Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Panonggoran ni si Jesaya, anak ni si Amos, na nididahni pasal tanoh Juda pakon huta Jerusalem bani panorang ni si Usia, si Jotam, si Ahas pakon si Hiskia, raja-raja ni Juda.
2 Tangar ma ale langit, bogei ma ale tanoh; ai marsahap do Jahowa, “Hupagodang-godang do anak anjaha Hupatimbul, hape iimbang sidea do Ahu.
3 Itanda lombu do simadasi, anjaha ibotoh halode do palangka binahen ni tuanni; tapi anggo Israel seng itandai Ahu, anjaha bangsang-Ku seng maruhur.
4 Bursik ma bangsa si pardousa, bangsa sibuei hajahaton, ginompar ni halak na jungkat, anak si horjahon na masambor! Itadingkon sidea do Jahowa anjaha iapasi Na Pansing ni Israel, itundali sidea do Ia.
5 Bahen aha in sai nunuton lonsingon hanima, ai lambin surut do hanima humbangku? Ganup ulu boritan do, ganup pusu-pusu pe domma galek.
6 Humbani jampal ni nahei das bani ulu seng dong ijai na jorgit; na butong pakon na marbulistang, ampa ugah na mardaroh-daroh; seng hona pisat, seng hona balutan barang hona minakan.
7 Halong do tanohnima, matutung bani apuy hutanima, gogoh ni jumanima ipangan halak na legan i lobeinima; maseda do ai songon Sodom na matornoh.
8 Tarpunjung do boru Sion songon sopo-sopo i pohon anggur, songon lampolampo i pohon ansimun, songon huta na hinubu.
9 Ambit lang itadingkon Jahowa Zebaot banta otik na maluah doskon Sodom pakon Gomora do hita.
10 Tangihon hanima ma hata ni Jahowa ale pambobai ni Sodom! Bogei ma titah ni Naibatanta, ale bangsa Gomora!
11 “Benahangku ma galangan sisayatonnima na buei in,” nini Jahowa. “Domma sobalan Ahu bani galangan situtungonnima na humbani biribiri tunggal, ampa bani taboh-taboh ni lombu na pinamombur. Seng iharosuhkon uhur-Hu daroh ni lombu jonggi, atap biribiri atap hambing tunggal pe.
12 Anggo roh hanima Bangku sihol mangidah bohing-Ku, ise marsuruh hanima mandogei alaman-Ku?
13 Ulang be boban hanima galangan na so marnidok; dahupa hagigi do ai Bangku. Poltak ni bulan, ari Sabat, na mangadongkon partumpuan-tumpuan Seng tarharosuhkon Ahu hajahaton ampa na marpesta-pesta.
14 Poltak ni bulannima ampa pesta-pestanima ihagigihon Tonduy-Hu do; gabe boban do ai Bangku, anjaha loja do Ahu pausung-usung ai.
15 Age pe ipaherbang hanima tangannima, lingodkonon-Ku do matang-Ku humbennima; age pe ipagati hanima martonggo, seng tangaron-Ku ai; ai gok daroh do tangannima.
16 Maridi ma hanima, manguras ma hanima! Padaoh hanima ma hajahatonnima hun lobei ni matang-Ku; parontihon hanima mangkorjahon na masambor!
17 Parlajari mambahen na madear, pindahi habonaron, urupi halak na hona tokoh, ondingi halak na tading maetek, apiti naboru na mabalu!
18 Roh ma hanima, ase marturiak hita, nini Jahowa. Age pe gerger dousanima songon bunga ni dapdap lopak do bahenon-Ku ai songon salju, age pe gerger songon hiou hasumba, putih do bahenon-Ku ai songon kapas.
19 Anggo ra hanima anjaha pambalosi hanima, hinadear ni tanoh in ma panganonnima.
20 Tapi anggo mangengkar hanima anjaha manlawan, podang ma mangankon hanima, sonai do ihatahon pamangan ni Jahowa.”
21 Sonaha do parjadi ni huta na bujur in gabe boru jalang? Gok hinan habonaron ijai, anjaha hapintoron marianan ibagas, hape sonari gok pamunuh!
22 Pirakmu salih do gabe timah, anggurmu maragu bani bah.
23 Pambobai panggeori, hasoman ni panangko, ganupan sidea mangkarosuhkon sisip anjaha mangindahi sibere-bere. Seng iapiti sidea halak na tading maetek anjaha pangaduan ni parinangon na mabalu seng ijalo sidea.
24 Halani ai nini Tuhan Jahowa Zebaot, Pargogoh ni Israel do, “Sai marpuas-puas do uhur-Hu bahenon-Ku mangidah imbang-Ku, anjaha balaskonon-Ku do munsuh-Ku.
25 Ulakan-Ku do mangonai tangan hubam, tapi papitahon-Ku do ho songon bosi buruk-buruk anjaha padaohon-Ku do humbam timah-timahmu.
26 Anjaha pasuangon-Ku do bam panguhum songon na bani mulani ampa panuturi songon sapari; dob ai goranon ma ho huta hapintoron, huta na bujur.
27 Ai tobuson do Sion marhitei habonaron anjaha pangisini na paubahkon uhurni marhitei hapintoron.
28 Tapi siapkononkon do sipanggeori ampa pardousa rap-rap, anjaha bois do sagala na manadingkon Jahowa.
29 Ai maningon maila do hanima halani hayu jabi-jabi, na hinarosuhkonnima hinan, anjaha maila do hanima halani pohon na pinilihnima.
30 Ai maningon gabe songon hayu jabi-jabi do hanima, na melus bulungni, anjaha songon pohon na so marbah.
31 Halak parkuasa gabe songon bonang hori, pambahenanni songon palian ni apuy, haduasi rap mosog, seng dong na mangintopi.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA