Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ (12-18) Naupu haitu neanggamo ule naga haitu ri bivi ntasi.(13-1) Naliu haitu nikitaku sangu binata nadaa nesuvu lako rantasi. Binata haitu notandu sapulu bo nobalengga papitu. Pura-pura tanduna naria songgo mpo *songgo magau, bo ri pura-pura balenggana nitulisi tesa-tesa nompandaente Alatala.

² Binata nikitaku haitu nolenje mpo taveve mbaso niuli *tutul, bo kadana mpo kada nu *beruang, bo sumbana mpo sumba nu *singa. Bo ule naga nombadekei karosona mboto bo gadera kamagauana bo kuasana naoge ka binata haitu.

³ Sangu lako ri pitu-angu balengga binata haitu naria bela baka oga anu rapomatena. Tapi bela haitu natoromo. Jadi pura-pura manusia ri dunia nokumaa mpuu nanggita binata nadaa haitu, bo nosimpagomo ira nangoseaka ia.

⁴ Nisombara ule naga sabana ia nombadekei kuasa ka binata nadaa haitu, bo nisombara muni binata nadaa. Niulira, "Ledo ntoto naria kasimbayuna binata hitu! Ledo ria saitoa mabia mangeva ia!"

⁵ Binata nadaa haitu nidekeika kuasa notesa, bo ia nangoe bo nompandaente Alatala. Nidekei muni ia noparenta bo novia dotana mboto talu-mpae santanga kasaena.

⁶ Jadi ia nompakalanga karona mboto, bo nompakasimbayu karona nte Alatala. Ia nanjalai Alatala, bo nipandaentena muni Gadera Kamagaua nu Alatala ri suruga bo pura-pura anu nonturo hamai.

⁷ Ia nipaloga muni mangeva todea nu Alatala bo mombadagi ira. Bo nidekei muni kuasa ka ia momparenta manusia ri njumangu dunia, haitumo tona ri pura-pura ngata, bo valaa, bo tona lako ri pura-pura basa ri dunia.

⁸ Pura-pura manusia nonturo ri dunia mombasomba binata haitu, haitumo pura-pura tona anu ledo nitulisi sangara riara Buku Katuvua dopame dunia nipajadi. Buku haitu naria nte Ana Bimba anu nipatesi.

⁹ Jadi, isema-sema naria talingana epemo pakabelo-belo tesa hitu:

¹⁰ Isema-sema nipakatantu ratavani, kana ratavani mamimo. Isema-sema nipakatantu rapatesi ante guma, kana rapatesi mamimo ante guma. Anu nopoko ri sii, todea nu Alatala kana maroo tempo nipandasa bo nee moura momparasaya.

¹¹ Naliu haitu nikitaku sangaya binata nadaa ntanina neumba lako ri tana. Binata haitu notandu randua mpo tandu nu ana bimba, tapi suarana mpo suara ule naga.

¹² Binata nadaa karanduana haitu mpo nabi niposuro nu binata nadaa pamulana. Jadi pura-pura kuasa nu binata pamulana haitu nipajala nu binata karanduana. Pura-pura manusia ri dunia nipasuuna mombasomba binata pamulana anu naria bela baka oga anu natoromo.

¹³ Binata karanduana haitu novia tanda-tanda nipokumaaka. Ri ngayo ntona pura-pura nipopanauna apu lako ri langi nanavu ri tana.

¹⁴ Nipoviana tanda-tanda haitu ante kuasa nidekei nu binata pamulana ka ia ala mombabagiu tona nonturo ri dunia. Nituduna ira movia bo mompopeangga sangu *pinoito nambaso nolenje mpo binata pamulana, anu nitimbe pakaoga tapi ledo namate.

¹⁵ Binata karanduana nidekeika kuasa mompopoinosa pinoito haitu sampe pinoito haitu namala motesa. Bo pinoito haitu momparenta isema-sema ledo madota mombasomba ia kana rapatesi.

¹⁶ Pura-pura tona nipasuu nu binata karanduana haitu ramere ri pale nggana atau ri kirera, nau tona biasa, nau tomaoge, nau tona nakalumana nau tona napakasi, nau tona najadi batua nau madika-madika.

¹⁷ Ledo ria saitoa tona namala mangali atau mompobalu nuapa-nuapa ane ledo naria tanda haitu ri palena atau ri kirena, haitumo sanga nu binata pamulana atau lamoro anu norapaka sangana haitu.

¹⁸ Kita paraluu noto ala rasanita batuana tesa pangane. Tona natau rasanina mombareke lamoro-lamoro lako ri sanga binata haitu, apa lamoro haitu nirapaka sanga manusia saito. Lamorona haitu onoatu onopulu bo aono.

Wahyu

Video Wahyu 13

Ikuti Kami:

KONTAK | PARTISIPASI | DONASI