¹ Lepa arepkungan nga-nga sabeu ka Uman Taikamanua sipasikukua ka matadda samalaika sipitu, "Kenan kam, nupiliake kam bagat pulokat sipitu oloi golut Taikamanua nene, ka polak!"
² Iageti einangan leu et malaika siboiki, ipiliake sikukuddu ka bagat pulokat nene ka polak. Oto baranangan leu et appu sikatai besi, ka tubudda sangamberi sirimanua sibara ka tubu toggaiat tarimeu, samba ka tubudda sipaniddogi tularatnia.
³ Lepa nenda piliakenangan ka sia malaika sikarua sikukuddu ka bagat pulokatnia ka koat. Iageti bailiunangan koat nene kele logaura sirimanua simamatei. Oto mateinangan leu et sangamberi makluk sikukuddu ka bagat koat.
⁴ Lepa mitsa ei nia ka sia malaika sikatelu, masipiliake sikukuddu ka bagat pulokatnia ka pabaga-bagat oinan sambat ka sangamberi matat bubuakat. Oto ka sia sangamberinia oinan bailiu logau.
⁵ Iageti arepkungan nia ipanibo ka sia malaika sikup-kup'ake oinan nene, pele nga-ngania, "Maadil le ukuman siorak'akenennu, ale Sipunenan, Taikamanua tonemnangan le aian nia samba siturerere kababara!
⁶ Arapiliakean logaura sapaamian Taikamanua sambat logaura tai nabi; oto kineneiget kaunungan sia masilo logau. Kirenangan mateuan rasilo kele nenda!"
⁷ Lepa arepkungan nga-nga sibara ka kudduat pasija-jakat tareimeu buluakenen, sipasikukua, "Ale Tuhan, Taikamanua Sipulugege, maroipo samba maadil le ukuman siorak'akenennu!"
⁸ Lepa nenda, piliakenangan ka sia sikukuddu ka bagat pulokatnia ka matat sulu; oto obaake ka sia matat sulu, ilabo sirimanua oloinia simakope katai besi nene.
⁹ Oloi sulu nene te masilalabo sirimanua, oto kalulut nene, pateleirangan leu et onin Taikamanua, sipasikukup-kup'ake paoreat nene. Tapoi kenanen kisedda, ta leu et rababauake paatuatda, samba ta raoba masiumun'ake pulatsanan Taikamanua.
¹⁰ Iageti piliakenangan sikukuddu ka pulokatnia ka sia malaika sikalima, ka uddenan purimataat tarimeu. Oto magep-gepnangan leu et sangaliot purimataat tarimeu nene, pat sotdangan jalaira sirimanua, kopet besinia.
¹¹ Oto pateleirangan leu et Taikamanua ka manua kalulut besit tubudda sambat kalulut apputda. Tapoi bulat beri bauakera paatuatda ka galai tubudda sikatai.
¹² Lepa piliakenangan ka sia sikukuddu ka bagat pulokatnia malaika sikaenem, ka Oinan Eprat sabeu. Iageti makalanangan leu et, bulat pat oi raenungi nia tai rimata sibara ka kabelaiat sulu.
¹³ Oto itsokungan leu et, telu ketsat sikatai, kele mutubu kuret. Rababara iate, ka nga-ngan ulou simakope beunan sambat ka nga-ngan tarimeu, samba leu et ka nga-ngan nabi sipatataju.
¹⁴ Sia nene te paketsa-ketsat sikatai sibaraake pakise-kiseiet. Iageti eirangan leu et kateludda ketsat nene, ka sangaliot polak masiruruake sangamberi tai rimata, bule raei pasaggak ka Gogoi sabeu, iate Gogoi Taikamanua Sipulugege.
¹⁵ "Arep'ake! Momoi te aku kele sipananangkou! Mauktuk te sia simatarek tubu samba sipasijajago leppeinia, bailiu ta simabulutut ipuenung ele maila nia ka siberikabaga!"
¹⁶ Iageti eirangan leu et paketsa-ketsat nene masiruruake tai rimata ka sara kudduat, onin kudduat nene ka nga-ngan Ibrani iate Harmagedon.
¹⁷ Lepa nenda piliakenangan nia ka sia sikukuddu ka bagat pulokatnia malaika sikapitu, ka rusa. Iageti maarepnangan nga-nga simaron sibara ka uddenan purimataat ka Uman Taikamanua, sipasikukua, "Atulelean!"
¹⁸ Oto bara bila sitaipuaari, apakilat, samba nga-ngan leleggu apagururuu samba simakararat, samba teteu simakope katai ron. Bulat barania ka panandaat aitubaraake sirimanua, bulat ainangan ta babara teteu sabeu kele nene. Nene te sara teteu bulat simakope katai ron!
¹⁹ Laggai sabeu ragai oi telu, samba palagga-laggai ka sangaliot negara leu et kakkatai. Iageti repdemnangan laggai Babel sabeu nene Taikamanua. Kaunangan lonia anggur sibara ka pulokat anggur Taikamanua, iate anggur oloi golunia.
²⁰ Oto sangamberinia panusa-nusa tata, samba sangamberi palele-leleu leu et, tata.
²¹ Urat es leu et bele palilima ngapulu kilogram sanenia, pasaksanginangan leu et sirimanua. Iageti paloloirangan leu et Taikamanua, kalulut paoreat urat es simakope katai besi nene.