Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naupu *malaeka pangane notesa, nikitaku saito malaeka ntanina nanau lako ri suruga. Naoge mpuu kuasana, bo lako ri karemena njumangu dunia nareme.
2 Nongaremo ia ante suara namangga, "Nageromo! Nageromo ngata mbaso Babel! Nompamula sii-sii ngata haitu majadi ponturo nu *seta-seta, bo ponturo mpengaya-ngaya anu nadaa, bo ponturo mpengaya tonji naruto anu nipovuu mata nu manusia.
3 Nageromo ngata Babel sabana tupu ngata Babel nompakeni tona lako ri njumangu dunia nanginu panginu napai anu nepakalangu. Batuana, nipakenira tona mompasiala pokainggura nadaa bo nabuga. Pura-pura magau ri dunia nompasiala pokaingguna nabuga. Bo topopagoli-topopagoli ri dunia najadi nakalumana puramo sabana nompobalu mpengaya-ngaya mbara-mbara nasuli ka tupu ngata Babel anu ledo ria kabasa-basana."
4 Naupu haitu, niepeku suara ntanina lako ri suruga nanguli, "Umba komiu, topangoseaka Yaku. Pesuvumo komiu lako riara ngata hitu! Nee ratuntunimiu dosa-dosa ntupu ngata hitu ala pehuku rapambela ka ira ledo mambela komiu!
5 Sabana, nadea mpuumo dosara haitu, notumuvu sampe nakava ri langi. Bo sii-sii kadaara nipeinta nu Alatalamo.
6 Jadi povia munimo ka tupu ngata hitu nasimbayu mpo nipoviara ka tona ntanina. Balasimo ira ronggani kadeana lako ri pura-pura pokainggura nadaa. Isimo bodara ante panginu ronggani kapaina pade panginu nipakasadiara ka tona ntanina.
7 Pakasadia ka ira pepandasa bo kasusa masipato nte pokainggura nompakalanga rara bo mompebasa-basa kasana karora mboto. Sabana, ira bate-batena notesa riara ntaira ivei: 'Yaku hii natuvu mpo madika. Yaku ledo timbala, bo yaku ledo ntoto mombarasai kasusa bo kapari.'
8 Sabana haitu, riara saeo ira rarumpa pepandasa-pepandasa evamo kamatea, kasusa rara, bo kamate ara. Ngatara haitu mapapu sanggani rakande nu apu, sabana nakuasa mpuu Tupu Alatala anu nombahuku tupu ngata haitu."
9 Magau-magau ri dunia, anu nangoseaka pokainggu ntupu ngata Babel nabuga bo nompesana-sana ante ira, tempo rakitara unu nu apu ri ngata napapu haitu, ira motumangi mpojea sabana kagero ngata haitu.
10 Ira aga meangga meantoaka nggavao manggita unu nu apu haitu, apa naeka ira rapendai kasusa anu nombarumpa ngata mbaso haitu. Ira manguli, "Oranga! Oranga! Nandasa mpuumo tupu ngata mbaso moitu, ngata Babel anu naroso mpuu! Aga riara sajaa komiu nipambela pehuku nu Alatala!"
11 Bo topopagoli-topopagoli ri dunia motumangi bo mabuku rarara mantoraka ngata Babel sabana domo maria tona mangali balu-balura.
12 Domo maria topangali bulava, salaka, vatu-vatu sinji nasuli bo mutiara nipobalura. Domo muni maria topangali pakea nitanu lako ri kae nalusu mpuu, kae sutra, kae nalei bo nakamumu nasuli. Domo maria topangali mpengaya-ngaya pareva nipovia lako ri kayu navangi bo pareva-pareva nipovia lako ri ngisi gaja bara pareva-pareva nipovia lako ri kayu nasuli alina. Bo domo maria topangali pareva-pareva nipovia lako ri tambaga, ase, bo lako ri vatu *pualam.
13 Domo maria topangali kayu momi, rampa-rampa ntanina, bo lana vangi, *mur bo *dupa. Domo maria topangali uve *anggur, lana *zaitun, labu *gando bo ose. Ivesia muni japi, bimba, jara, kareta bo tona rapobatua, domo raali ntupu ngata Babel.
14 Topopagoli-topopagoli gahaitu manguli, "Pura-pura anu nipoino raramiu domo ntoto naria. Nalipo puramo kakalumanamiu bo anu nompakasana katuvumiu, domo rakavamiu mpanjili." Topopagoli-topopagoli najadi nakalumana sabana nompobalu mbara-mbara nasuli ka tupu ngata Babel, aga meangga meantoaka nggavao manggita ngata haitu sabana maviora rarara mambela kasusa anu nombarumpa ngata haitu. Ira motumangi mpojea ante rara masusa.
15 (18:14)
16 Ira mongare-ngare, "Oranga! Oranga! Nandasa mpuumo tupu ngata mbaso moitu! Tupu ngata Babel nabiasa nompake pakea nipovia lako ri kae nalusu, bo lako ri kae nakamumu bo nalei anu niparika ramba-ramba bulava, vatu-vatu sinji anu nasuli bo mutiara.
17 Tapi aga riara sajaa kakalumana nadea mpuu haitu naropu sanggani." Bo pura-pura topompajala sakaya mbaso, ante topokarajaa riarana, bo pura-pura topesavi kapala ante pura-pura tona anu nopaelo katuvura ri tasi, meangga meantoaka nggavao manggita ngata haitu.
18 Tempo rakitara unu nu apu molumura lako ri ngata mbaso nipalabu haitu, ira mongare-ngare, "Ledo ria ngata ntanina ri dunia nasimbayu mpo ngata mbaso moitu!"
19 Ira mombakamburaka sovu ntana ri balenggara sabana kasusa rarara. Ira motumangi bo mantete bo manguli, "Oranga! Oranga! Nandasa mpuumo tupu ngata mbaso moitu! Lako ri kakalumana ntupu ngata Babel haitu, pura-pura tona naria sakayana rarantasi najadi nakalumanamo. Tapi peintamo! Aga riara sajaa naropu sangganimo pura-pura kakalumanara haitu!"
20 Bo nanguli malaeka, "Umbamo komiu toponturo ri suruga! Pakadambamo raramiu! Pakadambamo raramiu todea nu Alatala mosanggani-nggani ante suro-suroNa bo *nabi-nabiNa! Sabana, tupu ngata mbaso Babel nihuku nu Alatalamo! NibalasiNamo pokainggura nadaa nte komiu."
21 Naupu haitu nikitaku saito malaeka naroso mpuu nombaanggataka sangu vatu mbaso bo nitedakana hau rantasi. Bo niulina, "Ngata Babel ngata mbaso haitu rapakaropu sanggani, domo maria, nasimbayu mpo vatu hitu nitedaka rantasi domo rakava mpanjili.
22 Domo raepe moni musi lako nte topomore kacapi, bara moni ntopodade ri ngata haitu. Domo raepe musi ntoposuli bara topotavusi *tabue. Domo maria topande movia bara nuapa-nuapa ri ngata haitu, bo moni nu pogili domo raepe riarana.
23 Domo maria reme poindo rakita riarana, bo domo raepe suara boti langgai bo boti mombine madamba-damba. Topopagoli-topopagoli lako ri ngata haitu najadi tomaoge ri dunia. Bo ante pangisani nadaa, tupu ngata haitu nombabagiu pura-pura manusia ri dunia."
24 Tupu ngata Babel kana rahuku sabana ri ngata haitumo raa nu nabi-nabi bo todea nu Alatala nipakatitiramo. Bo raa lako ri kamate ntona ntanina pura-pura anu nipatesi riara dunia hitu kana rapasau ka tupu ngata Babel haitu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA