1 Onda intua aku'oi noko'ontong kon tobatuí malaekat ibanea noponag nongkon soroga. Kom malaekat tatua oyuíon ing kawasa inta moḷoben, bo kamulia'an nokobayag kon dunia na'a.
2 Nana'a im pinobaḷuínya: "Ain noḷabuí! Babel, kotaí moḷoben tua ain noḷabuí! Tana'a sia nobaliídon tampat in dimbuḷoí bo dimukud mita mora'at. Bo kom bonunya nobiagdon norupa-rupamai in ḷagapan inta nonajis bo inta kinodoií in intau.
3 Sim bayongan bangusa ain nonginum kon anggur ibognya inta mokotor. Raja mita kon dunia na'a ain nogaid kong kotor takinea, bo intau mita inta modagangmai kon dunia na'a nokayadon in ibognya inta diaídon kotahangan tua."
4 Bo aku'oi nokodongog kon singog ibanea nongkon soroga noguman nana'a, "ḷuaidon, umat-Ku! ḷuaidon nongkon bonunya! Simbaí mo'ikow diaídon dumudui mogaid kon dosanya mita, bo mo'itakin motanggung kon hukumannya!
5 Sin dosanya noyo-noyoguntuḷdon nodapot kon ḷangit, bo kinotoropanbií i Allah im bayongan aidnya inta mora'at.
6 Tuliíaidon ko'inia naonda im pinogogaidnya ko'i monimu; tuliíaidon kodoyowa noguntuḷ ko'inia im bayongan inta ain inaidannya. Bonuaidon palonya in o'inumon inta kodua noguntuḷ ing koboilnya nongkon o'inumon inta ain sinadianya ko'i monimu.
7 Ogoidon ko'inia in roriga bo inta mokoaíjar kong gina inta motongkai ing kobayong ing kamulia'an bo kakaya'an inta aing kinorasa'annya tontanií. Sin sia umuran moguman kom bonu ing ginanya tontanií, 'Aku'oi na'a in ratu inta momarentah! Aku'oi na'a in de'emanbií mobobaḷu; aku'oi in diaíbií mokorasa kon ajar ing gina!'
8 Lantaran soaáḷ tatuata, daí kom bonu in tosinggai tua sia koaíntugan im bodito -- panyaki, kuyang ing gina, bo malarat ing ka'anon. Bo sia pokakon in tuḷu. Sim mokawasabií ing ki Tuhan Allah inta mohakim ko'inia tua."
9 Raja mita kon dunia na'a inta no'itakin nogaid kon inta mokotor takinnya bo ibog im bobay tatua, im mongombaḷbií bo mogamui kong kotaí tatua aka mosia moko'ontong kom poyok mobunod nongkon tuḷu inta momokak ko'inia.
10 Mosia simindogbií mokopoyayuk sim mo'ondok ing koaíntugan in roriga tatua. Mosia moguman, "Ado, totokdon im mobodito kotaí moḷoben tana'a -- kotaí Babel inta moropot! Tongaí kom bonu in tojam pinopoaíidan in hukuman ko'inimu!"
11 Mododagang mita kon dunia na'a nongombaḷ doman bo noaíjar ing gina lantaran bobay tatua, sin diaídon in tobatuímai intau motaḷui kon onu inta pinotaḷui monia.
12 Diaídon im motaḷui kom buḷawan, perak, permata bo mutiara monia; kaeng moaḷus inta momahaḷ, kaeng nopars, kaeng sutra, bo kaeng inta nopura nogurang; bo norupa-rupamai im bahan inta nongkon kayu inta moḷawaídon mo'ulií, norupa-rupamaidon im bahan inta nongkon gading, norupa-rupamai domandon im bahan inta pinomia nongkon kayu momahaḷ, inta nongkon tambaga, nongkon uatoi bo nongkon batu permata.
13 Kulit ing kayu manis, pododunguí mita, bahan mita mobondu, taḷong mobondu bo kamaya, anggur bo ḷana, topong bo gandum; sapi, domba, kabaḷo bo kereta, ata mita, nodapot kon nyawa in intau.
14 Podagang mita tatua noguman kom bobay tatua, "Bayongan inta kino ibogmu diaídon onda, bo bayongan inta momewah bo inta mogagah no'inggamaídon nongkon tayowonmu. Diaí bidon mo'uliímu bui intua!"
15 Mosia inta nopotaḷui im bahan mita tatua bo inta ain nobalií no'oyuíon lantaran nopotaḷui kom bonu ing kotaí tatua, sinimindogdon iyumayuk totok, sim mo'ondok kotugatan in roriga tatua. Mosia mongombaḷ bo mobaḷu,
16 poḷat mosingog, "Adodoi ka'asiaí, totokdon moḷoben im bodito ing kotaí inta moḷoben tana'a! Biasamai sia mogiḷambung nongkon kaeng inta moaḷus, kaeng nopars, bo kaeng nopura inta noguyang; biasamai sia nopuling in hiasan buḷawan, permata, bo mutiara!
17 Ta'e tongaí kom bonu i wakutu to jam, sia ain kinobulian im bayongan kakaya'annya tatua!" Komintan kapiten kapaḷ, intau mita inta sinumakoi, bo intau mita inta nogaid kom bonu ing kapaḷ, takin bayongan intau inta totayakea kon dagat, sinimindog nongkon noyayuk.
18 Bo nomaḷuí wakutu im mosia noko'ontong kom poyok nobunod nongkon tuḷu inta nomokakak kong kotaí tatua. Mosia nomaḷuí, "Diaíbií kon dodai onda oyuíon ing kotaí ibanea naí kotaí inta moḷoben tana'a!"
19 Daí mosia nopo'ingguí in ḷobud saḷaku tanda nobaḷu. Bo mosia nongombaḷ poḷat nogamui, "Adodoi ka'asií ing kobobogat im bodito ing kotaí moḷoben tana'a! Kakaya'annya ain nokopobalií kom bayongan intau inta kopaḷ in dagat nobiag doman no'oyuíon! Ta'e tongaí kom bonu i wakutu tojam, sia kino'buliandon im bayongan yagi-yagi!"
20 Oi..soroga, koḷungangadon kong kinorimumudan ing kotaí tatua! Oi..umat i Allah, rasul mita, bo bayongan nabi koḷungangadon ing gina! Sing ki Allah ain nohukum ko'inia saḷaku tontulií in aidnya ko'i monimu!
21 Onda intua, tobatuí malaekat inta moropot, nobingkat kon tobatuí batu inta naí koḷoben ing gilingan, bo pinogambatnya kom bonu in dagat bo poḷat noguman, "Pomia'an natua ing kotaí im Babel inta moḷoben tua, pogambat koropoton sahingga in diaídon bui modungkuḷ.
22 Singog ing kecapi inta kinuti i intau mita inta mota'au mokuti bo manyanyi mita i intau inta momanyanyi, bo singog im bansií bo singog in terompet, diaí bidon kodongogan bui kom bonu ing kotaímu! Bo ahli mita mogogaid diaí bidon kodungkuḷan kon tua, sedang singog ing gilingan batu bo diaí bidon kodongogan kon tua.
23 Intau mita diaí bidon moko'ontong kom bayag in togaí kong kotaímu; bo diaíbií domandon kodongogan im poramean ponika'an kon tua. Podagangmu mita tua in intaubií mita moḷoben kon dunia na'a, bo tota'au pongonggaingmu tua im pinonguboḷmu kom bayongan intau kon dunia na'a!"
24 Babel ihukum sing kom bonu ing kota tatua kinokadapatandon duguí in nabi mita, duguí in umat i Allah, singogon makow kopoḷokon duguí im bayongan intau inta ain ilimod kon dunia na'a.

Studi Alkitab lengkap, silahkan lihat Alkitab SABDA :: Wahyu 18
Studi Alkitab mobile, silahkan lihat Alkitab Mobi :: Wahyu 18

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke