Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me berita kerna Juda ras Jerusalem si ipetangkas Dibata man Jesaya anak Amos tupung Usia, Jotam, Ahas ras Hiskia jadi raja Juda.
2 Nina TUHAN, "O langit ras doni, begikenlah katangKu! Anak si Kupebelin-belin nggo ngelawan Aku.
3 Lembu itandaina ise empuna, janah kalde meteh i ja ia ibere tuanna man. Tapi bangsangKu Israel kai pe la ietehna; sitik pe la lit pengertinna."
4 Cilaka me kam, o bangsa perdosa, kam si erlagu langkah macik dingen jahat! Dosa-dosandu nggo nindih kam. Nggo itadingkenndu TUHAN, igombangindu Dibata si Badia nu Israel, janah nggo itundalkenndu Ia.
5 Ngkai maka lalap kam berontak? Terberaten kin atendu kam iukum? O Israel, takalndu nggo ugahen kerina, janah pusuh ras ukurndu nggo penakiten.
6 I tapak-tapak nahendu nari terus ku piserenndu lanai lit si melikas. Dagingndu dem alu bekas lintang si mesui ras luka-luka. Ugahndu langa ibersihken, langa itambari alu minak janah langa ibaluti.
7 Negerindu nggo ikernepken, janah kota-kotandu nggo iciluk. I lebe-lebe matandu bangsa si deban muat tanehndu, janah kerina si lit i je iradaskenna.
8 Jerusalem nari ngenca tading, tapi kota e pe nggo terkepung dingen lanai ergegeh, bali ras sapo terulang i tengah peken anggur tah pe bagi pantar i tengah juma.
9 Adi TUHAN si Mada Kuasa la nerapkenca, tentu kota Jerusalem pe nggo keri kal kernep, bali ras Sodom ras Gomora.
10 O Jerusalem peminpin-peminpinndu ras kalak si ringan i je bali ras Sodom ras Gomora. Genduari begikenlah kai si ikataken TUHAN man bandu; perdiatekenlah kai si iajarken Dibatanta man bandu.
11 Nina TUHAN, "Akapndu kin ngena ateKu kerina persembahen si la erngadi-ngadi ipersembahkenndu man bangKu e? Nggo medu Aku biri-biri si itutungndu jadi persembahen, bage pe tabeh-tabeh asuh-asuhenndu si mbur. Nggo leja Aku nandangi dareh lembu, dareh biri-biri ras dareh kambing e.
12 Ise nuruhsa maba persembahen e kerina asum kam reh nembah Aku? Ise nuruhsa kam ndedeh kesain Rumah PertotonKu?
13 La lit gunana kam maba persembahen. Mutah ateKu nganggeh bau kumenen si itutungndu. Ciga ateKu ngidah kerja meriah si iabahndu guna ngerayaken Bulan Mbaru, wari Sabat, ras kepulungenndu i bas kebakti-kebaktin. Kerina e nggo macik erkiteken dosa-dosandu.
14 Nembeh ateKu nandangi wari raya Bulan Mbaru ras wari-wari raya si deban. Kerina si e jadi babanKu si mberat man bangKu, janah nggo latih Kuakap mabasa.
15 Adi iangkatndu tanndu ertoto, mis Kupudiken. Aminna uga gia buena pertotonndu la Aku nggit megikenca, sabap alu tanndu nggo nterem kam ngamburken dareh kalak.
16 Peridilah bandu maka kam bersih. Ngadikenlah erbahan kejahaten i adep-adepenKu. Ulanai bahan si la mehuli,
17 tapi erlajarlah erbahan si bujur. Usahakenlah maka keadilen idalanken, sampati kalak si idehken, berekenlah man anak melumang kai si jadi sikerajangenna, janah belalah hak diberu-diberu balu-balu."
18 Tole nina TUHAN, "Marilah maka si dungi cakapta enda. Kam nggo erkubang-kubang ibahan dosa, tapi kuperidi kam maka bersih bagi salju. Aminna gia erkiteken dosandu kam nggo mbiring bagi tengguang, mulihi kam jadi mbentar bagi kapas.
19 Adi kam patuh man bangKu, ipanndu me kai si mehuli ulih tanehndu enda.
20 Tapi adi ilawanndu Aku, mate me kam ipan pedang," bage nina TUHAN.
21 Andiko, kota si nai patuh, genduari nggo bagi diberu perlua-lua langkahna! Nai kota e dem alu kalak bujur, tapi genduari kalak pemunuh ringan i je.
22 O Jerusalem, nai kam bagi pirak, tapi genduari lanai lit ergandu. Nai kam bagi anggur si mehuli, tapi genduari lau nari ngenca.
23 Peminpin-peminpinndu nggo jadi pemberontak janah erteman ras pinangko; kerinana ia ngaloken sogok, janah rangap nandangi pemere kalak. La pernah ibelana anak melumang i bas pengadilen, janah la ia nggit megiken pengadun diberu balu-balu.
24 Erkiteken si e, begikenlah genduari kai nina TUHAN si Mada Kuasa, Dibata Israel si mbisa, "Erbalas ateKu man bandu, o kam imbang-imbangKu, maka ulanai isuhsahindu Aku.
25 Kubahan me tindaken man bandu. Desken ngelebur timah gelah murni, bage me pe kam Kumurniken. Kerina tembesindu Kuagui.
26 Kubereken man bandu penguasa-penguasa ras penasehat-penasehat bagi si nai. Kenca bage Jerusalem igelari kota si bujur dingen tutus."
27 Erkiteken TUHAN bujur, IkeliniNa Jerusalem ras kerina kalak si jera si ringan i je.
28 Tapi kerina kalak si erbahan dosa ras berontak man BaNa IripukkenNa. IsasapkenNa kerina kalak si nadingken Ia.
29 La banci lang erkadiola kam denggo erkiteken kam pernah nembah man batang-batang kayu janah ipersembahkenndu peken-peken man dibata-dibata si deban.
30 Sabap melus me kam bagi kayu si nandangi mate, bagi peken si la dat lau.
31 Bagi nggala meseng erkiteken bincar api si kitik, bage me kalak si erkuasa kernep erkiteken perbahanenna si jahat, janah ise pe la ngasup ngambatisa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA