Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ui nenier teh seburur melaikat netemurun rat bang langit luk ngimet taka tanga' lubang luk na miak teriin kidalemneh ineh, idi inan aceh kaling luk rayeh bang paladneh.
2 Ieh nengakem galau ineh, ieh ineh menipeh luk mengered luk titen Iblis idi Sétan, idi nengaling neneh meribu lak kinioneh.
3 Melaikat ineh nenala' neneh bang lubang luk na miak teriin kidalemneh, idi nengitek lubang ineh, idi nenganau' etu luunneh, pad ieh na miak ngeraruh pupu-pupu teh pad mabud meribu lak ineh. Muci ratnan ineh na miak na ieh puatin bang segageh mo' kinioneh.
4 Idi ui nenier tuda'-tuda' kerusi, idi inan lemulun luk tudo luundeh, idi kuandeh ineh pangeh biré lalud ngukum. Idi teh ui nenier niat lemulun luk kileb uluhdeh ngaceku maré kali' ratnan Yésus idi bala Allah. Ideh na nesembayang inan pung ineh idi akangneh, idi ideh na inan etu nan madu'deh idi bang paladdeh. Idi ideh ineh mo' luk muli' mulun idi ngimet pad-pad dengan Keristus meribu lak kinioneh.
5 (Iamo' lun naté luk baken ineh na netumui kareb nateh mabud meribu lak ineh.) Idi ini tui luk pun-pun.
6 Mawang niat idi samal kuan lemulun luk semuet bang babpat tui luk pun-pun ineh. Até luk kedueh ineh na miak melalud pa luundeh, iamo' ideh mangun ku imam kuan Allah idi kuan Keristus, idi miak ngimet pad-pad denganNeh bang meribu lak kinioneh.
7 Idi kareb mabud meribu lak ineh, idi Sétan ineh pana' miak puatin rat bang lubangneh,
8 idi ieh miak amé' ngeraruh pupu-pupu luk urap aput tana', ieh ineh Gog idi Magog. Iblis miak ngamung pupu-pupu ineh pad ideh pebunu'. Idi ula'deh ineh mepad kudeng bada luk tangeb abpa' rayeh.
9 Idi ideh nurap aput tana' idi nengelibut su luk inan baweh pupu Allah idi bawang luk inan Allah mawa ineh. Iamo' apui rat déi' langit netemurun nengeseb nedeh.
10 Idi Iblis luk nengeraruh nedeh pana' tila' bang takung apui idi batu apui ineh, su luk inan pung idi nabi luk mebalih ineh pangeh tila', idi ideh uen ngedereh tebaco kedangan macing ruked-ruked.
11 Idi ui nenier aceh kerusi rayeh luk mebuda' idi Luk tudo luunneh ineh. Tana' idi langit netutu' rat pa kiungNeh, pad ineh na miak siren teh.
12 Idi ui nenier amung-amung lemulun luk naté, do' luk rayeh idi luk isuut pana', tuped pa atun kerusi ineh. Surat-surat pana' inukab; idi inan aceh surat luk baken inukab, ieh ineh surat ulun. Idi lun luk naté ineh inukum maya' kekamendeh luk inayud bang surat-surat ineh.
13 Idi abpa' rayeh pana' nengeruat amung-amung lemulun luk pangeh naté bang neneh. Idi até dengan su inan até ineh pana' nengeruat amung-amung lemulun luk pangeh naté bang nedeh. Idi ideh ineh inukum maya' kekamen anid-anid bururdeh.
14 Idi até idi su inan até ineh pana' tila' bang takung apui ineh. Takung apui, ieh ineh até luk kedueh.
15 Kudeng idé-idé luk na luk idi ngadanneh inayud bang surat ulun ineh, idi ieh pana' tila' bang takung apui ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA