Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bone nakimbolonga anne kittaka iamintu siapa are pappasang ri passala’na Yehuda siagang Yerusalem; anne pappasanga Napabattui Allata’ala mae ri Na’bi Yesaya, ana’na Amos, ri wattunna Uzia, Yotam, Ahas, siagang Hizkia, ammarenta ri Yehuda.
2 Pilangngeri he langika, parhatikangi he buttaya! Nakana Batara, "Ana’-ana’ le’baka Kuparakai angngewai ri Nakke.
3 Sapia naassengi narupa karaenna, keledaia naassengi tampa’ pangnganreanna le’baka napasadia karaenna. Mingka ummakKu Israel tena; tena napahangi ke’nanga."
4 Cilakako kau bansa dorakaya, tau panraka siagang ja’dalaka! Ta’loposo’ ngaseng mako lanri dosa-dosanu. Nutollaki Batara siagang nubokoi Allata’ala Kaminang Matangkasaka, siratanga musti nusomba.
5 Angngapa natuli nubali-baliA’? Erokko nihukkung la’bi battallangngang pole? Rassimi ulunnu puru-puru lompo, garrimmi atinnu siagang pikkirannu.
6 Battu ri cappa’ ulunnu sa’genna pala’ bangkennu tenamo baji’-baji’ ri kalennu. Akkambang-kambang ngaseng kalennu, rassi bate cambo’ siagang bokka’-bokka’. Anjo bokka’-bokka’nu tenapa nale’ba’ nitangkasi siagang niroko’, tena tompa naniballei siagang minynya’.
7 Pa’rasangannu nipanrakimi; kota-kotanu la’busu’mi nitunu. Ri dallekang matannui nialle tampa’nu ri bansa maraeng siagang naancuru’ ngaseng sikamma apa niaka.
8 Yerusalem mami ammantang, mingka anjo kotaya nikulilingimi ri musu, tenamo kullena; rapang mami balla’ koko ca’di ri koko anggoroka, yareka balla’ kepo-kepo ri koko bonteka.
9 Ebara’ angkana tena Napata’lappasaki Batara Kaminang Koasaya siapa are tau battu ri katte, ma’nassa cappu’ ngaseng maki’, rapang kota Sodom siagang Gomora.
10 Yerusalem, sikamma pamimpinnu siagang bansanu, a’jari sangkammami tu Sodom siagang tu Gomora. Pilangngerimi apa Nakanaya Batara mae ri kau; parhatikangi apa Napangngajarranga Allata’alata.
11 Nakana Batara, "Nukapangi angkana Kungai sikontu anjo passare tulusu’ nupassareanga mae ri Nakke? LanreA’ mae ri sikamma gimbala’ koro’bang nitununu siagang ri jannana sikamma ana’ sapinu. Tena Kungai cera’ sapi lakia, gimbalaka siagang bembea.
12 Inai assuroko angngerangi anjo sikontu passarea punna battuko anggaukangi ibadanu mae ri Nakke? Inai assuroko a’dete’ lalang ri Balla’ MatangkasakKu?
13 Tena matu-matunna nuerang anjo passarea. ErokkA’ ta’langnge angngaraki rasanna. BirisikkA’ siagang tena Kuparrang ancinikko ampakalompoi Bulang Berua, allo-allo Pammari-marianga, allo-allo lompo kammayatompa sikamma passirapakkang agamanu. Yangasenna anjo nurantassi lanri dosa-dosanu, siagang a’jarimi erangngang battala’ mae ri Nakke; mangngamMa’ Kusa’ring angngerangi.
14 (1:13)
15 Punna nupatara limannu appala’ doang, tena Kuero’ amparhatikangi. TaKujampangiai angkana siapa jaina pappala’ doannu, taerokA’ ampilangngeri, nasaba’ iaminjo limannu jai sikali tau nabuno.
16 Bissaimi kalennu sa’genna tangkasa’. Pammari ngasengi anjo sikamma kaja’dallang nugaukanga. Iyo, tea mako a’gau’ ja’dalli pole,
17 appilajara’ mako anggaukangi bajika. Paentengi kaadelanga siagang pa’rapusuki tau anjallakkanga; sarei ha’na ana’ kukanga siagang alleangangi parkarana sikamma jandaya."
18 Nakana Batara, "Umba nanipa’le’ba’ anne parkaraya. Manna pole nule’leng kamma uring napakamma dosa-dosanu, laKubissaiko sa’gennu a’jari kebo’ sangkamma kapasa’. Manna pole najai siagang battala’ dosa-dosanu, mingka laKupammopporang ngasengi.
19 Punna erokko mannuruki mae ri Nakke, lanukasia’ ngasengi apa bajika, iamintu wassele’na pa’rasangannu.
20 Mingka punna angngewako ri Nakke, lamateko lalang bundu’. INakke, Batara, anne a’bicara mae ri kau ngaseng."
21 Kota tamamminraya tappa’na riolo taunna, kamma-kamma anne sanrapammi baine pagau’ sala! Riolo yangaseng pandudu’na adeleki, lambusuki, mingka kamma-kamma anne sangnging pabuno-buno pandudu’na.
22 O, Yerusalem, riolo rapangko pera’, mingka kamma-kamma anne tenamo anggarannu. Riolo rapangko anggoro’ nyamang, mingka kamma-kamma anne je’ne’ biasa mamako.
23 Sikamma pamimpinnu angngewami mae ri Nakke siagang assikongkolo’mi palukka’; nangai ke’nanga annarima hadia siagang doe’ pammuccu’. Taerokai ke’nanga angngalleangangi ana’ kukanga ri pangadelanga; taerokai ke’nanga ampilangngeri tuntutanna sikamma janda-jandaya.
24 Lanri kammana anjo Nakanamo Batara Kaminang Koasaya, Allata’alana Israel: "He, musu-musungKu, la’balasakA’ mae ri kau, sa’genna tenamo nanususaiA’ pole.
25 LangngalleA’ tindakang mae ri kau. Rapang tau lannangkasia pera’ yareka bulaeng, kammaminjo laKutangkasi tongko; sikontu apa ra’masaka laKupabellai battu ri kau.
26 LaKusare poleangko haking-haking siagang tumappakainga’ kamma riolo. Nalaniaremmo Yerusalem kota adele’ siagang majarre’ ri tappa’na."
27 Adeleki Batara. Jari laNapasalamaki kota Yerusalem siagang sikamma taunna assesse’ lalanga.
28 Mingka tau dorakaya, angngewaya mae ri Ia, laNapanraki, nampa sikamma tau ambokoiyai laNapaccappuki.
29 Lanipakasiriki ke’nanga lanri anynyombana ri poko’-poko’ kayua siagang anynya’la’na koko-koko untu’ rewata-rewataya.
30 La’jari ke’nanga rapang poko’ kayu lompo kalumenga leko’na, rapang koko tenaya natabai je’ne’.
31 Rapangi rarame akkanrea lanri nitaba ri racci’ bara pepe’, kamma tomminjo sikamma tukoasaya lanipanraki lanri panggaukang-panggaukang kalenna tonji ke’nanga, iamintu kaja’dallanna ke’nanga. Nampa tena tau akkulle ampamari anjo kaancuranna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA