Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lanri Yerusalem kula’bicara, lanri Sion kutala’mereki, sa’genna nipasalama’ naccaya pammetanna rapang sulo ri wattu bangngi.
2 He Yerusalem, naciniki bansa-bansaya pammetannu, naparhatikangi sikamma karaenga kalompoannu. Lanisareko areng beru, na KalenNa Batara lassareko anjo arenga.
3 La’jariko rapang songko’ kala’birang lalang limanNa Batara, songko’ kakaraengang lalang limanNa Allata’alanu.
4 Arennu teaimi ‘Nibokoia’, pa’rasangannu teaimi ‘Ia Sinoa’. Lanigallarakko, ‘Nisayanga ri Allata’ala’, na pa’rasangannu niarengi, ‘Le’bakamo A’nikka,’ saba’ mangngellai Batara mae ri kau, Ia rapangi bura’nenna pa’rasangannu.
5 Rapang se’re turungka ambuntingi se’rea tulolo, kammaminjo Mappa’jarinu laNanikkaiko. Rapang bunting bura’ne rannu anciniki bainenna, kammaminjo batenu laNingai ri Allata’ala.
6 Lammolika’ pangawala’ ri tembo’ kalli’na Yerusalem; allo bangngi ke’nanga takkulleai a’mereki, mingka musti tuli napakaingaki Allata’ala mae ri janjinNa le’baka Napare’.
7 Takkulleai ke’nanga Nalappassang a’mereki punna tenapa Nabangungi ammotere’ Yerusalem, na Napa’jari masahoro’ ri sikontu linoa.
8 Le’ba’mi a’janji Batara ammake sumpa nalaNagaukang lalang koasaNa: "Tenamo nalaKupassareang gandunnu mae ri musua; tenamo nalanainung bansa maraenga anggoro’nu wassele’ karesoannu siagang kaposoannu.
9 Mingka ikau appasse’rea kattoang, lanukanrei wassele’na numammuji ri Batara; na nualle rappo anggoro’nu, lanuinung je’ne’na lalang ri parang lakkenna BallakKu."
10 He pandudu’na Yerusalem, assulukko allalo ri pakke’bu’ lompoa, pasadiai oloanga untu’ sikamma tau ammotereka. Apparekko agang lompo, pabellai batu-batunna, paentengi sikamma banderaya untu’ bansa-bansaya.
11 Napassareangi Batara anne pasanga mae ri sikontu cappa’na buttaya, angkana, "Pabattui mae ri pandudu’na Sion angkana, ‘Ciniki, battumi Batara Mappasalamaka! Nirurungang ri sikamma tau le’baka Nalappassang.’"
12 Lanigallaraki ke’nanga: ‘Umma’ Matangkasa"; ‘Umma’ nipasalamaka ri Batara’. Yerusalem lanigallaraki ‘Kota ninyonyoka ri Batara’, ‘Kota tenayamo nanibokoi ri Batara’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA