Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ba u'ila samõsa mala'ika bõ'õ sabõlõ si mõi mitou moroi ba zorugo. No i'olohuni ia lawuo, ba no ifali hõgõnia dumi. Bawania humaga hulõ luo, ba ahenia no hulõ gehomo alitõ.

² Ba so ba dangania nga'õlu zura side'ide si no teboka. Ahenia kambõlõ ihundragõ nasi, ba ahenia kabera ihundragõ danõ.

³ Ba mu'ao ia si fao fa'ebua li hulõ zingo si'ao. Me no aefa mu'ao mala'ika andrõ, ba latema li fe'ugu'ugu mbanua andrõ si fitu.

⁴ Fa muhede sibai we'ugu'ugu mbanua andrõ si fitu, ba omasido usura, ba urongo li moroi ba mbanua si yaw̃a sanguma'õ, "Bini'õ hadia ia niw̃a'õ we'ugu'ugu mbanua andrõ si fitu; bõi sura ia!"

⁵ Ba mala'ika ni'ilagu andrõ sohundragõ asi ba tanõ, ifazaw̃a dangania kambõlõ ituturu mbanua si yaw̃a.

⁶ Ba fahõlu ia ba dõi Lowalangi sauri si rugi zi lõ aetu, sombõi banua si yaw̃a awõ danõ ba asi awõ nõsinia fefu. Imane mala'ika andrõ, "Lõ sa'ae madou'õ ginõtõnia!

⁷ Na ifoli dorofenia mala'ika numero fitu andrõ, ba Ifalua nikhoi dõdõ-Nia si tobini andrõ Lowalangi, si mane si no I'ombakha'õ khõra sawuyu-Nia, ya'ia ndra sama'ele'õ."

⁸ Aefa da'õ ba li si no muhede khõgu moroi ba zorugo andrõ, ifuli zui humede khõgu, imane, "Ae halõ nga'õlu zura si no teboka ba danga mala'ika sohundragõ asi ba tanõ andrõ."

⁹ Ba mõido khõ mala'ika andrõ ba u'andrõ ena'õ ibe'e khõgu nga'õlu zura side'ide andrõ. Imane, "Halõ, ba a da'e. Tobali afeto dania ia bakha ba dalumõ, ba ami ia ba mbawau si mane w̃e w̃ani."

¹⁰ Ba uhalõ nga'õlu zura side'ide andrõ moroi ba dangania ba u'a. Ba mbawagu hulõ w̃e w̃ani, ba me no aefa utõlõ ia, ba tobali afeto ia bakha ba dalugu.

¹¹ Aefa da'õ ba law̃a'õ khõgu, "Ombakha'õ samuza tõ zui duria Lowalangi sanandrõsa ba ngawalõ soi, negara, li, ba khõ ndra razo."

Wahyu

Video Wahyu 10

Ikuti Kami:

KONTAK | PARTISIPASI | DONASI