Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkai joo ngkita omo' malaeka' laen mellao jao mai suruga. Nnampui kuasa matonggo, nnarrangngi sininna lino.

² Metambami nakua, "Ro'pokmi. Ro'pokmi Babel kota matonggo. Ia tuu lako setang sola roh gaja' mari'pih lan. Messerang lan to mangrupa-rupa manuk-manuk harang to nakaba'ci tau.

³ Ro'pokmi, sanga mangkami to sininna bangsa nniso' anggoro'na, iamo to nturu' kedo gaja'na. Na ia to raja lan lino nasigaukan sala, na sininna pangdangkang sasugih-sugihna, nasaba' tangnata'tanmo to kamadoangan gaja'na to-Babel."

⁴ Ssa'ding pole' omo' gamara laen jao mai suruga nakua, "Ee, umma'-Ku'! Messunko lan mai kota Babel, danggi' mituru'i to dosana, nadanggi' midisessa sola.

⁵ Sanga ia to dosana to-Babel mangtombon ratu de' langi', Naingaranni Puang Allataala to kedo gaja'na.

⁶ Pabalahhii susi ia mpabalahhi kamu'. Pugaukki manglokkon penduan to kedo nagaukan kamu'. Patamanni isotanna to pangngisotan masarru' manglokkon penduan na ia to napasadian kamu'.

⁷ Ia to to-Babel mpakala'bih kalena na rrempun bang kasugiran. Benni kamaparrisan sola kamasussan siangga' kedona, sanga mangkadai lan penawanna nakua, 'Aku' tee raja baine mangparenta. Tangngiana' tobalu. Sikita randan langi'na' kamasussan.'

⁸ Iamo joo anna kannai abala', susinna kamasakian, kamassean penawa, karorian, na la disumpun. Sininna joo abala' sangngallora nanii mparatui Puang Allataala, nasaba' makuasa Ia la rra'tah kara-karana tolino."

⁹ Na ia to raja lan lino to mangka nasigaukan sala na tuo kala'bian sola joo baine, la nakillakki nabatingngi tooi, ke nakitai to rambunna kota Babel disumpun tindak de'.

¹⁰ Ke'deh mambela ngkitai, sanga malaja'i nakanna kamaparrisanna. Nakua, "Huu, macilakanna kota Babel matonggo na makacca', na tangdikalannai naratumo pangcallamu."

¹¹ Ia to pangdangkang lan lino masussai, anna killakkii joo baine, sanga te'damo tau nnalli balukanna.

¹² Susinna te'damo tau nnalli bulawan, salaka, batu paramata na mutiaranna. Te'da toomo nnalli kaen lenan, kaen ungu, kaen sa'beng, na kaen malea anggoro', na mangrupa-rupa kaju to majarang diampa'. Ia too to ewanan gading, na kaju masuli' digaraga, na ia too to ewanan tembaga, bassi na pualam digaraga.

¹³ Te'da toomo nnalli kadingeh canik, rampa-rampa, apa busarungngu', susinna mur na kamanynyang, anggoro' na gose', sapin na bembala', nyarang na kereta, kaunan na moi sunga'na tolino.

¹⁴ Ia to pangdangkang ngkuanni joo baine nakua, "Sininna to ewanan mukadoangngi muampui, ta'de ngasanmi, ta'de toomi to kasugiran na kamaloloanmu. Te'damo mulannampa'i."

¹⁵ Ia to pangdangkang napasugihmo joo kota, la ke'deh mambela, nasaba' malaja'i nakanna kamaparrisanna, na kumarrak masse penawanna.

¹⁶ Anna mbussanan penawanna namangkada nakua, "Huu, liwa' ia cilakanna tee kota kaissenan. Tuli mangpakean kaen lenan, kaen ungu, na kaen malea anggoro', na ia to kalena naballo-balloi bulawan, batu paramata na mutiara.

¹⁷ Apa sangjangra nata'de ngasan to kasugiranna." Sininna to tonnangah katuoan jiong tasik, susinna tompamale kappala', pangkappala', na pangjama kappala' ke'deh mambela bang.

¹⁸ Anna metamba tonna kitami rambunna to api llallei joo kota nakua, "Te'dapa ia kota susi tee matonggona."

¹⁹ Anna ala au napessamboranni de' ulunna tanda kamasussan penawanna, nametamba-tamba nakua, "Liwa' macilakanna tee kota matonggo. Kasugirannamo nasugih ngasan to tonnampui kappala' tasik. Apa sangjangra nata'de ngasan to sininna ewananna.

²⁰ Ee, kamu' jao suruga, parannu kamu' to karo'pokanna kota Babel! Ee, umma'-Na, rasulu'-Na, na nabin-Na Puang Allataala, mario parannumo kamu', sanga nabicaramo Puang na napabalahhimi to kedo gaja' mangka nagaukan kamu' tuu mati' tau!"

²¹ Mangkai joo den malaeka' mawatang nnangka' batu liwa' tonggo pada batu pelullu' gose', napellekkosanni do' tasik namangkada nakua, "Susi tee carana kota Babel to kaissenan la dipellekkosanni anna lanynya' na te'damo naladikita.

²² Te'da lalomo nadisa'ding lan to pangcu'bikan na pakkelong, passuling sola pangtarompe'. Te'da toomo la diampa' to tomacca lan, na te'damo disa'ding to oni issong torumido.

²³ Te'damo arrang palita sola pangmaroasan tobotting. Ia to pangdangkangmu liwa' kaissenan, na ia to pangngissen-issenmu mupake nnuraga sininna bangsa lan lino."

²⁴ Babel diro'pok, nasaba' lanmo dinii nnampa'i to rarana umma'-Na sola nabin-Na Puang Allataala na rarana sininna to mangkamo dibuno lan lino.

Wahyu

Video Wahyu 18

Ikuti Kami:

KONTAK | PARTISIPASI | DONASI