Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai hubogei ma sora na maling hun rumah panumbahan ai hubani malekat na pitu ai, “Misir ma nasiam, useihon nasiam ma batil na pitu in, ianan ni ringis ni Naibata, hubani tanoh in.”
2 Jadi misir ma na parlobei ai, iuseihon ma batilni hu tanoh in. Jadi masa ma bayoh na bajan anjaha na sambor bani jolma, na dob manjalo tanda ni binatang ai anjaha sisombah gana-ganani.
3 Dob ai iuseihon na paduahon ai ma batilni hu laut; jadi gabe daroh ma ai songon daroh ni na matei, lanjar matei ma sagala na manggoluh i laut ai.
4 Dob ai iuseihon na patoluhon ai ma batilni hubani bah banggal pakon bah tubuh, anjaha gabe daroh ma ai.
5 Jadi hubogei ma malekat sigomgom bah mangkatahon, “Na pintor do Ham, na dong sonari ampa na dong hinan, Ham na mapansing, halani sonai panguhum-Mu;
6 ai iuseihon sidea do daroh ni halak na pansing pakon nabi-nabi, gabe daroh do ipainumkon Ham bani sidea; patut do ai bani sidea.”
7 Anjaha hubogei do humbani anjapanjap ai sora na mangkatahon, “Tongon, Ham Tuhan Naibata, Sigomgom haganupan, sintong anjaha pintor do uhum-Mu in.”
8 Dob ai iuseihon na paompatkon ai ma batilni hubani mata ni ari; ibere ma bani mata ni ari kuasa mammosogkon jolma in marhitei apuy.
9 Jadi mosog ma jolma in ibahen milas ni na parah ai, gabe irisai sidea ma goran ni Naibata, na markuasa bani sagala sitaronon ai; lanjar do seng ipaubah sidea uhurni laho pasangapkon-Si.
10 Dob ai iuseihon na palimahon ai ma batilni bani hotak ni binatang ai, gabe golap ma harajaonni ai, anjaha marsiharat dilahni bei ma sidea halani boritni,
11 gabe irisai sidea ma Naibata ni nagori atas ai halani boritni ampa bayoh niarou ni sidea ai, tapi lanjar do seng ipaubah sidea uhurni manadingkon parlahou ni sidea ai.
12 Dob ai iuseihon na paonomkon ai ma batilni hu Bah Eprat na banggal ai, gabe horah ma bahni, ase ipasirsir dalan ni raja-raja na hun hapoltakan ni mata ni ari.
13 Jadi huidah ma kaluar humbani babah ni naga ai pakon humbani babah ni binatang ai pakon humbani pamangan ni nabi sipakulah-kulah ai tolu tonduy na mabutak songon tiktikan.
14 Ai ma tonduy ni setan-setan na mambahen tanda-tanda, na bingkat marayak raja-raja ni sab dunia on, laho patumpuhon sidea hu parporangan bani ari na banggal ai, ari ni Naibata, Sigomgom haganupan.
15 Tonggor ma, na roh ma Ahu songon panangko. Martuah ma na jaga anjaha na manramotkon hiouni ase sirsir, ase ulang talanjang ia mardalan, gabe taridah hailaonni.
16 Jadi ipatumpu ma sidea bani sada ianan, na margoran Harmagedon bani hata Heber.
17 Dob ai iuseihon na papituhon ai ma batilni hu awang-awang, jadi tarbogei ma sora na maling hun rumah panumbahan ai, humbani paratas ai, mangkatahon, “Domma saud!”
18 Dob ai masa ma hilap, sora pakon longgur, masa ma homa lalou bolon, songon na so ongga masa, sadokah dong jolma manisia i tanoh on, lalou na sonai bolonni.
19 Jadi mabolah ma huta na banggal ai bolah tolu, mangkarumbak ma huta ni bangsa-bangsa, anjaha Babel na banggal ai pe seng ihalupahon Naibata laho painumkon hubani panginuman, na gok anggur hamarahon-Ni na banggal ai.
20 Magou ma sagala pulou, anjaha dolog pe seng dong be jumpah.
21 Anjaha madabuh ma sira-sira na banggal, boratni satalenta, hun langit bani jolma, gabe irisai jolma ma Naibata halani sitaronon humbani sira-sira ai; ai parah do sitaronon ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA