Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Terus tiang serioq langit saq baru dait gumi saq baru, sẽngaq langit saq penembẽq dait gumi saq penembẽq ẽndah sampun telang, dait segare ẽndah ndẽq araq malik.

² Make tiang serioq kote suci nike, nike Yerusalem saq baru, turun lẽman sorge, lẽman Allah. Kote nike sampun tesiepang maraq sopoq pengantẽn nine saq tepayas jari bedait kance pengantẽn mame.

³ Terus tiang dengah suare saq belẽq lẽman tahte nike, "Mangkin kẽmah Allah araq lẽq tengaq-tengaq manusie! Ie gen idup kance ie pade, dait ie pade gen jari umat-Ne. Allah mẽsaq gen araq kance ie pade dait jari Allah ie pade.

⁴ Ie gen usap selapuq aiq penenteng lẽman penenteng ie pade. Kematẽan ndẽq gen araq malik; kesedihan, tangisan, atao kesakitan gen ndẽq araq ẽndah. Hal-hal saq laẽq sampun musnah."

⁵ Terus Ie saq melinggih lẽq atas tahte nike bemanik, "Mangkin Tiang jariang selapuqne baru!" Ie bemanik ẽndah lẽq tiang, "Tulis niki, sẽngaq selapuq manik niki kenaq dait bau tepercaye."

⁶ Beterus manik-Ne, "Sampun selesẽ! Tiang niki saq penembẽq dait saq penutuq; Tiang Tuhan lẽman Penembẽq jangke Penutuq. Sebilang dengan saq bedak, gen Tiang bẽng nginem secare cume-cume lẽman pengembulan aiq kehidupan.

⁷ Dengan-dengan saq menang gen nerimaq hal-hal nike lẽman Tiang. Tiang gen jari Allahne, dait ie jari bije Tiang.

⁸ Laguq dengan penakut, dengan saq ndẽq percaye, dengan bejat, tukang nyematẽq, dengan saq gawẽq perbuatan cabul, tukang-tukang sẽhẽr, penyembah berhale, dait selapuq penduste, gen tetetẽh ojok dalem segare api dait urirang saq nyale, nike kematẽan saq kedue."

⁹ Sopoq lẽq antare kepituq malaẽkat saq sampun negel cawan-cawan saq penoq siq kepituq bencane penutuq nike, dateng ojok tiang dait bebase, "Silaq! Gen tiang petitoqang side pengantẽn nine, nike pengantẽn-Ne Anak Dombe."

¹⁰ Make Roh Allah nguasein tiang, dait malaẽkat nike jauq tiang ojok pucuk gunung saq belẽq dait atas gati. Ie metitoqang tiang Yerusalem, kote suci nike, saq turun lẽman sorge, lẽman Allah.

¹¹ Kote nike penoq siq kemuliean Allah dait cahayene pade maraq permate saq paling solah, maraq batu baiduri pandan saq menẽng maraq kristal.

¹² Tembok penyengkerne atas gati, bedowẽ due olas jebak belẽq, dait tejagaq siq due olas malaẽkat. Lẽq jebak-jebak belẽqne tetulis aran-aran kedue olas suku bangse Israel.

¹³ Lẽq sedi timuq araq telu jebak belẽq, lẽq sedi daye telu jebak belẽq, lẽq sedi lauq telu jebak belẽq dait lẽq sedi bat telu jebak belẽq.

¹⁴ Tembok kote nike tepiaq lẽq atas due olas batu dasar. Lẽq atas batu-batu dasar nike tetulis aran-aran kedue olas rasul Anak Dombe nike.

¹⁵ Malaẽkat saq bebaos kance tiang nike bedowẽ tunjang pengukur lẽman emas, jari ngukur kote nike, jebak-jebak belẽqne dait tembokne.

¹⁶ Kote nike ruene maraq persegi empat -- bẽlone pade kance gamberne. Make malaẽkat nike ngukur kote nike kadu tunjang pengukurne; bẽlone due iyu samas kilomẽter; gamber dait atasne pade maraq bẽlone.

¹⁷ Waktu malaẽkat nike ngukur tembokne, ternyate atas tembok nike enem dase mẽter. Ukuran saq tekadu siq malaẽkat nike maraq ukuran saq tekadu siq manusie.

¹⁸ Tembok kote nike tepiaq lẽman batu baiduri pandan, dait kotene lẽman emas tulẽn, menẽng maraq kace.

¹⁹ Batu-batu dasar kote nike terias siq segale macem batu permate. Batu dasar saq penembẽq tepiaq lẽman batu baiduri pandan, saq kedue lẽman batu nilam, ketelu lẽman batu yakut, keempat lẽman batu zamrud,

²⁰ kelime lẽman batu baiduri sepah, keenem lẽman batu jeliman, kepituq lẽman batu ratne cempake, kebaluq lẽman batu pirus, kesiwaq lẽman batu topas, kesepulu lẽman batu krisopras, kesolas lẽman batu lazuardi, dait saq kedue olas lẽman batu kecubung.

²¹ Kedue olas jebak belẽqne tepiaq lẽman due olas mutiare, sopoq-sopoq lawang tepiaq lẽman sopoq mutiare. Langan lẽq kote nike tepiaq lẽman emas tulẽn, menẽng maraq kace.

²² Tiang ndẽq serioq Gedẽng Suci Allah lẽq dalem kote nike, sẽngaq Gedẽng Sucine nike Allah mẽsaq, nike Tuhan Saq Mahekuase, dait Anak Dombe nike.

²³ Kote nike ndẽq perlu temenahin siq jelo atao bulan, sẽngaq ie temenahin siq kemuliean Allah, dait Anak Dombe nike dilahne.

²⁴ Bangse-bangse lẽq dunie gen lampaq lẽq dalem cahayene, dait raje-raje ẽndah gen jauq kesugihan ie pade ojok dalem kote nike.

²⁵ Jebak-jebak belẽq kote nike gen tebukaq sejeloan; sẽngaq ndẽq araq kelem lẽq derike.

²⁶ Kemuliean dait kesugihan bangse-bangse gen tejauq ojok dalem kote nike.

²⁷ Laguq dengan saq ngelaksaneang hal-hal saq ẽkẽk, atao dengan saq beduste -- tetu-tetu ndẽq gen tame ojok dalemne. Saq gen tame cume dengan saq aranne tetulis lẽq dalem kitab kehidupan, kitab Anak Dombe nike.

Wahyu

Video Wahyu 21

Ikuti Kami:

KONTAK | PARTISIPASI | DONASI