Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba urongo li sebua moroi ba Nomo Lowalangi sanguma'õ ba mala'ika andrõ si dafitu, "Mi'ae ba mifaduwa nõsi mako wõnu Lowalangi andrõ si fitu ba gulidanõ!"
2 Ba mõi mala'ika si fõfõna andrõ, ifaduwa nõsi mako khõnia ba danõ. Ba tumbu waosa sabõlõbõlõ ba fondrege wa'afõkhõ ba niha fefu si so tandra gurifõ andrõ, ba ba niha si no mangalulu ba nadunia andrõ.
3 Me no aefa da'õ ifaduwa gõi nõsi mako andrõ khõnia mala'ika si dua ba nasi. Ba tobali hulõ ndro niha si no mate nidanõ nasi, irege mate fefu zaliw̃aliw̃a si so noso ba nasi.
4 Aefa da'õ ifaduwa nõsi mako andrõ khõnia mala'ika andrõ si tõlu ba nungo nidanõ ba ba gumbu nidanõ, irege tobali do nidanõ fefu.
5 Ba urongo me iw̃a'õ mala'ika samatõrõ idanõ andrõ, "Fanguhuku nitarumõ andrõ no satulõ, Ya'ugõ Fondrege Ni'amoni'õ, Lowalangi si so, ba si no so!
6 Me no laduwagõ ndro mbanua Lowalangi ba do zama'ele'õ andrõ; iada'e ba Õfabadugõ khõra ndro. Duhu no sinangea khõra zi manõ!"
7 Ba urongo li si otarai naha wame'e sumange andrõ sanguma'õ, "So'aya, Lowalangi Sabõlõ, sindruhu ba satulõ wanguhuku andrõ khõ-U!"
8 Ba aefa da'õ ifaduwa gõi nõsi mako andrõ khõnia ba luo mala'ika si õfa, ba tetehegõ ba luo wokhozi niha ba wa'aukhunia sabõlõbõlõ andrõ.
9 Ba akhozi niha bõrõ wa'aukhunia andrõ, irege la'elifi dõi Lowalangi, samatõrõ ngawalõ wamakao andrõ. Ba hew̃a'ae si manõ, ba lõ sa'atõ omasi ira lafalalini gera'erara moroi ba horõra, ba lõ omasi ira lasuno wa'ebua Lowalangi.
10 Aefa da'õ ifaduwa gõi nõsi mako andrõ khõnia mala'ika si lima, ba dadaoma gurifõ andrõ. Ba tobali ogõmigõmi gamatõrõw̃a gurifõ ma'afefu, irege la'usu lelara niha ba wa'afõkhõ.
11 Ba la'elifi Lowalangi ba zorugo bõrõ wa'afõkhõ andrõ khõra ba bõrõ waosara andrõ. Ba lõ gõi lafalalini gera'erara moroi ba ngawalõ nifazõkhira si lõ sõkhi.
12 Me no aefa da'õ ifaduwa nõsi mako andrõ khõnia ba Nungo Nidanõ Eferata sebua mala'ika si õnõ. Ba tobali ogõ'õ nungo nidanõ andrõ irege tola latõrõ ira razo moroi ba gatumbukha.
13 Ba u'ila tõlu geheha si lõ sõkhi si hulõ dalaho, si otarai mbawa naga andrõ, ba si otarai mbawa gurifõ andrõ, ba si otarai mbawa zama'ele'õ sofaya andrõ.
14 Eheha gafõkha sa ira, samazõkhi tandra sahõlihõli dõdõ. Ba mõi geheha si tõlu andrõ khõ ndra razo fefu ba gulidanõ ma'asagõrõ, ba wangowuloi ya'ira ba wanuwõ ba Luo sebua andrõ, ya'ia Luo khõ Lowalangi Sabõlõ.
15 "Mifondrondrongo! Hulõ we'aso zanagõ we'aso-Gu! Ya'ahowu niha si lõ mamalõ mama'anõ ba sondrorogõ nukhania, fa bõi si lõ nukha ia ba wowaõwaõ ba fa bõi aila ia fõna zato!"
16 Aefa da'õ i'owuloi ndra razo eheha andrõ ba naha sotõi Hamagedo, ba li Heberai'o.
17 Me no aefa da'õ ifaduwa gõi nõsi mako andrõ khõnia ba dalu mbanua mala'ika si fitu andrõ. Ba terongo li sebua si otarai dadaoma andrõ ba Nomo Lowalangi, sanguma'õ, "No awai!"
18 Ba alua gari mbanua si lõ aetu'aetu ba fe'ugu'ugu mbanua sabõlõbõlõ, awõ ndruru danõ. Ba lõ irai alua ndruru danõ si manõ i'otarai wamazõkhi niha. Da'e ndruru danõ fondrege zabõlõbõlõ!
19 Ba aboto mbanua sebua andrõ tobali tõlu faosatõ, ba adudu mbanua ba soi fefu ba gulidanõ. Ba Itõrõ tõdõ Lowalangi Mbabilonia sebua andrõ. Awõ wa Ifabadugõ khõnia nagu moroi ba mako nagu Lowalangi -- ya'ia nagu wõnu-Nia andrõ sabõlõbõlõ.
20 Ba lõ oroma hulo fefu, ba taya gõi hili fefu.
21 Ba atoru deu kara segebua moroi ba mbanua si yaw̃a gõna niha, so lima wulu kilo fa'abua zambua. Ba la'elifi Lowalangi bõrõ wamakao deu kara sabõlõbõlõ sibai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA