Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tabea! 'Esa moi ma Jo'oungu ma Dutu 'awi kawasa nioodumu gee kiaka naga bato niaika 'o duniaka ne'ena! Ngoi ne'ena 'o Yakobus, ma Jo'oungu ma Dutu 'awi gilaongo de ma Yesus Kristus 'awi gilaongo.

² 'Esa moi riaka dodoto, nako ngini nidutuku 'o susa de 'o sangisara 'i'ini-'inioka ma ngale nitaili, ge'ena kaniosisamaowa.

³ Sababu ngini nianakokau, nako la ngini koniomasipidiluwa de ma Jou ngaro 'o susa de 'o sangisara nidutuku ma, ge'ena ma duanguku ngini niotongosono.

⁴ Niapaliara nia singina 'ito-tongosono ge'ena la kaisiika monga 'ikuata sigado ma gou-goungu nia'akunokau 'okia sonaa moi-moi niodaari.

⁵ Nako la nginioka naga moi koyobarijawa rekeni, ge'ena yomaga'asoko ma Jo'oungu ma Dutuka, de dua 'una 'asa wakikula, sababu 'una woduaka 'o nyawa 'isinoimika wakiriwo de 'awi dora.

⁶ Ma gee yomaga-ga'asoko go'ona salingou yongaku, de koidadiwa manga singina 'ikapula. Sababu 'o nyawa manga singina 'ikapula-pula ge'ena 'isoka 'o moku-moku 'o dadoko ya'asa-'asa 'isiika 'isiino.

⁷ 'O nyawa koge'ena, ge'ena 'uwa yomangano-nganono 'ato dua 'o kianikia yomadamake ma Jo'oungu ma Dutuno.

⁸ Sababu 'o nyawa gee manga singina 'ikapula-pula ge'ena manga di-dibangi koiriiduwa.

⁹ Niongaku-ngaku gee niosusa-susa so konisikiamoiwa, yaowa kaniomore-morene sababu ma Jo'oungu ma Dutu winisidaduie.

¹⁰ Ma ngini niokaya-kaya salingou kaniomore-morene sababu ma Jo'oungu ma Dutu winisidaduuku. Sababu 'o nyawa yokaya-kaya 'asa yoisanga 'isoka 'o 'ubutu ma bunga.

¹¹ Gee 'o wange 'ibaoro de ma sauku 'ipa'awoto so ma 'ubutu ge'ena 'imaai de ma bunga 'itotaka so koisurewau. Koge'enali mita dua 'o nyawa yokaya-kaya, 'ona 'asa yoisanga gee manga 'usaha yosidagi ma gu-gudaioka.

¹² Yosanangioka 'o nyawa gee yota-tahani ma 'orasi 'o susa de 'o sangisara yakidutuku, sababu gedagee yotongosonokau yakitaili, 'ona 'asa yomadamake ma parasengi ge'ena la 'o 'ahu 'ika-kakali gee ma Jo'oungu ma Dutu wosijajiokau 'o nyawa wisiboso-bosonika.

¹³ Nako la moikani yakitaili, 'uwa yongose 'ato ge'ena ma Jouno! Sababu ma Jo'oungu ma Dutu koidadiwa 'o dorou witaili, de 'una kowakitailuwa ka moika ma.

¹⁴ Ma nago'ona yakitaili ge'ena ma ngale to 'ona ma sirete manga nyafisuu ma dorou yakibaja de yakitobaka.

¹⁵ De nako 'o nyafisuu ma dorou ge'ena yamotekokau, ge'ena 'imadadi 'o sowono. De nako 'ona koyomaogoruwa yodiai 'o sowono, ge'ena ma duanguku 'o songene.

¹⁶ 'Esa moi riaka dodoto tinisiboso-bosono, 'uwa niakidomoteke 'o nyawa gee yomau nisihaga.

¹⁷ 'O sagala co-catu de 'o parasengi 'itoto-totomo ge'ena 'iodumu daku 'o sorogaaku 'iboa, ma Jo'oungu ma Dutu gee 'okia sonaa 'ita-tarangi 'o diwangoka wodi-diai wosigutiku. 'Una ge'ena ma Jo'oungu ma Dutu kowongali-ngaliwa, de 'unaka 'iso de 'o darusou ge'ena ka ma gurumini ma koi'iwa.

¹⁸ Ka to 'una ma sirete 'awi mau ngone wonadiai to 'una 'awi ngowa-ngowaka, ma ngekomo 'awi demo 'iti-tiai. 'Una wodiai koge'ena la ngone podaduie de 'o sagala moi-moi gee wosidadi-dadiku.

¹⁹ 'Esa moi riaka dodoto tinisiboso-bosono! Niosi-singina naneda: 'O nyawa 'iodumu salingou 'itaiti yosigisene ma 'uwa kaitaiti yobicara de kaitaiti yongamo.

²⁰ Sababu 'o nyawa gee yotabangamo ge'ena koya'akunuwa yadiai yaowa-owa, gee ma Jo'oungu ma Dutu wodua-duaka.

²¹ Ge'enau so nia'umo 'ania biasau gee 'ige-ge'ewere de 'ito-torou. Nia'ese ma Jo'oungu ma Dutu 'awi demo gee nia singinaka wosinoakau, sababu 'o demo ge'ena de ma guata ma ngale nisilaha.

²² Ngini salingou niadiai 'okia naga gee ma Jo'oungu ma Dutu wongosekau, 'uwa duga kaniosigisenino so ka ngini ma sirete nimasihaga.

²³ 'O nyawa gee yosigisene ma Jo'oungu ma Dutu 'awi demo ma koyadiaiwa, ge'ena 'isoka 'o nyawa manga biono yalega 'o kasinaaka.

²⁴ Gedagee yaunginoka de yotagi de yamongorokau kokia ma jako manga biono ge'ena.

²⁵ Ma nago'ona yalega yosidemogaroku 'o besesongo 'iti-tiai ge'ena de yomasiga-gao ge'enaka de yosigou-goungu yadiai, so duga kayosigiseninowa de yamongorokau, 'ona 'asa yosanangioka. 'O besesongo 'iti-tiai, ge'ena la 'o besesongo gee 'o nyawa yakisipidi-pidili 'o sowonoka ma ngale yakisilaha.

²⁶ Nako moikani yomamaoku 'o 'agama ma nyawa ma manga 'uru koyojagawa, ge'ena 'ona ma sirete yomasihaga. Ge'ena ma ngale yo'agama ma faedaa koi'iwa.

²⁷ 'O singounu ma gou-goungu 'o 'agamaka moteke nanga Dea ma Jo'oungu ma Dutu ge'ena la: 'O go'osisi ma dorou de 'o bao-bao yosa-sangisara pakiriwo, de ngone ma sirete pomajaga la 'uwa 'o dunia 'inasitorou.

Yakobus

Video Yakobus 1

Ikuti Kami:

KONTAK | PARTISIPASI | DONASI