Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Totu'ubií in singog-Ku na'a: Intau inta tumu'ot kon ḷantung in domba, bo diaí mongin ḷolingkop, ta'e monomponikbií mongin daḷan ibanea, yo sia tua i mononakow bo mogogagow.
2 Ta'e intau inta tumu'ot mongin ḷolingkop, sia tuata ing gombala in domba.
3 Moḷoḷukad kon ḷantung momukatbií kon ḷolingkop sin tuotannya, bo domba mita mokidongogbií kon singognya wakutu in oiniíonnya im mosia podudui in tangoi monia tontanií bo diaannya ḷumuai.
4 Bo naonda ing koḷuaidon in domba mita tatua, gombala tatua mayak umuna ko'i monia, bo dombanya mita dumuduianmai.
5 Doiíbi im mosia dumudui kon intau ibanea, sedang bo poḷaguianbií monia intau ibanea sin diaí nokanal monia in singognya."
6 Ki Yesus nongonguman kom porumpama'an tatua, ta'e diaí kinota'auan monia i makusud-Nya.
7 Tuamai ki Yesus noguman bui"Poguman-Kudon ko'i monimu, Aku'oibií in ḷolingkop mayak kon domba mita tatua.
8 Mosia inta namangoi ko wakutu in diaípa in Aku'oi, mononakowbií bo mogogagow im mosia tua, bo doiíbií in domba mita tatua mokidongog ko'i monia.
9 Aku'oibií na'a in ḷolingkop. Ki ine in tumu'ot mongin i-Nakoí mosaḷamat in sia, sia tu'ot ḷuaibií bo moko'ulií kong ka'anon.
10 Mononakow tua in tongaíbií mamangoi monakow, molimod bo momoguya'at. Ta'e Aku'oi i mamangoibií simbaí mosia moko'ulií kong kobiagan, kobiagan inta mobayong totok ing kasanangan.
11 Aku'oibií na'a ing Gombala inta mopia. Gombala mopia im mobogoibií in nyawanya sing kopontingan in dombanya mita.
12 Aka intau inta tongaí sinondanan inta de'eman gombala bo de'eman doman kitogi domba mita tatua, poḷaguianbií monia in domba mita tatua aka ontongondon monia in serigala tayow-tayowdon mangoi. Daí tokodomokondon in serigala in domba mita tatua bo poguya'aton.
13 Intau inta sinoko tondanan tatua moḷaguibií, sin sia nogaid tongaíbií lantaran inubolian. Daí diaíbií hirauonnyamai in domba mita tatua.
14 Aku'oibií na'a ing gombala inta mopia. Notongkai naí kinotota'au i Amaí ko'i-Nakoí bo kinotota'au-Ku ko'i Amaí, daí natua doman ing kinotota'au-Ku kon domba-Ku mita bo mosia in nonota'au doman ko'i-Nakoí. Aku'oi moposarahkan in nyawa-Ku sing kopontingan monia.
15 (10:14)
16 Oyuíonpabií doman in domba-Ku mita ibanea, inta diaí no'itakin kong kawangan domba tana'a. Mosia tua i mustibií doman diaan-Ku bo mosia i mokidongogbií kon singog-Ku. Pomiaan-Kudon tokawangan im mosia bo tobatuí ing gombalanya.
17 Ki Amaí motabi ko'i-Nakoí sin Aku'oi moposarakan in nyawa-Ku, simbaí tua buion-Ku tarima'an.
18 Diaíbií tobatuímai mota'au mogamaí nongkon i-Nakoí. Aku'oi i moposarahkan tua, poduduibií in ibog tontanií. Aku'oi ing kokawasabií moposarahkan kon tua, bo kokawasabií mogamaí bui. Tuabií in tugas inta sinarima-Ku nongkon i Amaí-Ku."
19 Lantaran ki Yesus nosingog natua, daí intau mita in Yahudi nomangkoidon nobobayowan.
20 Nobayong in noguman, "Kinotoḷangan in dimbuḷoí in Sia! Sia nobundai! Nongonu sin indongoganbií monimu in Sia?"
21 Ta'e oyuíon doman in noguman: "Intau inta kinotoḷangan in dimbuḷoí diaíbií mosingog natua! Eta dimbuḷoí moko undam kon intau bilog sahingga im moko ontong?"
22 Kon Yerusalem intau mita koyogot morame kon Singgai Moḷoben Pinoresmian kom Baḷoi Tuhan. Dodai intua sempo in tumping.
23 Ki Yesus koyogot nodondaḷoi kon tampat inta sinangoian Tampat Pobobarasanangan i Salomo inta kom bonu im Baḷoi Tuhan.
24 Dodai intua intau mita Yahudi namangoi nolipung ko'i Yesus. Mosia noguman, "Modapot in to'onu pomayak-Mu makow ing kami diaí motantuí im pirisaya? Pogumankadon kosilang, aka Ikow nion totu-totu'u Raja Mopoposaḷamat."
25 Ki Yesus notubag, "Pinoguman-Ku bidon ko'inimu, ta'e mo'ikow diaí mopirisaya. Oaíidan mita inta pinomia-Ku pinodoyon kon tangoi i Amaí-Ku, mobogoi im bukti soaáḷ Aku'oi.
26 Mo'ikow diaí mopirisaya sim mo'ikow diaí no'itu'ot kong kawangan in domba-Ku mita.
27 Domba-Ku mita i mokidongogbií kon singog-Ku mita. Kinota'auan-Kubií im mosia, bo mosia in dumuduibií ko'i-Nakoí.
28 Mosia tua in ogoian-Kubií ing kobiagan mononoi, bo nopasti bidon kon diaíbií moputu-putuí. Diaíbií tobatuímai intau mokoaígow ko'i monia nongkon lima-Ku.
29 Ki Amaí-Kubií in nobogoi ko'i monia tua ko'i-Nakoí, bo no'iliu im mosia nongkon bayongan yagi-yagi. Bo diaíbií doman tobatuímai intau mokoaígow ko'i monia nongkon kawasa i Amaí-Ku.
30 Aku'oi bo ki Amaí in tobatuíbií."
31 Bo intau mita in Yahudi nogamaí kom batu sim pogandur ko'i Yesus.
32 Ta'e ki Yesus noguman ko'i monia, "Mo'ikow ain noko'ontong ko'i-Nakoí nogaid kon nobayong in oaíidan inta mopia, inta pinokiaíid i Amaí ko'i-Nakoí. Nongkon oaíidan mita tatua, onda im baliíon monimu dodoyonan poganduran ko'i-Nakoí?"
33 Intau mita in Yahudi notubag, "De'emanbií lantaran oaíidan-Mu mita inta mopia tua im baliíon nami dodoyonan poganduran im batu ko'i-Nimu, ta'e lantaranbií Ikow mohojat ko'i Allah. Ikow nion in intaubií bo mo'ibog mokipotongkai ko'i Allah."
34 Bo ki Yesus notubag, "Degaí diaíbií kinota'auan monimu kom pinais bidon kom bonu im Buk Hukum agamamu nana'a: 'Ki Allah nogumandon, mo'ikow in ilahbií?'
35 Kinota'auanbií naton kon onu inta aim pinais kom bonu im Buk Mosuci umuranbií pakeíon, diaíbií ing goga-gogainya. Daí aka ki Allah monangoi ilah kon intau mita inta nopirisayadon kon singog-Nya.
36 Yo nongonu sin singogonbií monimu kon Aku'oi mohojat ko'i Allah lantaran Aku'oi noguman kon Aku'oi ki Adií i Allah? Padahaḷ Aku'oi im piniliíbií i Amaí bo pinotabaí namangoi in dunia.
37 Aka Aku'oi diaí nogaid kon oaíidan mita inta pinoki aid i Amaí, yo dika mopirisaya ko'i-Nakoí.
38 Ta'e lantaran Aku'oi nogaidbií kon oaíidan inta pinokiaíid tatua, daí popirisayadon kon onu inta inaidan-Ku tatua, umpakahbií mo'ikow doií mopirisaya ko'i-Nakoí. Sahingga ing kota'auandon bo komangaleandon monimu kong ki Amaí in umuranbií notobatuí takin-Ku, bo Aku'oi in umuranbií doman notobatuí i Amaí."
39 Buidon doman ramijion domokon monia ing ki Yesus, ta'e diaípa doman kino domokan monia.
40 Onda intua ki Yesus bui minayak kon ḷoḷan Ongkag in Yordan. Ongkag inta pinobaptisan i Yohanes kolipod, bo ki Yesus nogutunpa kon tua.
41 Nobayong intau in namangoi ko'i-Nia. Mosia noguman, "Ki Yohanes diaíbií nomia kon soaáḷ mita inta mokoherang, ta'e bayongan inta pinogumannya soaáḷ intau tana'a in totu'ubií."
42 Bo nobayong intau kon tua in nopirisaya ko'i Yesus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA