Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba u'ila mbanua si yaw̃a si bohou ba tanõ si bohou. Banua si yaw̃a si fõfõna andrõ awõ danõ si fõfõna andrõ no taya ba lõ asi sa'ae.
2 Ba u'ila mbanua ni'amoni'õ andrõ, ya'ia Yeruzalema si bohou, si lalõ mitou moroi ba zorugo si otara Lowalangi. No muhaogõ mbanua andrõ hulõ nono nihalõ si no mangehao ba wangondrasi fo'omonia.
3 Ba urongo li si'ao sebua moroi ba dadaoma andrõ, "Nahia Lowalangi andrõ iada'a no so ba gotalua niha! Mowanua Ia ba khõra, ba tobali banua-Nia ira. Ba Lowalangi samõsa nawõra ba tobali Lowalangira.
4 I'osi dania daw̃a hõrõ ba hõrõra fefu. Ba lõ fa'amate sa'ae; lõ fa'abu dõdõ, lõ fege'ege, ba lõ gõi fa'afõkhõ. Fefu ngawalõ zi tohõna andrõ no numalõ sa'ae."
5 Iw̃a'õ si dadao yaw̃a ba dadaoma andrõ, "Iada'e Ubohouni fefu hadia ia!" Imane gõi khõgu, "Sura da'e, bõrõ me no sindruhu daroma li andre ba tola nifaduhusi tõdõ."
6 Aefa da'õ Imane, "No awai! Si fõfõna Ndra'o ba safuria; So'aya i'otarai Mbõrõta Ndra'o irugi ba Gamozua. Ba dozi niha sowõkhi tõdõ, ba Ufabadugõ khõnia nidanõ moroi ba gumbu nidanõ fangorifi; lõ ibu'a mbõli.
7 Haniha zi mõna ba latema dania fefu da'e moroi khõ-Gu. Ba tobali Lowalanginia dania Ndra'o, ba tobali ono-Gu dania ia.
8 Ba ba niha sada'uda'u, ba si fatiu tõdõ, ba niha si lõ sõkhi amuata, ba samunu niha, ba niha sohorõhorõ, ba niha si fakelemu, ba niha sangalulu ba nadu, ba fefu niha solau faya, nahara mbaw̃a alitõ ba balera si holahola, ya'ia wa'amate si mendrua andrõ."
9 Samõsa moroi ba gotalua mala'ika andrõ si dafitu si no mololohe mako safõnu famakao si fitu ngawalõ safuria andrõ zi mõi khõgu, imane, "Aine! Ba uforoma'õ dania khõu nono nihalõ andrõ, ya'ia wo'omo Nono Mbiribiri andrõ."
10 Ba Ifatõrõ ndra'o Eheha Lowalangi, ba i'ohe ndra'o mala'ika andrõ ba zuzu hili salaw̃a sibai. Iforoma'õ khõgu Yeruzalema, banua ni'amoni'õ andrõ. Banua andrõ numalõ mitou moroi ba zorugo, moroi khõ Lowalangi,
11 ba no humaga si fao lakhõmi Lowalangi. Ba takile mbanua andrõ hulõ gara feremata, hulõ gara baduri sinasa sohahau si mane baluri.
12 No fasui õli kara sebua ba salaw̃a, ba felendrua mbawa gõli, nitarogõ zi felendrua mala'ika. Ba ba mbawa gõli andrõ no tesura dõitõi zi felendrua mado niha Gizera'eli.
13 Ba so tõlu mbawa gõli sangotahõgõ miyõu, ba tõlu mbawa gõli sangotahagõ miraya, ba tõlu mbawa gõli tanõ ba gatumbukha, ba tõlu mbawa gõli tanõ ba gaekhula.
14 Ba te'otomosi gõli mbanua andrõ ba dete zi felendrua gowe danedane. Ba dete gowe danedane andrõ no musura dõitõi ndra sinenge Nono Mbiribiri andrõ si felendrua.
15 Ba mala'ika si fahuhuo khõgu andrõ so khõnia zi'o fanu'a moroi ba gana'a, ba wanu'a banua andrõ, awõ mbawa gõlinia ba õlinia.
16 Ba õfa sagi naha mbanua andrõ -- fagõlõgõlõ ira wa'anaunia wa'ebolonia. Ba isu'a mbanua andrõ mala'ika faoma si'o fanu'a khõnia, ba fa'anaunia ba dua ngahõnõ a õfa ngaotu kilomete; fa'ebolo ba fa'alaw̃ania faoma ira wa'anaunia.
17 Ba me isu'a gõlinia mala'ika andrõ, ba fa'alaw̃a gõli andrõ õnõ ngafulu mete. Fanu'a nifake mala'ika andrõ no fanu'a nifake niha.
18 Ba õli mbanua andrõ tefazõkhi moroi ba gara baduri sinasa, ba banua andrõ ba moroi ba mbalaki, ohahau si mane sõrõmi.
19 Gowe danedane mbanua andrõ ba no muhaogõ faoma kara sebua bõli, oya ngawalõ. Kara danedane si fõfõna nifazõkhi moroi ba gara baduri sinasa, si dua, moroi ba gara nila, si tõlu, moroi ba gara yakuti, si õfa, moroi ba gara zamurudi,
20 si lima, moroi ba gara sefa, si õnõ, moroi ba gara delima, si fitu, moroi ba gara firusi, si w̃alu, moroi ba gara rana sefaka, si siw̃a, moroi ba gara tofa, si fulu, moroi ba gara khirisofarasi, si felezara, moroi ba gara lazuadi, ba si felendrua ba moroi ba gara kazubu.
21 Ba bawa gõli andrõ si felendrua ba so felendrua manimani; ero sambua mbawa gõli ba tefazõkhi moroi ba zi sambua manimani. Ba ewali mbanua andrõ ba tefazõkhi moroi ba mbalaki, ohahau si mane sõrõmi si takile.
22 Ba lõ ni'ilagu Omo Lowalangi bakha ba mbanua andrõ, bõrõ me Omo Lowalangi andrõ ba ya'ia Zo'aya samõsa, Lowalangi Sabõlõ, ba Ono Mbiribiri andrõ.
23 Ba ba mbanua andrõ ba lõ moguna haga luo ba ma haga mbaw̃a, bõrõ me ihagaini ia lakhõmi Lowalangi andrõ, ba fandrunia Nono Mbiribiri andrõ.
24 Ba mowaõwaõ dania soi fefu ba hagania, ba la'ohe dania wa'akayora ira razo gõi bakha ba mbanua andrõ.
25 Ba no tebokai manõ mbawa gõli mbanua andrõ ero ma'õkhõ; lõ laduhõduhõ, bõrõ me lõ si bongi ba da'õ sa'ae.
26 Ba la'ohe dania lakhõmi awõ wa'akayo soi fefu bakha ba mbanua andrõ.
27 Niha solau ngawalõ zi lõ sõkhi, si falimolimo, ba lõ tetehegõ mõi bakha khõnia -- ba wa'adogodogo, fefu hadia zogoro niha, ba tebai manõ te'ohe bakha khõnia. Nitehegõ si mõi bakha khõnia, ha niha si no musura tõi ba mbuku Nono Mbiribiri andrõ, ya'ia Mbuku Niha Sauri.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA