Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wongoseli, "Ne'ena tinisidemo tosigou-gounguku: Nago'ona yowosanga 'o domba ma gu-gurungaka la ko ma ngoranikawa yaboa so ka ma hisade yadoa, 'ona ge'ena yotosi-tosiki de yo'ora-'ora.

² Ma 'o nyawa gee yowosanga yaboa ma ngoranika, 'ona ge'ena 'o domba ma so-sowohi.

³ So ma ngorana ma ja-jaga wakidebelenga 'o ngorana, de ma domba-domba gee 'iisene 'awi 'ilingi wa'asoko to 'ena ma ronga moi-moi de wimoteke watuda wosisupu.

⁴ Gee ma domba wosikokisupuokau ma gurunga ma dudunoka, de ma domba ma so-sowohi gu'una wotagi wosira-sira, de 'awi domba ge'ena 'ikokimoteke sababu 'awi 'ilingi yanako.

⁵ Ma de 'o nyawa 'iregu ge'ena dua koimotekuwa so kaiowara, sababu yanako 'ato ko to 'enawa ma so-sowohi 'awi 'ilingi."

⁶ 'O Yesus wosijarita 'o 'ade-'ade ge'ena, ma 'ona koyasahewa 'awi dumutu 'okia.

⁷ So 'o Yesus wakidongose ma moioli, "Ne'ena tinisidemo tosigou-gounguku: Ma gou-goungu ngoi ne'ena tomasi'ade-'ade 'o domba ma ngorana.

⁸ 'Iodumu 'o guru ma ngeluku gee ngoi koi'iwasi 'ena 'ona yoboanou de yongose 'ato 'ona ge'ena 'o domba yoso-sowohi, 'ona ge'ena yotosi-tosiki de yo'ora-ora de 'o domba ge'ena koisigisenuwa to 'ona manga 'ilingi.

⁹ Ngoi ne'ena 'isoka 'o ngorana. Nago'ona yowosanga yoboa ngoino 'asa koyakido'oawa de dua yosupuwosanga la yo'ahu 'isanangi.

¹⁰ Yotosi-tosiki yoboa ge'ena duga kayotosiki, yoto'oma, de 'o nyawa yasotumu. Ma ngoi toboa, ma ngale 'o nyawa yamake 'o 'ahu ma dutu, de kokiawa yakisidukurangi.

¹¹ Ngoi ne'ena 'isoka 'o domba ma so-sowohi yaowa-owa. 'O so-sowohi ma owa ge'ena womodeke wosongene ma ngale wariwo 'awi domba-domba.

¹² 'O nyawa gee 'o domba wojaga kawisewa, gee ko ma domba ma so-sowohiwa de mita ko ma domba ma dutuwa, 'asa wokokidoowaruku ma domba nako wamake 'o haewani 'iti-tingkai 'iboa. So 'o domba-domba ge'ena 'asa 'o haewani 'iti-tingkai yakaboto de munuka 'iowara 'imati-tingaoka.

¹³ Wisewa-sewa gu'una kawoowara, sababu 'una womanarama ge'ena kawisewa, so 'una ka ma eta ma kowakalesanguwa ma domba-domba ge'ena.

¹⁴ Ngoi ne'ena 'o so-sowohi ma owa. 'Isoka 'ai Dea woinako ngoi de ngoi towinako 'ai Dea, koge'enali mita ngoi tanako 'ai domba, de 'ai domba 'inako ngoi. Ngoi tomodeke tosongene ma ngale tariwo 'ai domba-domba ge'ena.

¹⁵ (10:14)

¹⁶ 'Ai domba 'iregu-regu de ma 'enasi mita, ma koisidotodoimuwa de 'o domba ma duonoka ne'ena. 'Ena mita salingou ta'asa de dua 'isigisene 'ai 'ilingi. 'Ena 'asa 'idadi ka 'o duono moi de kawomatengo wasowohi.

¹⁷ 'Ai Dea woisibosono, sababu ngoi tomodeke tosongene ma ngale dua woisiwangoli.

¹⁸ Ngoi 'asa komoiwa moi 'idadi 'ito'oma nako ko ngoiwa ma sirete tomasisarakani. Ngoi tomasisarakani moteke to ngoi 'ai mau ma sirete. Ngoi tokuasa ma ngale tomasisarakani 'iso-songene, de mita tokuasa ma ngale to'ahuoli. Ge'enau to ngoi 'ai manarama 'ai Dea wosuloko tadiai."

¹⁹ Sababu 'o Yesus wobicara koge'ena, so 'o Yahudi ma nyawa yomakaributu.

²⁰ Manga gudai yongose 'ato, "'Una 'o tokata widongosamuku ma de witogosanga! 'Okia ma ngale niosigisene 'unaka?"

²¹ Ma naga mita yongose, "'O nyawa 'o tokata yakidongosamuku ko koge'enawa yobicara! 'O tokata koya'akunuwa 'idiai 'o nyawa yorau-rau yomasimake!"

