Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mase iạ nakasilo langị buhu ringangu dunia wuhu. Langị humotong dingangu dunia humotonge kai něngkaghěngging, dingangu l᷊audẹ̌ e niwu.
2 Tangu iạ e nakasilọ e soa susi e, mangal᷊ene Yerusalem buhu, natěntung bọu sorga bọu anun Mawu Ruata. Soa ene seng niriahi kere sěngkatau kaghiang bawine nilẹ̌gaheng baugu ipěněnsomahẹ̌ kaghiang esẹ.
3 Mase iạ nakaringihẹ̌ tingihẹ̌ bọu kaderang kawawantugẹ̌ mẹ̌bẹ̌bera maihạ ungkuěng, "Orasẹ̌ ini katatanakengu Mawu Ruata e kai seng sěngkapẹ̌tanạ dingangu taumata! I Sie sarung mẹ̌daseng dingang'i sire, kụ i sire sarung makoạ kawanuan'E. Duata sẹ̌sane sarung ene ringang i sire kụ makoạ Duatan sire.
4 I Sie sarung měngěmụ ěllong mata wọu matan sire. Papate e semben lai tawẹ apa; kasasusa, sasangị arau kasasakị e seng sarung lai tawẹ apa. Apang nạung kal᷊imona e seng naghěngging."
5 Mase i Sie kụ mạiang su wowong kaderang kawawantugẹ̌ e něhengetang, "Orasẹ̌ ini e kěbị seng Takụ ipakariadi wuhu!" I Sie něhengetang l᷊ai si siạ angkuěng, "Bohẹko ini, u kal᷊awọu hengetang ini e kahěngang dingangu kapangimangeng."
6 Mase i Sie něhengetang angkuěng, "Seng nasueng koạ e! Iạ e kai kahumotongange ringangu pangěnsueěnge; Iạ e kai Mawu wọu panẹ̌takenge sarang pěngěnsueěnge. Apan Taumata kụ mạdou, sarung Takụ ipanginung tạ bawaehe wọu simbul᷊u akẹ makạgěllịu pẹ̌bawiahẹ̌.
7 I saing kụ makạuntung e sarung manarimạ u kěbị ene wọu Anu-Ku. Iạ e sarung makoạ Mawune, ringangu i sie sarung makoạ anạ-Ku.
8 Arawe i saing bahaning kainggạ, taha pẹ̌sunial᷊ẹ̌, matatingkaị, tahapate, tahapẹ̌sundal᷊ẹ̌, tahapẹ̌bal᷊ikụ mata, tahapaněmba mahang duata, dingangu kěbị tahapẹ̌konti, sarung iwahung su ral᷊ungu l᷊audẹ̌ putung dingangu malelang dụděllị, mangal᷊ene papate rial᷊ẹ̌ karuane."
9 Sěngkatau wọu tal᷊oarang malạekatẹ̌ pitu kụ seng měngẹ̌ngumbelẹ bokorẹ̌ pitu kụ napenẹ u lohong papahang haghine pitu kasamuriange kụ diměnta su anuku ringangu nẹ̌bera u, "Boete! Iạ e reng manodẹ u Kaghiang bawine si kau, mangal᷊ene ute makoạ kawing'u Ahus'u Domba e."
10 Tangu Rohkẹ̌ u Ruata e nẹ̌karadiahang si siạ, kụ malạekatẹ̌ e němaringang si siạ sol᷊ong pusigu wul᷊ude marangẹ-dangẹ. I sie něnodẹ u Yerusalem si siạ, soa susi e, soa ene natěntung bọu sorga, bọu Ruata e,
11 dingangu l᷊ahiansang ore kawantugu Mawu Ruata. Soa ene kụkerong kere kakerongu watung paramata, kere watu'ng yaspis matilang kere kasěnaěng.
12 Meselẹ̌ marangẹ masuwenehẹ̌ něliwung soa e, piạ pasěllangenge mapul᷊o dua kụ mạdariagạ su malạekatẹ̌ mapul᷊o dua. Suapan pasěllangenge kạbawohẹ arengu apạeweng balagẹ̌ mapul᷊o dua e kawanuan Israel.
13 Piạ pasěllangenge tatěllu kụ tụtatěngo apang pungu anging: tatěllu su sěmběkan daki; tatěllu su sěmběkan timuhẹ̌, tatěllu su sěmběkan sawěnahẹ̌, dingangu tatěllu su sěmběkam bahẹ.
14 Meselu soa ene nipětị su wowom batu pondasi mapul᷊o dua. Suapang batu pondasi e niwohekangu arengu manga rarolohang u Ahusu Domba mapul᷊o dua e.
15 Malaekatẹ̌ kụ měbẹ̌bisara ringangku e piạ těkinge sasukạ nikoạ bọu wul᷊aeng, mědeạu ipanukạ soa ene, manga pasěllangenge ringangu mesele.
16 Soa ene tangu nẹ̌buku ěpạ, kụ nandụ e mẹ̌sul᷊ungu wěnahe. Tangu malaekatẹ̌ ene něnukạ e soa e ringangu těking sasukạ e; nal᷊ahẹ e nandụ e ute 2400 su kilone; běnahe ringangu rangẹ e mẹ̌sul᷊ungu nandụ e.
17 Piạ e malạekatẹ̌ e nanukạ meselẹ̌, nal᷊ahẹ e u kai marangẹ u meselẹ̌ e ěnnungu pul᷊o su metere. Sasukạ kụ piněnukạ u malạekatẹ̌ e ute kai sasukạ pinanukạ u taumata.
18 Meselu soa e nịkakoạ bọu watu'ng yaspis, arawe soane hala e wọu wul᷊aeng sahị, matilang kere kasěnaěng.
19 Manga watung pondasing soa ene e nilẹ̌gahengu patikụ haghing batu paramata. Batu pondasi humotonge nikoạ bọu watung yaspis, kụ karuane ute wọu watung nilam, katěllune wọu watung yakut, kaěpạ e wọu watu zamrud,
20 kal᷊imane wọu watu baiduri Sepah, kaěnnunge wọu watun dělima, kapitune wọu watun ratna cěmpaka kual᷊une wọu watum beril, kasione wọu watun Topas, kapul᷊one wọu watung Krisopras; kapul᷊oěsane wọu watung Lazuardi; kapul᷊o duane wọu watung amethist.
21 Pasěllangeng mapul᷊o dua e nariadi wọu mutiara mapul᷊o dua, apan tukade nikoạ bọu mutiara pẹ̌sěmbaụ. Dal᷊eng su soa ene nikoạ bọu wul᷊aeng sahị, matilang kere kasěnaěng kụkerong.
22 Iạ e tawe nakasilo Wal᷊em Mawu su ral᷊ungu soa ene, batụu Wal᷊em Mawu e ute kai Mawu sẹ̌sane. Duata Limembong Kawasa, ringangu Ahusu Domba e.
23 Soa ene ute tawe wahal᷊uasu tualagengu matangěllo arau wul᷊ang, batụu kawawantugu Mawu Ruata e mạnualagẹ̌, dingangu Ahusu Domba e kai sol᷊one.
24 Manga wansa su dunia e sarung dumal᷊eng su ral᷊ungu tualage, dingangu manga ratu e mal᷊aing sarung měmpẹ̌bawa kakakalạ i sire sol᷊ong dal᷊ungu soa ene.
25 Manga pasěllangengu soa ene e sarung mawuka kanandụeweng ěllo; tawe sarung hěpingang, batụu sene tawẹ apa hěbine.
26 Kasěllahẹ̌ dingangu kakakalạ u manga bansa e sarung bawaěng sol᷊ong dal᷊ungu soa ene.
27 Arawe taumata kụ měmpẹ̌kẹ̌koạ hal᷊ẹ̌ kụ makạdarěnting, arau taumata kụ měmpẹ̌kẹ̌konti -- nimbụe walạewe apa kụ kotorẹ̌ e, měngkatewe kumbahang-kumbahang masuẹ̌ su ral᷊unge. Makakasuẹ̌ ute kětạeweng taumata kụ arenge kạbawohẹ su ral᷊ungu Bukẹ̌ u Taumata Wiahẹ̌, bukẹ̌ u Ahusu Domba e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA