Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me no aefa da'õ ba u'ila samõsa mala'ika si mõi mitou moroi ba zorugo. Ba dangania no igogohe nono kusi mbawa danõ fa'amate awõ rate sebua.
2 Ira'u naga andrõ, ulõ satua, ya'ia Gafõkha ba ma satana -- ba irate, hõnõ fakhe wa'ara.
3 Aefa da'õ itibo'õ naga andrõ mala'ika ba mbawa danõ fa'amate, ba iduhõ mbawa danõ fa'amate andrõ ifotandro, ena'õ bõi sa'ae ifaelungu fefu soi naga andrõ, fatua lõ sahori zi hõnõ fakhe andrõ. Ba na no aefa da'õ lõ tola lõ te'efa'õ ia ba lõ arara.
4 Ba u'ila dadaoma, niha si dadao yaw̃a ba dadaoma andrõ, tebe'e khõra wa'abõlõ ba wangetu'õ huku. U'ila gõi noso niha si no mutaba hõgõ ba wamaduhu'õ Yesu, ba ba wanuriaigõ turia soroi Lowalangi. Ba lõ sangalulu niha da'õ ba gurifõ, he gõi ba nadunia. Lõ irai latema dandra gurifõ andrõ ba gangangora ba ma ba dangara. Ba auri ira wangawuli ba mamatõrõ ira si mane razo awõ Keriso hõnõ fakhe wa'ara.
5 Da'e wemaoso niha si mate si fõfõna andrõ. (Niha si mate tanõ bõ'õ ba lõ mu'orifi mangawuli sagõtõ zi hõnõ fakhe fa'ara andrõ.)
6 Ya'ahowu niha ni'amoni'õ si fao ba wemaoso si fõfõna andrõ. Ba lõ ifatõrõ ira fa'amate si mendrua andrõ. Tobali dania ira ere khõ Lowalangi, ba ere khõ Keriso; ba mamatõrõ dania ira awõ-Nia hõnõ fakhe wa'ara.
7 Na no awai zi hõnõ fakhe fa'ara, ba te'efa'õ dania Gafõkha moroi ba gurungania,
8 ba mõi ia dania ba wamaelungu soi fefu si no muzawili ba gulidanõ ma'asagõrõ, ya'ia Gogi ba Magogi. I'owuloi ira Afõkha ba wanuwõ, sato sibai, mane fa'oya nene ba mbewe nasi.
9 Ba muzawili ira misa ba daludanõ, ba lafa'u'u golombasew̃a mbanua Lowalangi andrõ ba banua ni'omasi'õ Lowalangi. Ba aekhu galitõ moroi ba mbanua si yaw̃a ba wamakiko ya'ira.
10 Afõkha samaelungu ya'ira andrõ, ba tetibo'õ bakha ba mbawa galitõ ba balera. Ba da'õ naha tetibo'õ gurifõ awõ zama'ele'õ sofaya andrõ. Ba bongi ma'õkhõ tefakao dania ira lõ mamalõmalõ irugi zi lõ aetu.
11 Me no aefa da'õ ba u'ila sambua dadaoma safusi sebua ba si dadao yaw̃a khõnia. Ba taya mbanua si yaw̃a awõ gulidanõ fõna-Nia, irege lõ oroma sa'ae.
12 Ba u'ila niha si no mate, sebua awõ zide'ide, no muzizio ira fõna dadaoma andrõ. Ba tebokai gõi mbuku. Aefa da'õ ba tebokai sambua mbuku bõ'õ, ya'ia Mbuku Niha Sauri andrõ. Ba ba ginõtõ da'õ tehuku zi mate andrõ molo'õ si no lafazõkhi, balazi nisura bakha ba mbuku andrõ.
13 Ba itura'õ baero asi niha si mate si so bakha khõnia. Fa'amate ba ulidanõ wa'amate gõi ibe'e baero niha si mate si so khõnia. Ba tehuku ira fefu molo'õ si no lafalua.
14 Aefa da'õ Fa'amate ba Ulidanõ Wa'amate andrõ tetibo'õ bakha ba mbaw̃a alitõ. (Baw̃a galitõ andre no fa'amate si mendrua.)
15 Niha si lõ musura tõi bakha ba Mbuku Niha Sauri andrõ, ba tetibo'õ bakha ba mbaw̃a alitõ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA