Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Guna Jerusalem, la terbahan aku la ngerana, erkiteken Sion, la ateku sinik saja. Seh maka keselamaten kota e ersinalsal terang bagi matawari ras kemenangenna harhar bagi obor si gara sanga berngi.
2 O Jerusalem, idah bangsa-bangsa me kemenangenndu, kerina raja-raja ngidah kemulianndu. Ibahan me gelarndu gelar si mbaru, janah TUHAN jine mereken gelar e man bandu.
3 I bas tan TUHAN kam bali ras sada mahkota, mahkota si mejile sikerajangen Dibata.
4 Kam lanai igelari 'Si nitadingken', negerindu lanai Ikataken 'Ndehara si kelungunen'. Tapi kam igelari, 'Si ngena ate Dibata', janah negerindu ikataken, 'Nggo tersereh ia'. Sabap ngena ate TUHAN man bandu, janah Ia desken perbulangen man tanehndu.
5 Desken anak perana ngempoi singuda-nguda, bage me si nepa ngempoi kam. Desken penganten dilaki meriah ukurna erkiteken ndeharana, bage me Dibata meriah UkurNa erkiteken kam.
6 I datas tembokndu o Jerusalem, nggo kutamaken si erjaga; suari ras berngi la banci sinik ia, ipersingetinalah kerna TUHAN ras padan-PadanNa, janah asa ndigan pe ula bere IlupakenNa.
7 La erngadi-ngadi arus ipindona, gelah Jerusalem ipajekken TUHAN ka, janah gelah kota e pagi, jadi kota si terpuji i belang-belang doni.
8 Alu sumpah TUHAN nggo erpadan, maka arah KuasaNa la banci lang jadi, "Gandumndu lanai ipan musuhndu, janah bangsa si deban lanai nginemi anggurndu, si nggo ipepulungndu alu kelatihenndu.
9 Tapi kam si nuanken janah si perani gandumndu, ipanndu me buahna, dingen ipujindu TUHAN. Kam si miara ras si perani buah anggur, inemndu me launa i kesain Rumah Pertoton."
10 O kalak Jerusalem, ndaratlah kam arah kerabangen; man bangsandu si milih i negeri si ndauh nari, bahanlah dalan. Sikapkenlah pasar si mbelang, agui batu-batuna; pajekken bendera jadi tanda man bangsa-bangsa.
11 TUHAN nggo erberita ku belang-belang doni nina, "Kataken man kalak Jerusalem kerina, 'Enam reh TUHAN engkelini kam. Nehenlah, ras-ras KerehenNa, IbabaNa upah man BangsaNa.'"
12 Kam, igelari me 'Bangsa Dibata si Badia'; 'Bangsa si nggo ikelini TUHAN'. Kota Jerusalem igelari me 'Kuta si idarami Dibata', 'Kota si la itadingken TUHAN'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA