Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Terus tiang dengah suare saq belẽq lẽman dalem Gedẽng Suci Allah bemanik tipaq kepituq malaẽkat nike, "Silaq lumbar dait tumpahang isi kepituq cawan murke Allah nike ojok gumi!"

² Malaẽkat saq penembẽq lumbar, dait numpahang isi cawanne ojok gumi. Make tiwoq budun-budun saq nakutang dait bahaye lẽq selapuq dengan saq bedowẽ tande binatang nike, dait lẽq dengan-dengan saq nyembah tetatone.

³ Sesampun nike malaẽkat kedue numpahang isi cawanne ojok segare. Make aiq segare jari daraq, maraq daraq dengan ninggal, dait matẽ ẽndah selapuq mahluk saq idup lẽq dalem segare.

⁴ Beterus malaẽkat saq ketelu numpahang isi cawanne ojok kokoq-kokoq dait ojok pengembulan-pengembulan aiq, make selapuq aiqne jari daraq.

⁵ Tiang dengah malaẽkat saq bekuase lẽq aiq nike bebase, "Hukuman saq Deside turunang nike adil, Deside saq Mahesuci, Allah saq araq, dait saq sampun araq!

⁶ Sẽngaq ie pade sampun numpahang daraq dengan-dengan saq tehususang bagi Allah dait daraq nabi-nabi; mangkin Deside ngicanin ie pade nginem daraq. Mule hal nike patut umaq ie pade!"

⁷ Terus tiang dengah suare lẽman mẽje taoq kurban, "Ya Allah, Tuhan Saq Mahekuase, kenaq dait adil selapuq keputusan Deside!"

⁸ Sesampun nike malaẽkat keempat numpahang isi cawanne ojok jelo, make jelo ẽndah teijinang ngotongang manusie siq api.

⁹ Manusie tekotongang siq panas jelo saq keras nike, dait ie pade ngutuk pesẽngan Allah, saq bekuase lẽq bencane-bencane nike. Timaq maraq nike, ie pade ndẽq mẽlẽ tobat lẽman dose-dose ie pade dait ndẽq mẽlẽ mulieang Allah.

¹⁰ Terus malaẽkat kelime numpahang isi cawanne ojok tahte binatang nike. Make selapuq kerajaan binatang nike jari peteng, dait manusie ngakoq ẽlaqne mẽsaq lantaran sakitan.

¹¹ Terus ie pade ngutuk Allah lẽq sorge lantaran ie pade sakitan dait lantaran budun-budun ie pade. Laguq ie pade ndẽq mẽlẽ ẽndah tobat lẽman perbuatan-perbuatan ie pade saq jahat.

¹² Sesampun nike malaẽkat keenem numpahang isi cawanne ojok kokoq Eprat saq belẽq nike. Make kokoq nike gero sehingge raje-raje lẽman timuq bau liwat.

¹³ Terus tiang serioq telu roh jahat saq ruene maraq lẽpang. Sopoq-sopoq lẽpang nike sugul lẽman biwih nage, lẽman biwih binatang, dait lẽman biwih nabi palsu.

¹⁴ Ie pade roh-roh sẽtan saq miaq keajaipan-keajaipan. Ketelu roh nike lalo ojok selapuq raje lẽq seantẽro dunie dait ngumpulang ie pade jari betempur lẽq jelo saq belẽq, nike jelo Allah Saq Mahekuase.

¹⁵ "Pade dengahang! Tiang dateng maraq maling! Bahagie dengan saq tetep bejage-jage dait jagaq kelambine, sehingge ie ndẽq lampaq bekelombas dait jari ilaq lẽq julun dengan luwẽq!"

¹⁶ Beterus roh-roh nike ngumpulang raje-raje nike lẽq sopoq taoq saq dalem base Ibrani aranne Harmagedon.

¹⁷ Sesampun nike malaẽkat kepituq numpahang isi cawanne ojok awang-awang. Make kedengahan suare saq belẽq lẽman tahte lẽq Gedẽng Suci Allah, "Sampun inggas!"

¹⁸ Terus araq kisap saling samber dait suare guntur saq begeruduk dait lindur saq belẽq. Ndẽq uwah araq lindur saq maraq nike lẽman manusie tecipteang. Niki lindur saq paling belẽq!

¹⁹ Kote saq belẽq nike towẽq jari telu bagian, dait kote-kote bangse-bangse saq lain ancur. Terus Allah iling lẽq Babel saq belẽq nike. Make Allah ngicanin ie nginem anggur lẽman cawan anggur murke-Ne.

²⁰ Selapuq pulao telang, dait selapuq gunung ẽndah musnah.

²¹ Ujan ẽs saq belẽq, saq sopoq-sopoq beratne sẽket kilo, geriq lẽman langit nimpe dengan-dengan. Make ie pade ngutuk Allah lantaran bencane ujan ẽs saq belẽq gati nike.

Wahyu

Video Wahyu 16

Ikuti Kami:

KONTAK | PARTISIPASI | DONASI