Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bọu ene iạ nakasilo malaẹkatẹ̌ sěngkatau natěntung bọu sorga. Su l᷊imane kạl᷊ahěgo kakunsị tigal᷊ụ u papate ringangu hante masaria sěmbua.
2 Mase i sie něnamẹ nagạ ene, kụ kai těmpu maghurang, -- kụ nạung kai setang arau rohkẹ̌ dal᷊akị e -- kụ nihantene ghěnangu sěhiwu su taunge karěngụ e.
3 Bọu ene malạekatẹ̌ e něhipeng nagạ ene sol᷊ong dal᷊ungu tigal᷊ụ u kawawinasa, mase nisukunge tigal᷊ụ ene kụ nisegelange, tadeạu nagạ e sen tawe makapěngakal᷊ẹ̌ patikụ umatẹ̌ e těntal᷊ang tempo sěhiwu su taunge tanạpaghohẹ̌. Bọu ene i sie harusẹ̌ ipěllọ gěnnangu kadodọ tempo.
4 Mase iạ nakasilo manga kaderang kawawantugẹ̌, dingangu i sire apang kumakaiange sene, nionggotangu kawasa waugu měmpěnawong hukumang. Iạ e mal᷊aing nakasilo himukud'u taumata apan seng bọu nipotọ těmbọ i sire puhinengu i sire mẹ̌sẹ̌sahiding Mawu Yesus, dingangu měmpěngẹ̌ngekeng hengetangu Ruata. I sire ene tawe měmpěnaněmba binatang, arau mangạewe tul᷊adane. I sire e mal᷊aing tawe němpạnarimạu tatialan binatang e su rěhụ arau su l᷊iman sire. Tangu i sire saụ němpẹ̌biahẹ̌ kapia kụ němpẹ̌parenta kere sěngkatau ratu ringang'i Kristus karěngụeweng sěhiwu su taunge.
5 Seng ini e kahumotongangu taumata nate e nipẹ̌bangung kapia. (Arawe taumata apang nate wal᷊ine ute tawe saụ niapẹ̌biahẹ̌ kapia karěngụeweng sěhiwu su taunge.)
6 Kariangkamang su taumata kụ apang niapẹ̌biahẹ̌ kapia ringang su pẹ̌bawangung humotonge. Su tampạ e wue i sire makoạ tataghuanengu Ruata. Papate su karuan sul᷊ene e tawe makapẹ̌kapura si sire. I sire kai sarung měngkakoạ manga imangu Mawu Ruata ringangu manga imang i Kristus; kụ i sire sarung sěngkapẹ̌parenta ringange sěhiwu su taunge karěngụe.
7 Ene tempo sěhiwu su taunge nal᷊iụ e, setang e sarung illěsọ bọu ral᷊ungu tahungkụ e,
8 kụ i sie sarung dumal᷊eng měmitaugẹ̌ kal᷊awọu umatẹ̌ kụ nasawuhẹ̌ su kaguwạu dunia e, kụ kai tau Gog dingangu Magog. Setang e něngomol᷊'i sire mědeạu mẹ̌sekẹ, kụ dekenange ute enẹewe mal᷊awọ-l᷊awọ, kere kal᷊awọu ěnne su apeng.
9 Tangu i sire měngkatewe němpẹ̌sal᷊iawuhẹ̌ su kạguwạu dunia e mase němpẹ̌liwung pẹ̌darasengangu kawanuan Duata ringangu soa ikẹ̌kěndagu Ruata. Kutẹu putunge kai natěntung bọu l᷊angị kụ něnahabẹ̌ si sire sarang nasue nupu.
10 Bọu ene setang kụ namitaugẹ̌ si sire e, niwahung sol᷊ong dal᷊ungu l᷊audẹ̌ putung dingangu malelang. Kụ kai ěndaịse tampạu binatang dingangu mahang nabi e nihipe kakal᷊imonaěng e. I sire sarung sigěsakeng ěllo hěbi waugu sarang marěngụ-děngụ.
11 Ene iạ nakasilo kạderang kawawantugẹ̌ masaria sěmbaụ kụ i Sie kụkaiang su wowone. Langị dingangu dunia e mapaghohẹ̌ bọu těngone, hakịu seng tawe ikasasilo saụ.
12 Dingangu iạ nakasilo taumata apang nate e, gaghuwạ darodọ, mạhundarisị su těngong kaderang kawawantugẹ̌ ene. Tangu manga bukẹ̌ e niwingkahẹ̌. Mase bukẹ̌ sěmbaụ l᷊ai wal᷊ine niwingkahẹ̌, kụ kai nạung Bukẹ̌ u Taumata Wiahẹ̌. Bọu e hukumang ninawo su taumata nate, nipẹ̌bewẹeweng kakanoạ i sire, timuhụewe kere mạbawohẹ su ral᷊ungu manga bukẹ̌ ene.
13 Bọu ene tangu l᷊audẹ̌ e něnarakangu taumata nate apang su ral᷊unge. Papate ringangu Dunia'm Papate e mal᷊aing něnarakangu apan taumata nate kụ ene su ral᷊unge. Kụ kěbị apan taumata nate e ninawoěngu hukumang nipẹ̌bewẹeweng kakanoạ i sire.
14 Bọu ene tangú Papate ringangu Dunia'm Papate e nirěmmẹ e su ral᷊ungu l᷊audu putung. (L᷊audu putung ini e ute kai papate su karuan sul᷊ene.)
15 Taumata apan ta nawohẹ arenge su ral᷊ungu Bukẹ̌ u Taumata Wiahẹ̌ e, nirěmmẹ sol᷊ong dal᷊ungu l᷊audu putung.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA