Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Tiang badaq side: Setetune dengan saq tame ojok baren dombe liwat lambah, dait ndẽq liwat lawang, dengan nike maling dait perampok.

² Laguq dengan saq tame liwat lawang, ie pengarat dombe nike.

³ Penjage bare bukaqang ie lawang, dait dombe-dombe turut suarene sewaktu ie ngempoh aranne sopoq-sopoq, dait ie pade tedẽndẽn ojok luah.

⁴ Sesampun dombe-dombe nike tejauq ojok luah, pengarat nike lampaq lẽq julu, dait dombe-dombe nike turut ie sẽngaq ie pade tandaq suarene.

⁵ Dombe-dombe nike ndẽqne mẽlẽ turut dengan lain, malahan gen pelai lẽman dengan nike, sẽngaq ndẽqne tandaq suarene."

⁶ Deside Isa nyeriteang perumpamean nike, laguq ie pade ndẽq ngerti napi maksut-Ne.

⁷ Beterus Deside Isa bemanik karing sekali, "Tiang badaq side setetune Tiang niki lawang umaq dombe nike.

⁸ Selapuq saq dateng sendẽqman Tiang, nike maling dait perampok, dait dombe-dombe ndẽq mẽlẽ dengahang suare ie pade.

⁹ Tiang niki lawang. Sai-sai tame langan Tiang gen selamet; ie sugul tame dait mauq keloran.

¹⁰ Maling dateng cume jari memaling, nyematẽq dait jari nyenyẽdaq. Laguq Tiang dateng adẽq manusie mauq idup -- idup belimpah-limpah.

¹¹ Tiang niki pengarat saq solah. Pengarat saq solah nyerahang nyawene umaq dombe-dombene.

¹² Dengan saq teupaq dait saq ndẽq pengarat dait ndẽqne ẽndah ẽpẽn dowẽ dombe-dombe nike, gen pelai bilin dombe-dombe lamun ie serioq serigale dateng. Make dombe-dombe nike gen tecakrah dait tepiaq buyar siq serigale nike.

¹³ Dengan saq teupaq nike pelai, sẽngaq ie begawẽan jari boyaq upaq. Ie ndẽq ngerunguq dombe-dombe nike.

¹⁴ Tiang niki pengarat saq solah. Pade maraq Bapa kenal kance Tiang dait Tiang kenal kance Bapa, maraq nike ẽndah Tiang kenal dombe-dombe Tiang dait ie pade ẽndah kenal Tiang. Tiang nyerahang nyawe Tiang umaq ie pade.

¹⁵ (10:14)

¹⁶ Masih araq dombe-dombe lain saq jari dowẽn Tiang ẽndah, laguq ndẽq tame itungan dombe-dombe saq luwẽq niki. Ie pade ẽndah harus Tiang jauq dait ie pade gen dengahang suare Tiang. Ie pade selapuq gen jari sopoq kumpulan siq sopoq pengarat.

¹⁷ Bapa ngasihin Tiang lantaran Tiang nyerahang nyawe Tiang jari bait ie malik.

¹⁸ Ndẽq araq sopoq dengan juaq saq bau bait ie lẽman Tiang. Tiang nyerahang ie siq kemẽlẽq Tiang mẽsaq. Tiang bekuase nyerahang ie, dait bekuase bait ie malik. Nike tugas saq Tiang terimaq lẽman Bapa Tiang."

¹⁹ Lantaran Deside Isa bemanik maraq nike, dengan-dengan Yahudi mulai betungkasan.

²⁰ Luwẽq saq bebase, "Ie tekuasein siq sẽtan! Ie jogang! Kembẽq side pade dengah Ie?"

²¹ Laguq araq ẽndah saq bebase, "Dengan saq tekuasein siq sẽtan ndẽq ngeraos maraq nike! Napi bau sẽtan piaq dengan bute tao nyerioq?"

²² Lẽq Yerusalem dengan-dengan kenyeke ngerayeang Hari Raye Peresmian Gedẽng Allah. Waktu nike musim telih.

²³ Deside Isa kenyeke bemargi lẽq Sesangkok Sulaiman lẽq dalem Gedẽng Allah,

²⁴ sewaktu dengan-dengan Yahudi dateng bekumpul lẽq sekelining Deside Isa. Ie pade matur, "Jangke piran Pelungguh alurang tiang pade bimbang? Manikang secare terus terang, lamun Pelungguh tetu-tetu Almasih."

²⁵ Jawab Deside Isa, "Sampun Tiang badaq side, laguq side pade ndẽq percaye. Karye-karye saq Tiang laksaneang dalem pesẽngan Bapa Tiang, nike ngebẽng bukti mengenai Tiang.

²⁶ Side pade ndẽq percaye sẽngaq side pade ndẽq tame itungan dombe-dombe Tiang.

²⁷ Dombe-dombe Tiang dengahang suare Tiang. Tiang kenal ie pade, dait ie pade turut Tiang.

²⁸ Tiang ngebẽng idup sejati dait kekel tipaq ie pade dait ie pade pasti ndẽq gen binase selaẽq-laẽqne. Ndẽq araq sopoq dengan juaq saq bau ngerampas ie pade lẽman imen Tiang.

²⁹ Bapa Tiang, saq sampun ngicanin ie pade lẽq Tiang, belẽqan lẽman selapuqne. Dait ndẽq sopoq dengan juaq bau ngerampas ie pade lẽman Bapa.

³⁰ Tiang dait Bapa sopoq."

³¹ Beterus dengan-dengan Yahudi bait malik batu jari melẽwas Deside Isa.

³² Laguq manik Deside Isa lẽq ie pade, "Side pade sampun serioq Tiang ngelaksaneang luwẽq karye saq solah, saq tetugasang siq Bapa lẽq Tiang. Saq mbẽ lẽq antare karye nike saq jari penyebap side pade mẽlẽ melẽwas Tiang?"

³³ Jawab dengan-dengan Yahudi nike, "Nẽnten lantaran karye-karye Pelungguh saq solah nike tiang pade mẽlẽ melẽwas Pelungguh kadu batu, laguq lantaran Pelungguh menghine Allah. Pelungguh manusie biase, laguq padeang diriq kance Allah?"

³⁴ Beterus jawab Deside Isa, "Tekan araq tetulis lẽq dalem Kitab Suci Taurat, Allah bemanik, 'Side pade dẽwe'?

³⁵ Jari, lamun ie pade tesebut dẽwe lantaran Manik Allah tesampẽang tipaq ie pade -- padahal Kitab Suci ndẽqne bau tebatalang --,

³⁶ napi masih side pade bebase tipaq Ie saq tesuciang dait teutus ojok dunie siq Bapa: Side menghine Allah! Sẽngaq Tiang sampun bemanik, "Tiang Bije saq asalne lẽman Allah?

³⁷ Lamun Tiang ndẽq ngelaksaneang karye-karye Bapa Tiang, ndaq percaye lẽq Tiang.

³⁸ Laguq lantaran Tiang ngelaksaneang hal nike, pade percaye lẽq napi saq Tiang laksaneang nike, timaq side pade ndẽq mẽlẽ percaye lẽq Tiang. Adẽq side pade nenaoq dait ngerti bahwe Bapa lẽq dalem Tiang, dait Tiang lẽq dalem Bapa."

³⁹ Ie pade berusahe malik bau Deside Isa, laguq Deside Isa luput lẽman ie pade.

⁴⁰ Deside Isa tulak ojok itoqan Kokoq Yordan, lẽq taoq Yahya laẽq baptis dengan, terus meneng lẽq derike.

⁴¹ Luwẽq dengan parek ojok Deside Isa. Ie pade matur, "Yahya nẽnten ngelaksaneang keajaipan-keajaipan, laguq selapuq saq ie sampẽang mengenai dengan niki mule kenaq."

⁴² Beterus luwẽq dengan lẽq derike percaye lẽq Deside Isa.

Yohanes

Video Yohanes 10

Ikuti Kami:

KONTAK | PARTISIPASI | DONASI