Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob salpu ai huidah ma sada malekat na legan, susur hun nagori atas, na markuasa na banggal, jadi isondangi hasangaponni ma tanoh in.
2 Jadi mardilo-dilo ma ia marhitei sora na maling, nini ma, “Domma madabuh, domma madabuh Babilon na bolon in, domma gabe ianan ni setan-setan ai ampa parponopan ni sagala tonduy na mabutak, pakon harang ni sagala manuk-manuk na mabutak, sihagigihononkon.”
3 Ai na dob minum do sagala bangsa humbani anggur parbangkisonni, na pagarangkon ai, anjaha raja-raja ni tanoh in marriah-riahi do pakonsi, anjaha gabe bayak do partiga-tiga ni tanoh in marhitei banggal ni hadoharonni.
4 Dob ai hubogei ma use sora na legan hun nagori atas mangkatahon: “Kaluar ma nasiam, ale bangsang-Ku, hun tongah-tongahni, ase ulang saor nasiam bani dousani, anjaha ulang dihut nasiam ihonai sitarononni.
5 Ai domma sundol ronsi langit sagala dousani, anjaha idingat Naibata do sagala hajahatonni.
6 Balaskon nasiam ma hubani romban hubani pambahenanni bani nasiam, marlompit ma balaskon nasiam na binahenni ai; marlompit ma saorhon nasiam bani panginuman, na sinaorni bani nasiam.
7 Honahon ma hubani na maborit ampa hamarsikon ansa buei ni hamuliaon ampa hamantinonni hinan. Ai nini do ibagas uhurni, ʻMarparatas do ahu songon raja naboru, sedo na mabalu ahu seng anjai idahonku pusok ni uhur.ʼ
8 Halani ai ibagas sadari do roh bani sitarononni: Hamatean, pusok ni uhur ampa lohei, dob ai tutungon ma ia bani apuy, ai na gogoh do Tuhan Naibata, na manguhumsi.
9 Tangisan anjaha doruhan ni raja-raja ni tanoh in ma ia, ai ma hasomanni marbangkis anjaha marhabutakon sanggah na ididah sidea timus ni apuy, na manutungsi ai.”
10 Mandaoh-daoh mando sidea jongjong halani biar mangidah sitarononni ai, nini, “Aih, aih, ale huta Babel na bolon in anjaha na toguh in! Ibagas sajam do mangonai uhum bam.”
11 Tangis anjaha marhoru do partiga-tiga ni tanoh on mangidahsi, halani seng dong be na mamboli boniaga ni sidea,
12 ai ma boniaga omas pakon pirak, mata intan, mutiara, hiou putih, hasumba, sitora, hiou sigerger pakon sagala hayu na misbou-misbou, pakon masam ni parugas na pinauli humbani gading, pakon parkakas na pinauli humbani hayu na maharga, humbani tombaga, bosi ampa batu marmar,
13 ambah ni ai kulit manis pakon minak na morum, hamonan, mir pakon dahupa, anggur, minak jetun, topung pakon gandum, lombu pakon biribiri, huda pakon gareta, jabolon pakon jolma.
14 Buah ni hayu pe, na hinarosuhkon ni uhurmu, mosor do hun bamu, anjaha sagala hajengeson ampa hajombuton magou do hun bamu, seng anjai jumpah be ai.
15 Halak na mantiga-tigahon ai, na dob bayak marhitei ai, jongjong do mandaoh-daoh, halani mabiar mangidah sitarononni, tangis anjaha mandoruhi, nini,
16 “Aih, aih, huta na banggal in, na marhiou hiou putih, saholat ampa hasumba, nilampis bani omas, mata intan pakon mutiara! Ibagas sajam do mahansur habayakon na sonai!”
17 Anjaha haganup kapiten ni kapal ampa halak siparlayar, halak siparhorja i kapal ampa na marpansarian hun laut, jongjong do sidea mandaoh-daoh,
18 anjaha doruh-doruh mangidah timus ni apuyni ai, nini, “Huta ja ma na songon huta na banggal an?”
19 Inahkon sidea ma orbuk bani uluni, sanggah na tangis-tangis anjaha na mandoruhi ai, nini, “Aih, aih, huta na banggal in, na mambahen bayak sagala siparkapal na i laut marhitei artani! Ibagas sajam do seda haganupan ai!”
20 Marmalas ni uhur ma pasalsi, ale nagori atas, ale halak na mapansing, apostel ampa nabi-nabi! Ai domma idabuh Naibata uhum bani halani nasiam.
21 Jadi roh ma sada malekat na gogoh mangangkat sada batu na salosung banggalni, anjaha idabuhkon ma ai hu laut, nini ma, “Sonai ma sampakkononkon huta Babel na banggal in, anjaha seng anjai jumpah be.
22 Seng tarbogei be ibagas ho sora ni parhusapi pakon sipandoding, sipartulila, pakon sipartarompit; seng jumpah be ibagas ho situkangi atap aha pe, anjaha sora hun losung pe seng tarbogei be ibagas ho;
23 anjaha sinondang ni sada palita pe lang be marsinalsal ibagas ho, anjaha sora ni siparunjuk pakon tunanganni seng tarbogei be i tongah-tongahmu. Ai partiga-tigamu do gabe halak na sangap-sangap i tanoh on, anjaha sagala bangsa kahou do ibahen uti-utianmu;
24 anjaha ibagas huta ai do jumpah daroh ni nabi-nabi pakon halak na mapansing, sonai homa daroh ni haganup na dob binunuh i atas tanoh in.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA