lo Allahuta'ala monto duniya boti wawu Wau ma mowali sababu tawu monao mayi ode ola-U.”

³³ Tiyo loloiya odito boyito mopopatatayi wololo opopate-Liyo.

³⁴ Tawu ngohuntuwa boyito loloiya mota ode o-Liyo, ”Moturuti mao hukum lo Tawurat, Olongiya ta pilojanjiya lo Allahuta'ala moposalamati lo manusiya yito tumumula kakali. Wololo Yio hemoloiya Walao Manusiya musi popolanggato lo Allahuta'ala? Tatonu Walao Manusiya boyito?”

³⁵ Ti Isa loloiya mao ode olimongoliyo, ”Dilalo mohihewo tinela boti wolimongoli. Pokaraja mao timongoli tou bango tinela boyito donggo woluwo to olimongoli, alihu timongoli dila otaube lo diolomo. Ta nao-nao to umodiolomo dila motota ode utonu ponaowaliyo.

³⁶ Tou yilapatao loloiya odito, ti Isa ma lonao lotituao monto olimongoliyo.

³⁷ Openu ti Isa lohutu tuwota ngohuntuwa u mo'olinggolabu to talu limongoliyo, timongoliyo debo tatapu dila paracaya ode o-Liyo.

³⁸ Wolo uodito, ma leganapu u tula-tulade to kitabi li nabi Yesaya odiye, ”Wu Eya, tawu-tawuwalo dila paracaya lo u hepopotunggulo lami wawu timongoliyo dila mongarati lo kawasa lo Allahuta'ala Eya.”

³⁹ Woluwo olo tula-tulade to kitabi li nabi Yesaya alasani longola tawu dila mowali paracaya. Ti nabi Yesaya ma loloiya deu Allahuta'ala ma loloiya odiye,

⁴⁰ ”Wau ma lopowali mao mato limongoliyo pito'o wawu lopowali mao hila limongoliyo mototoheto, alihu timongoliyo dila mowali mo'onto wawu dila mowali mongarati to delomo hila limongoliyo wawu timongoliyo dila motobati, tunggulo Wau dila mopo'oluli olimongoliyo.”

⁴¹ Ti nabi Yesaya loloiya odito sababu tiyo ma lo'onto ouda'a li Isa wawu ma lobisala tomimbihu Tiyo.

⁴² Openu boli odito, ngohuntuwa tawu ta ma pilaracaya ode oli Isa to wolota limongoliyo woluwo olo mongotauwa lo tawu lo Yahudi. Bo timongoliyo dila barani mongaku, sababu timongoliyo mohe ma entela lo tawu-tawuwala ta o pahamu Parisi momaso ode bele hepotabiyalo.

⁴³ Timongoliyo lebe motohilawo lo umo'otapu hurumati monto manusiya popobandingiyo mao lo umo'otapu hurumati monto Allahuta'ala.

⁴⁴ Ti Isa ma lobisala wolo suwara uda'a odiye, ”Titalotita ta paracaya ode ola-U, dila ode ola-U tiyo paracaya, bo ode Allahuta'ala ta lopoahu mayi ola-U.

⁴⁵ Wawu titalotita ta ma lo'onto ola-U, tiyo ma lo'onto o-Liyo ta lopoahu mayi ola-U.

⁴⁶ Patuju lo nonao-U mayi boti mopobanga duniya boti, alihu ta paracaya ode ola-U dila hetolawa to umodiolomo.

⁴⁷ Wonu ta lo'odungohe loiya-U wawu dila mokaraja mao, dila Wau ta momutoa oliyo, sababu nonao-U mayi dila me momutoa duniya boti, bome moposalamati.

⁴⁸ Bo tawu ta dila mololimo u heloiya-U, woluwo ta momutoa oliyo. Loiya u ma yiloiya-U boyito uwito u ma momutoa oliyo to dulahu ukiyama.

⁴⁹ Sababu totonulalo u hebisala-U dila lonto batanga-U lohihilawo, bo ti Papa ta lopoahu mayi ola-U, Tiyo ta lomarenta mayi wolo u musi loiya-U.

⁵⁰ U hepopotunggulo-U mayi boti, odelo u ma pilopotunggulayi li Papa ode ola-U. Sababu otawa-U deu parenta li Papa-U boyito mongohi tutumula kakali.”

Yohanes

Video Yohanes 12

Ikuti Kami:

KONTAK | PARTISIPASI | DONASI