Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naupu haitu nikitaku dunia nabaru. Langi pamulana bo tana pamulana naliumo, bo domo ria tasi.

² Bo nikitaku muni ngata nu Alatala, ngata Yerusalem nabaru nanau lako nte Alatala ri suruga. Nagaya mpuu ngata haitu mpo boti mombine nopakea nagaya nasadia raala boti langgai.

³ Bo niepeku suara namangga lako ri Gadera Kamagaua nu Alatala haitu nanguli, "Pariaramo! Sii-sii ponturo nu Alatala nosanggani-nggani ante manusia. Ia monturo ri tatangara bo ira majadi todeaNa. Bo Ia mboto mosanggani-nggani ante ira bo majadi Alatala nisombara.

⁴ Ia mbotomo mombapaisi pura-pura uve mata lako ri matara. Domo maria tona mamate, domo maria tona masusa rarara bara motumangi, bo domo maria tona madua. Sabana, dunia nokolu domo naria."

⁵ Naupu haitu nangulimo Toponturo ri Gadera Kamagaua, "Pariaramo! Sii-sii Yaku nompakabaru pura-pura anu naria." Bo niuliNa munimo ka yaku, "Tulisimo anu Kutesa, sabana tesa hitu mpuu-mpuu nakana bo namala raparasaya."

⁶ Bo niuliNa ka yaku, "Naupu puramo! Yakumo hii Pamulana bo Kaupuna. Yaku nompamula bo Yaku muni nompakaupu. Isema-sema nabai tambolona Kudekeika uve lako ri mata nu uve anu nombadekei katuvua nabelo sampe ri kasae-saena. Uve haitu Kudekei bayangi, ledo paraluu rabayari.

⁷ Isema-sema padagi, manggava pura-pura anu niuliKu pangane. Bo Yakumo majadi Alatalara bo ira majadi anaKu.

⁸ Aga tona naeka mangoseaka Yaku, atau ledo nomparasaya Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante *vatu-vatu colonggata. Haitumo niuli kamatea karongganina."

⁹ Naupu haitu nakavamo saito *malaeka lako nte ira papitu anu nantipale tubu-tubu niisi ante pitu-ngaya pepandasa kaupuna. Nangulimo ia ka yaku, "Kamaimo, kupopakita ka iko boti mombine anu rapoberei nu Ana Bimba."

¹⁰ Bo yaku nikuasai Nosa Gasa nu Alatala bo nikeni nu malaeka hau ri bavo bulu anu nambaso bo nalanga. Lako ri bavo bulu haitu nituduakana ka yaku ngata nu Alatala anu nosanga ngata Yerusalem nanau lako nte Alatala ri suruga.

¹¹ Ngata haitu nareme mpuu ante kareme nu Alatala mboto. Karemena damo nenggila mpo mata sinji nasuli alina, mpo vatu *yaspis anu nevayo mpo kaca.

¹² Ngata haitu ntiku-ntiku nitembo nakumba bo nalanga. Tembo haitu sapulu randua bobaana bo sapulu randua malaeka. Pura-pura bobaa simbo naria malaeka nombajagaina. Ri bobaa haitu naria nitulisi sanga-sanga nu ana i Israel nggaulu anu najadi sapulu randua valaa *ntoYahudi.

¹³ Tembo kumba haitu pata-njulapa bo sanjulapa-sanjulapa tatalu bobaana: tatalu ri mpandakena, tatalu ri mpanauna, tatalu ri tasina, bo tatalu ri puluna.

¹⁴ Tembo ngata haitu nipopeangga ri bavo sapulu rolonta vatu pandasi bo ri vatu pandasi haitu naria nitulisi sanga sapulu randua suro nu Ana Bimba.

¹⁵ Malaeka anu notesa ante yaku haitu nantipale sambesa toko poreke nipovia lako ri bulava raporeke kambaso ngata haitu ante tembo bo bobaana.

¹⁶ Ngata haitu pata-njulapa. Kandatena nasimbayu nte kaluona. Malaeka haitu nombareke ngata haitu ante toko porekena. Kandatena ronjobu pata-atu kilo. Kaluona bo kalangana nasimbayu ante kandatena.

¹⁷ Nirekena munimo tembo ngata haitu. Kalangana onopulu metere. Poreke nipake malaeka nasimbayu mpo poreke nipake manusia.

¹⁸ Tembo ngata haitu nipovia lako ri vatu-vatu *yaspis, anu nenggila nalei bo nagavu. Ngata haitu nipovia lako ri bulava anu ledo ria galona, sampe damo nenggila mpo kaca nevayo.

¹⁹ Vatu-vatu pandasi ngata haitu nivera ante sapulu rongaya vatu nasuli alina, salonta sangaya muni vatuna. Lonta pamulana nivera ante vatu yaspis navoe bo nevayo mpo kaca. Lonta karanduana nivera ante vatu nilam anu nagavu mpo uve ntasi nandala. Lonta katataluna nivera ante vatu mirah naputi bo nevayo. Lonta kaampana nivera ante vatu zamrud nosura mpo pae.

²⁰ Lonta kaalimana nivera ante vatu unam anu nisai nabula bo nalei. Lonta kaonona nivera ante vatu sardis anu nalei tua. Lonta kapapituna nivera ante vatu ratna cempaka anu narangguni mpo bulava. Lonta kauvaluna nivera ante vatu beril anu nosura nakuni-kuni. Lonta kasasiona nivera ante vatu krisolit anu nakuni mpuu. Lonta kasapuluna nivera ante vatu krisopras anu nosura mpo palapa loka. Lonta kasapulu sanguna nivera ante vatu lazuardi anu nagavu mpo langi. Bo lonta kasapulu randuana nivera ante vatu kecubung anu nakamumu bo nevayo.

²¹ Bo sapulu randua bobaa haitu nipovia lako ri sapulu randua *mutiara, sangu bobaa sangu *mutiarana. Bo dala riara ngata haitu nipovia lako ri bulava anu ledo ria galona, damo nenggila mpo kaca nevayo.

²² Ledo ria banua petupu nikitaku riara ngata haitu sabana Alatala toNeliu KakuasaNa, bo Ana Bimba mboto najadi Banua Petupu ri ngata haitu.

²³ Bo ngata haitu ledo paraluu reme nu eo bara reme nu bula, sabana reme lako nte Alatala mboto nompakaremena, bo Ana Bimba najadi poindona.

²⁴ Pura-pura manusia ri dunia matuvu riara karemena. Bo magau-magau ri dunia manggeni kakalumanara hau riara ngata haitu.

²⁵ Bobaa-bobaa ngata haitu bate-batena natebuka, ledo ntoto nateupi-upi sabana ri ngata haitu ledo ria bongina.

²⁶ Pura-pura manusia makava mombasomba bo manggeni kakalumanara mesua riara ngata haitu.

²⁷ Tapi anu naruto bo tona novia nadaa bo topodava ledo ntoto mamala mesua riara ngata haitu. Tona mamala mesua hamai aga tona nitulisi sangana riara Buku Katuvua nu Ana Bimba.

Wahyu

Video Wahyu 21

Ikuti Kami:

KONTAK | PARTISIPASI | DONASI