Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hun bani si Jakobus, juakjuak ni Naibata ampa Tuhan Jesus Kristus, marayak na sapuluh dua marga na merap in, “Tabi ma bani nasiam!”
2 Nasiam sanina, hira nasiam ma in malas ni uhur tumang, anggo madabuh nasiam hubagas bagei ni parlajouan,
3 anjaha botoh nasiam ma, na mangkorhon hasabaron do parlajouan na hubani haporsayaon nasiam.
4 Anjaha hasabaron ai mangkorhon horja na gokan dear, ase gabe gokan dear nasiam, seng dong sihataon anjaha seng marhahurangan.
5 Tapi anggo adong i tongah-tongah nasiam na hurangan bani hauhuron, ipindo ma ai hubani Naibata, na layak mambere bani haganup, anjaha seng marpangayah, jadi bereon-Ni ma ai hu bani.
6 Tapi ibagas haporsayaon ma ia mangindo, ulang bungbang, ai halak na bungbang uhur usih do ai hubani gilumbang ni laut, na pinalindak-lindak anjaha nionjar ni logou.
7 Ulang ma iagan uhur ni halak sisonai, adong jaloonni atap aha humbani Tuhan in,
8 ai halak na mardua uhur, na geor do ai bani haganup dalanni.
9 Ipuji sanina na toruh uhur in ma dirini halani hagijangonni,
10 tapi na bayak in halani hatoruhonni; ai na laho salpu do ia songon bunga ni poyon-poyon.
11 Ai na poltak ma mata ni ari rap pakon milasni, jadi melus ma poyon-poyon ai, marurus bungani, anjaha rupani na jenges ai pe magou ma. Sonai ma laho melus na bayak in ibagas langkah-langkahni.
12 Martuah ma halak na tahan bani parlajouan, ai dob monang ia bani parlajouan ai, jaloonni ma sortali hagoluhan, na dob pinarbagah ni Naibata bani na marholong ni uhur Bani.
13 Ulang ma adong na mangkatahon sanggah na tarlajou ia, “Na tarlajou do ahu humbani Naibata!” Ai seng boi hona lajou Naibata laho mangkorjahon na jahat, anjaha Ia sandiri seng adong na ilajou.
14 Tapi hona lajou do halak, anggo itarik-tarik anjaha iompan-ompani hisap-hisap ni uhurni sandiri ia.
15 Jadi anggo marbanggal ma hisap-hisap ni uhur ai, itubuhkon ma dousa, anjaha dob gok dousa ai, itubuhkon ma hamatean.
16 Ulang ma nasiam kahou, nasiam sanina na hinaholongan.
17 Haganup sibere-bere na madear, anjaha haganup silayak-layak na gokan dear, ai ma na roh hun datas, humbani Bapa ni na lihar, seng ra mubah Ia anjaha seng dong na golap Bani halani partukaran.
18 Marhitei sura-sura ni uhur-Ni itubuhkon do hita marhitei hata hasintongan in, ase hita gabe limbuah ni sagala na tinompa-Ni.
19 Ingat nasiam ma, nasiam sanina na hinaholongan: Ganup halak, ringgas ma ia manangi-nangi, asok marsahap anjaha lambat marringis.
20 Ai seng ihorhon marah ni jolma hapintoron i lobei ni Naibata.
21 Halani ai ambukkon nasiam ma sagala na mabutak ampa sagala masam ni hajahaton, anjaha jalo nasiam ma ibagas halamlamon hata na sinuan ibagas uhur nasiam, na tarbahen paluahkon tonduy nasiam.
22 Gabe sihorjahon hata in ma nasiam, ulang panangi-nangi tumang, na paoto-otohon dirini sandiri.
23 Ai panangi-nangi bani hata in anggo seng ihorjahon, usih ma ai bani halak na patonggor-tonggor rupa ni bohini bani sormin.
24 Ididah do namin rupani, dob ai laho ma ia, gabe mintor lupa ma ia, atap sonaha do rupani ai.
25 Tapi na manorih torus hubagas titah hamardekaon na gokan dear ai, anjaha totap ijai, seng sipanangi-nangi na urah lupa ia, tapi sihorjahon hata in ma ia tene, martuah ma ia ibagas na mandalankon ai.
26 Anggo adong na mangkatahon ibagas uhurni, na daulat ia, hape lang irantei dilahni, ipaoto-oto uhurni do ia ai, na parsuma do parugamaonni ai.
27 On do parugamaon na borsih anjaha na so dong sihataon bani uhur ni Naibata, Bapa in, ai ma manorih na tading maetek ampa na mabalu ibagas hamarsikonni, anjaha manjagai diri ulang butak marhitei dunia on.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA