Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Basa ndia boema, au ita ata nusa so'da fe'ek esa kona neme nusa so'da ka mai. Ata nusa so'dak ndia koasa na ba'u na seli, de nalosa ndela-sa'an tao na basa daebafa ka lala'ena da'di mangale'dok.

² Nalo bou-bou napane'e nae, "Ana tu'u neu so! Babel matuaina ana tu'u neu so! Besak ia kota ndia da'di nitu la ma dula dale mangalau kala mamanan so. Basa manupui manggenggeok mata-matak fo hataholi a ta nahii kasa, ala leo lai dalek.

³ Nana basa leoina la linu basa angol nasa-melu manasosoa-piao na so. Mane-mane daebafa kala hohonge lon, ma manadangan manai daebafa ka lamasu'i neme sosoa-piaon fo ta nakatatakak nala fan ndia."

⁴ Boema au amanene hala fe'ek esa neme nusa so'da ka mai nae, "Kalua leona, Au hataholi kamahehele ngala lemin! Kalua meme dalek mai leona! Emi boso tunga sala-singo nala, ma boso tunga lu'a-lepa huhuku na!

⁵ Nana sala-singon nadodou losa lalai, ma Manetualain nafandele neu tatao-nono'i mangalau nala.

⁶ Taon sama na leo ana tao basan neu emi a; balas ana la'i dua soaneu basa hata fo ana tao-no'i basa ka. Isi mango na ninik nininuk fo nanala lenaheni neme nininuk fo nanasadiak soaneu emi.

⁷ Fen doidosok ma dale he'dik dede'u na sama no matua-madema ma so'da manadailenak fo nanafek neu aoina na. Nana ana ka'da nafa'da tataas esa neu aoina na nae, 'Au ia, ina manek fo mana paleta! Au ta inafalu fa; neukose au ta la'ola'di dale he'dik fa!'

⁸ Hu ka nde dede'ak ndia de ka'da nai faik esa mesa kana neukose susa-soe he'dilaus, dale he'dik ma la'andoes lapalunilan. Ma neukose ha'i naputun, nana Amak Manetualain fo manamaketu-mala'di nana nanuu koasa."

⁹ Mane-manek daebafak fo ala tunga nai inak ndia tatao-nono'i manasosoa-piao na ma inak ndia nasa sasaoana na, neukose ala kii ma makaleleu kota ndia, metema lita ha'imasu ka namasu neme ha'i fo manahotu naputu nana.

¹⁰ Neukose lapadeik leme doo ka mai, nana ala bii sila la'e doidoson. Lafa'da lae, "Awii, susa-soen ba'una seli ba'eneu kota Babel fo mabe'i-balakaik, kota fo nananita-nalelak ndia! Nai ka'da li'u esa mesa kana de o huhuku ma nananakalala'ok!"

¹¹ Basa manadangan manai daebafa kala boeo, ala kii-makaleleu ma ala falu, hu ka nde inak ndia, nana ta hapu seluk hataholi esa boen asa sila buadanga nala so'on.

¹² Ta hapu hataholi asa sila lilopilan, lilofulan, poemata, ma mutiara nala so'on. Leondiak boe, sila tema fula mangadila nala, tema pila balanggeok, tema sutra, ma tema pila sangadelak, basa ai mata-matak fo kikisa ka de'i fo hapun, bualo'as fo nanataok neme ngga'di dui mai, ma neme ai kabeli kala, neme liti, besi, ma neme batu mangadila ka mai;

¹³ ai lou makeek, bumbu-bumbu, boominik, ai daa tuuk, ma boominik; angol ma mina, ha'desopuk ma gandum; sapi ma bi'ilopo, ndala ma kaleta, ata la, lena-lenak hataholi a ani hahae na boe.

¹⁴ Manadanga nala lafa'da inak ndia lae, "Basa hata fo o hii manuun, ta kasa so, ma o maso'da mandai lenam, ma o lole-napum mopos so. Neukose o ta hapus so'on!"

¹⁵ Manadangan fo ala da'di lamasu'i so, nanahu ala dangan nai kota ndia, neukose lapadeik leme doo ka, nana ala bii sila la'e doidoso na. Neukose ala kii-makaleleu, ma ala falu,

¹⁶ boema lae, "Awii, susa-soen ba'una seli ba'eneu kota nananita nalelak ia! Biasa na ana pake bualo'a fula mangadilak, tema pila balanggeok, ma tema pila sangadelak. Biasa na ao na henuk no lilopilas, poemata ma mutiara!

¹⁷ Tehu nai ka'da li'u esa mesa kana de namopo basa su'ibeten sila la lala'ena!" Basa manaho'u ofak, penumpang, ma ofa isi la, boema basa hataholi fo tutunga-sasangan nai tasi a, lapadeik leme doo ka,

¹⁸ ma nggasi nai lelek lita ha'imasu ka namasu neme ha'i fo mana'a kota ndia. Lalo bebou lae, "Beita hapu kota fe'ek sama leo kota matuaina ia fa!"

¹⁹ Boema ala sosonu daesopuk leo langa nala lain neu, da'dileo ta'du-tana fafaluk, boema ala kii-makaleleu, ma ala nggasi-nggasi mesan lae, "Awii, susa soen ba'una seli ba'eneu kota matuaina ia! Su'ibeten tao na basa hataholi fo nanuu ofak nai tasi lai, ala da'di lamasu'i! Tehu nai ka'da li'u esa mesa kana, de kota ndia namopo basa-basan lala'ena so!"

²⁰ Hai nusa so'dak! Mamahoko-setelee neu kota ndia nakalulutu na! Hai Manetualain hataholi kamahehele nala, hataholi nadedenu kala, nabi-nabi la, mamahoko-setelee leona! Nana Manetualain hukun da'dileo babalak neu hata fo ana tao-no'in neu emi!

²¹ Basa ndia boema, ata nusa so'da kahelek esa so'u na batu esa, ba'u batu tututuk matuaina, boema ana tapan leo tasi dale neu ma nae, "Eno na leoiak, kota Babel fo nananita nalelak ndia, neukose nanatapa napane'ek, nalosa neukose ta natongo non so'on.

²² Musi kala lii na neme manamakaminak kecapi la, neme basa manamakamee kala, neme manamakaminak kinu kala ma neme manafuu pupuu kala, neukose ta nananamanenek nai o dalek so'on! Boeo neukose ta hapu hataholi manamaue-male'di malelaina nai ndia, ma batu tutu'tu ka lii na, neukose ta nananamanenek so'on.

²³ Neukose hataholi ta nita seluk banuk pila nai kota ndia dalek fa; ma neukose ta tamanene feta ka'bi nga lame nai ndia so'on. O hataholi manadanga mala nde bee na hataholi nananita-nalelak nanseli nai daebafa ka, ma no o malela makahatu ma, de o ke'dindiu ma basa leoina manai daebafa ka lala'ena!"

²⁴ Babel nanahukuk nana nai kota ndia dalek, hapu nabi la daa na, Manetualain hataholi kamahehele nala daa na so. Dede'a keke'u na, basa hataholi fo nanataonisak nai daebafa ka, daa nala.

Wahyu

Video Wahyu 18

Ikuti Kami:

KONTAK | PARTISIPASI | DONASI