²² 'O Yerusalemuoka yodiai ma gu-gudaioka ma Jou 'awi Woa 'Itabisi ma Wange ma Amoko, ma 'orasi ge'ena 'o 'alo ma tepu.

²³ 'O Yesus wokakadagi ma Jo'oungu ma Dutu 'awi Woa ma ginitaroka, gee yosironga 'o Salomo 'awi Surabioka,

²⁴ de 'o Yahudioka yamuruo naga yoboa yomatoomu 'o Yesus wisigilolitino de kayongosekau, "Sigado muruoka minisimadaka komimasidongoo 'itiaiwa ngona ge'ena nagu'una? Minisidemo nositi-tiaino, nako ngona ma gou-goungu ma Koana 'o Nyawa Wosilaha-laha gu'una."

²⁵ 'O Yesus wosango, "Ngoi tosidemokau nginika, ma ngini koniongakuwa. 'O sagala manarama gee 'ai Dea wosulokokau tadiai, 'isinyata ma ngale ngoi.

²⁶ Ngini koniongakuwa sababu ngini ge'ena matero ka to ngoiwa 'ai domba.

²⁷ To ngoi 'ai domba-domba ge'ena 'isigisene 'ai 'ilingi, ngoi takokinako 'ena de 'ena 'imoteke ngoi.

²⁸ Ngoi tokula 'enaka 'o 'ahu 'ika-kakali, de 'ena 'asa kaisi'ado-'adonika koibinasawau. 'Ena 'asa komoiwa moi 'idadi ya'ora to ngoi 'ai giama ma soatoka.

²⁹ 'Ai Dea wosisarakaniokau ngoino. De 'una 'ifoloi 'awi kuasa 'iamoko de nago'ona bato so komoiwa moi 'idadi ya'ora 'ai Dea 'awi giama ma soatoka.

³⁰ Ngoi de 'ai Dea ge'ena ka moi."

³¹ Ge'enaka de 'o Yahuidoka go'ona 'o teto yomageseli ma ngale 'o Yesusika wisiwako.

³² Ma 'o Yesus kawongosekau 'onaka, "Ngini niamakekau ngoi todiai 'o manarama yaowa-owa 'o gudai, gee 'ai Dea wokulakau ngoino. 'Ai manarama 'iodumoka ge'ena, ka'ena ma sababu ngini niomau niteto?"

³³ 'O Yahudioka ma nyawa-nyawa go'ona yosango, "Ma sababu ko ni manaramuwa yaowa-owa ge'ena so ngomi miomau miniteto, ma 'ena sababu ngona wonisiti-tingoono ma Jo'oungu ma Dutu. Ngona 'o nyawa biasa de nomau nomadiai ma Jo'oungu ma Dutu."

³⁴ Ge'enaka de 'o Yesus wosango, "Naga nia besesongo ma bukuoka 'isitulisuku ma Jo'oungu ma Dutu wongose konee: 'Ngini ge'ena 'o jo'oungu'?

³⁵ Ngone panako 'okia naga gee 'itulisuku 'o Buku 'Itebi-tebinoka 'ena ge'ena kaisi'ado-'adonikau. So nako ma Jo'oungu ma Dutu wakisironga ''o jo'oungu' gee naga yadawo-dawongo 'awi demo,

³⁶ 'ido'oa so ngini niongose 'ato ngoi towisiti-tingoono ma Jo'oungu ma Dutu, ma sababu ngoi tongose 'ato ngoi ma Jo'oungu ma Dutu 'awi Ngowaka? 'Ena momongo ngoi 'ai Dea woiirikokau la ka 'una duga towileleani de woisuloko 'o duniano.

³⁷ Nako ngoi kotadiaiwa 'o manarama gee 'ai Dea wokulakau, 'uwa niongaku ngoino.

³⁸ Duga ngano ngoi tadiaiokau, so niongakukau 'okia naga gee ngoi tadiai, ngaro ngini niooluku niongaku ngoino. De ge'enau 'asa ngini nianako de niasahe 'ato 'ai Dea de de ngoi ka moi, de ngoi de 'ai Dea ka moi."

³⁹ 'Ona yosikadike witagokoli 'o Yesus, duga kowidaenuwasi.

⁴⁰ 'O Yesus wolioli 'o Yordan ma 'akere ma songonasa, gee ma sira 'o Yohanes 'o nyawa wo'osi-'osikoka, de womanoa ge'enaka doka.

⁴¹ 'O nyawa manga gudai yaika 'unaka de yomasikademo kayongosekau, "'O Yohanes kowodiaiwa 'o no-nako 'ihera-herangi, ma 'iodumu gee wosidemo-demo ma ngale 'o nyawa nu'una ge'ena yadaene."

⁴² Ge'enaka de manga gudai ge'enaka doka yongakuokau 'o Yesusika.

Yohanes

Video Yohanes 10

Ikuti Kami:

KONTAK | PARTISIPASI | DONASI