Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ (12-18) Ge'enaka de 'o naga ge'ena 'ima'okode 'o ngooto ma batingoka. (13-1) Ge'enaka de tamake 'o haewani ko biasawa ngai moi 'isupu 'o ngootie. To 'ena ma taduku ngai mogiookoka de ma saeke ngai tumudiingoka. Ma taduku 'isinoi-noimi 'o tuala ngai moi, de ma saeke 'isinoimi 'isilefoka 'o ronga moi gee wisito-torou ma Jo'oungu ma Dutuka.

² 'O haewani tamake-make ge'ena ma lugo 'isoka 'o macan, de ma dou 'isoka 'o beruang ma dou, de ma 'uru 'isoka 'o singa ma 'uru. De ma haewanika ge'ena, 'o naga 'ikula to 'ena ma sirete ma guata, de ma kuasa gee 'iamo-amoko, la ma haewani ge'ena 'ipareta.

³ Ma haewani ma saeke 'o ngai tumudiingoka gee, 'o ngai moi ma dabo 'isisonge-songene ma buta ko ma etakawa, ma ma dabo ge'ena 'i'aikokau! 'O duniaka yoodumu yamoteke 'o haewani ge'ena de yamaoku kayohera-herangi.

⁴ De 'ona yosiarene 'o naga ge'ena, sababu 'ena 'ikulaka to 'ena ma kuasa 'o haewanika ge'ena. De 'ona yasuba mita 'o haewani ge'ena. 'Ona kayongosekau, "'O haewani 'iregu koi'iwa ma guata 'isoka 'o haewani ge'ena, de komoiwa moi ya'akunu yaparangi!"

⁵ 'O haewani ge'ena ma Jo'oungu ma Dutu kawosimadaka 'isibicara ma ngale 'imaie ma sala de wisito-torou ma Jo'oungu ma Dutu. 'Ena ma Jo'oungu ma Dutu wosidipidilika 'ipareta 'o mede nagi soata de modidino.

⁶ Ge'enaka de 'ena 'ikurue wisito-torou ma Jo'oungu ma Dutu de 'awi ronga, de 'awi ngii womanoa-noa, mita gee yoodumu yomanoa-noa 'o sorogaaka.

⁷ 'O haewani ge'ena ma Jo'oungu ma Dutu wosidipidilika mita yakudoti to 'una 'awi kawasa de yosikala. De 'ena yapareta 'o sagala suku, 'o sagala negara, 'o nyawa gee moi-moi manga demo yopake-pake de 'o soana 'iodumu.

⁸ 'O haewani ge'ena 'asa 'o nyawa 'o duniaka yasuba. Koyasubawa ma haewani ge'ena duga ka gee manga ronga-ronga 'isilefoku naga 'o nyawa 'o 'ahu 'ika-kakali yamake-make ma bukuoka ka 'o dunia ma koisidadiwasi 'ena. Ma buku ge'ena to Domba ma Ngowaka gee witoakokau.

⁹ Sababu ge'ena, to ngini de nia ngaukoka so tanu niosigisene 'o habari ne'ena:

¹⁰ "'O nyawa gee salingou yakitagoko, ma raiokau yakitagoko. De 'o nyawa gee salingou yakito'oma, ma raiokau yakito'oma. Ge'enau so ma Jo'oungu ma Dutu 'awi kawasa salingou yotahani de tatapu yongaku 'unaka."

¹¹ Ge'enaka de tamake 'o haewani 'iregu 'o ngai moi 'isupu 'o tonakie, ma taduku ngai modidioka 'isoka 'o domba ma ngowaka ma taduku. Ma 'ilingi 'isoka 'o naga ma 'ilingi.

¹² 'O haewani gee ma di-disiraka ge'ena ma bionoka, ma haewani moioli ge'ena yapake 'o kuasa ma amoko gee ya'eseno ma haewani ma di-disiraka ge'ena. So ma rai 'o duniaka, yakipakisaa yasuba 'o haewani ma di-disiraka ge'ena, gee ma dabo ko ma etakawa 'i'aikokau.

¹³ 'O haewani gee moioli ge'ena 'idiai 'o no-nako 'ihera-herangi. 'O nyawa 'iodumu manga bionoka 'ena 'idiai 'o 'uku 'o diwangoka 'i'uti 'o duniaku.

¹⁴ 'Ena 'isihaga 'o nyawa 'o duniaka 'iodumu de 'o no-nako 'ihera-herangi gee 'idi-diai 'o haewani ma di-disiraka ma bionoka. De 'ena 'isuloko 'ona yoodumu yodiai 'o haewani gee ma di-disiraka ma patongo, ge'ena la 'o haewani gee ma sira yato'omakau ma 'i'ahuokali.

¹⁵ 'O haewani moioli ge'ena kayosidipidilika 'isi'ahu 'o haewani ma di-disiraka ma patongo ge'ena, so 'o patongo ge'ena 'idadi 'ibicara. De ma patongo ge'ena 'isuloko la yakito'oma 'o nyawa 'iodumu gee yooluku yasuba 'enaka.

¹⁶ 'O haewani ge'ena 'isuloko 'o nyawa 'iodumika, gee 'o nyawa ma amoko bolo ko'uwa, yokaya-kaya de yosusa-susa, 'o yongosi de gee ko 'o yongosuwa, la yadawongo 'o no-nako manga giama ma giniraika bolo manga mengaka.

¹⁷ Komoiwa moi 'idadi yomadi'ija bolo yomawukunu 'o kianikia, nako 'onaka 'o no-nako ge'ena koi'iwa. Ma no-nako ge'ena la 'o haewaniou ge'ena ma ronga, bolo 'o do-doimi gee 'isiwaiti 'o ronga ge'ena.

¹⁸ Ge'enau so salingou de niabarija la niosikanako 'iodumu ge'ena. 'O nyawa yoba-barija 'asa 'idadi yasahe 'o haewani ma do-doimi ge'ena ma ngale, sababu 'o do-doimi ge'ena la 'o nyawa wimoi 'awi ronga. 'O do-doimi ge'ena la 666.

Wahyu

Video Wahyu 13

Ikuti Kami:

KONTAK | PARTISIPASI | DONASI