Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Raduni nyak ngeliak sai malaikat perkasa sai bareh regah jak surga. Ia disalok awan, rik sai runih ngelingkor di uluni. Pudakni besinar injuk matarani, rik cukutni injuk tihang apui.

² Di culukni wat sai gulungan buku lunik sai tebukak. Cukut kananni ngejepak di laok, rik cukut kirini ngejepak di darak.

³ Raduni ia beseru jama suara sai keras injuk suarani singa-singa. Radu jak malaikat udi beseru, kepitu guntor ngejawab jama suara gemuruh.

⁴ Reno kepitu guntor udi besuara, nyak haga nyatatni, kidang nyak ngedengi suara jak surga cawa, "Rahasiakodo api sai dicawako ulih kepitu guntor udi; dang nyatatni!"

⁵ Raduni malaikat sai nyak liak ngejepak di laok rik di darak udi ngiwakko culuk kananni mik langit.

⁶ Ia besumpah demi gelar-Ni Allah sai hurik selama-lamani, sai nyiptako langit, bumi rik laok rik sunyin hal sai wat di delomni. Malaikat udi cawa, "Waktuni mak haga ditunda lagi!

⁷ Kidang kik malaikat kepitu nyebu trumpetni, Allah haga ngelaksanako rencana rahasia-Ni, injuk radu Ia kabarko jama jelma-jelma sai ngebantu-Ni yakdo para nabi."

⁸ Kak raduni suara sai kudengi jak surga udi, cawa lagi jama nyak. Ia cawa, "Mikdo ngakuk gulungan buku sai tebukak di culuk malaikat sai ngejepak di laok rik di darak udi."

⁹ Maka nyak pun mik jama malaikat udi rik ngilu in ngeniko gulungan lunik udi jama nyak. Ia cawa, "Akukdo rik kanikdo inji. Di delom tenaimu ia haga jadi pahik, kidang di delom bangukmu ia metor injuk madu."

¹⁰ Nyak ngakuk gulungan lunik seno jak culukni raduni nganikni. Di banguk rasani injuk madu, kidang radu jak nyak ngebelotni, di delom tenai ia jadi pahik.

¹¹ Raduni nyak diperintahko, "Sebarkodo sekali lagi kabar-Ni Allah tentang bangsa-bangsa, negara-negara, bahasa-bahasa, rik raja-raja."

Wahyu

Video Wahyu 10

Ikuti Kami:

KONTAK | PARTISIPASI | DONASI