Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian, dengan-dengan saq tehususang bagi Allah saq nyebar lẽq seantẽro dunie! Salam lẽman tiang, Yakub, hambe Allah dait hambe Junjungan Saq Mulie Deside Isa Almasih.

² Semeton senamian! Lamun side pade ngalamin macem-macem cobe, side pade harus anggep hal nike jari kebahagiean.

³ Sẽngaq side pade nenaoq, bahwe ujian tipaq imande nike ngasilang ketekunan.

⁴ Jagaq adẽq ketekunande nike ngasilang kesempurnean, adẽq side pade jari sempurne dait lengkap, ndẽq kekurangan lẽq hal napi juaq.

⁵ Lamun araq sopoq dengan lẽq antare side saq kekurangan hikmat, ie harus tunas lẽman Allah, make Allah gen ngicanin ie; sẽngaq lẽq sebilang dengan, Allah ngicanin secare murah atẽ dait nẽnten ngungkit-ngungkit kesalaqanne.

⁶ Laguq dengan saq nunas dalem iman, ie ndẽq kanggo bimbang. Sẽngaq dengan saq bimbang angenne maraq umbak lẽq segare dait lito latẽ tetiup siq angin.

⁷ Dengan saq maraq nike ndẽqne tetep pikiranne; ie ndẽqne bau bait keputusan napi-napi lẽq selapuq saq ie laksaneang. Keranaq nike ndaq ie harepang ẽndah gen mauq napi-napi lẽman Tuhan.

⁸ (1:7)

⁹ Alurang semeton saq idupne sederhane merase bangge lantaran kedudukanne saq atas.

¹⁰ Maraq nike ẽndah halne lẽq dengan sugih lantaran kedudukanne saq rendah, sẽngaq ie gen musnah maraq kembang pupaq.

¹¹ Sewaktu tiwoq jelo siq panasne saq keras, make pupaq nike gen jari layu sehingge roroq kembangne dait telang ẽndah kesolahanne. Maraq nike ẽndah dengan saq sugih; ie gen ancur lẽq waktu ie kenyeke berusahe.

¹² Bahagie dengan saq tahen sewaktu ie tecobe. Sẽngaq sesampun ie bau tahen lẽq cobe nike, ie gen nerimaq upaqne, nike mahkote kehidupan saq tejanjiqang siq Allah tipaq dengan-dengan saq ngasihin Ie.

¹³ Lamun sopoq dengan mauq cobe, ndaq ie bebase, "Cobe niki datengne lẽman Allah!" Sẽngaq Allah ndẽqne bau tecobe siq kejahatan, dait Ie ẽndah ndẽq cobe sai juaq.

¹⁴ Laguq dengan tecobe siq kemẽlẽqne mẽsaq, teoros dait tetipu siq kemẽlẽqne.

¹⁵ Beterus, lamun kemẽlẽq saq jahat nike teturut, make gen datengang dose; dait lamun dose sampun masak, make kematẽan saq jari akibatne.

¹⁶ Semeton senamian saq tiang kasihin; ndaq side pade jari sesat.

¹⁷ Selapuq hal saq solah saq teicanin dait paice saq sempurne datengne lẽman sorge, teturunang siq Bapa, sumber selapuq cahaye dait saq ndẽq iniq berobah atao bekurang lantaran perobahan.

¹⁸ Siq pekayunan-Ne mẽsaq Ie sampun jariang ite ciptean baru siq manik kebenaran, Ie ngelaksaneang nike adẽq ite jari bije saq sengake lẽq antare selapuq mahluk ciptean-Ne.

¹⁹ Pade perhatiang niki solah-solah, semeton senamian saq tiang kasihin! Sebilang dengan harus becat dedengah, laguq ndẽqne becat bebase dait ndẽqne becat gedek.

²⁰ Dengan saq gedek ndẽqne bau ngelaksaneang saq kenaq lẽq arepan Allah.

²¹ Keranaq nike, tetẽh selapuq kebiasean saq lengẽ dait saq jahat. Terimaq Manik Allah setulusne lẽq dalem atẽnde, sẽngaq Manik nike bedowẽ kekuatan jari nyelametang side pade.

²² Side pade harus jari dengan-dengan saq ngelaksaneang Manik Tuhan, ndaq cume dengah doang, sehingge siq care nike side nipu diriqde mẽsaq.

²³ Dengan saq dengahang Manik Allah, laguq ndẽqne ngelaksaneang, nike maraq dengan saq kenyeke merhatiang ruene mẽsaq lẽq julu kesene.

²⁴ Sesampunne perhatiang solah-solah, ie lumbar dait langsung ngelupaqang berembẽ rue muene nike.

²⁵ Hukum Allah sempurne dait bedowẽ kekuatan jari merdẽkeang manusie. Dait dengan saq nyelidik dait pacu-pacu merhatiang dait ngelaksaneang hukum-hukum nike, dait ndẽqne cume dengah doang beterus lupaq, dengan nike gen bahagie lẽq napi juaq saq ie laksaneang.

²⁶ Lamun araq sopoq dengan saq merase diriqne ngelaksaneang ibadah, laguq ie ndẽq jagaq ucapanne, ie nipu diriqne mẽsaq; ibadahne ndẽq araq manpaatne.

²⁷ Ibadah saq murni dait sejati menurut Allah Bapante: Nulung anak-anak iwoq dait bebalu-bebalu saq menderite, dait jagaq diriq mẽsaq adẽq ndaq tesẽdaq siq dunie niki.

Yakobus

Video Yakobus 1

Ikuti Kami:

KONTAK | PARTISIPASI | DONASI