Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On ma pangungkabon ni Jesus Kristus, na binerehon ni Naibata hu bani, laho patuduhkon hubani juakjuak-Ni na laho podas masa; jadi isuruh ma malekat-Ni pabotohkon ai bani juakjuak-Ni, si Johannes.
2 Isaksihon do hata ni Naibata pakon hasaksian pasal Jesus Kristus, ai ma haganup na dob nididahni.
3 Martuah ma na mambasa pakon na mambogei hata ni panjahaion on, na marimbagaskon na tarsurat ibagas on, ai dohor ma panorangni.
4 Humbani si Johannes hubani na pitu kuria i Asia, Idop ni uhur ma bani nasiam pakon damei hun Bani, na dong sonari, na dob dong hinan ampa na laho roh, pakon humbani tonduy na pitu na i lobei ni hotak-Ni,
5 ampa humbani Jesus Kristus, saksi na bonar in, na parlobei tubuh humbani na matei, sigomgom sagala raja ni dunia on. Ia, na mangkaholongi hita anjaha na paluahkon hita humbani dousanta marhitei daroh-Ni,
6 na manjadihon hita gabe harajaon hamalimon bani Naibata Bapa-Ni: Bani ma hasangapon pakon hagogohon ronsi sadokah ni dokahni! Amen.
7 Tonggor ma, na roh ma Ia marhasoman hombun, anjaha idahon ni sagala mata ma Ia, sonai homa sidea na mamantom-Si; jadi mandoruh ma sagala bangsa na i tanoh on marhalani-Si. Sonai ma tongon. Amen.
8 ʻAhu do Alpa pakon Omega, Bonani pakon Ujungni,ʼ nini Tuhan Naibata, ʻNa dong sonari, na dob dong hinan pakon na laho roh, Pargogoh Na So Tarimbang.ʼ
9 Ahu si Johannes, sanina nasiam anjaha hasoman nasiam ibagas sitaronon pakon ibagas harajaon ampa ibagas hasabaron ibagas Jesus Kristus; i Pulou Patmos do ahu ijia halani hata ni Naibata pakon halani panaksihon bani Jesus.
10 Ibagas Tonduy do ahu bani ari ni Tuhan in; jadi hubogei ma i pudingku sora na maling songon sora ni tarompit,
11 na mangkatahon, “Atap aha na nididahmu, suratkon ma in bani sada buku anjaha tongoskon ma bani kuria na pitu ai, ai ma Epesus, Simirna, Pergamon, Tiatira, Sardes, Piladelpia, pakon Laodikea.”
12 Jadi marhusor ma ahu dompak sora na marsahap pakon ahu ai. Sanggah na marhusor ai ahu, huidah ma pitu parsuluhan omas.
13 Anjaha i tongah-tongah ni parsuluhan ai adong ma sada songon Anak ni Jolma, na marbaju ganjang das hu nahei-Ni anjaha na margondit omas bani tonton-Ni.
14 Lopak do ulu-Ni pakon jambulan-Ni songon ambulu ni biribiri silopak, songon salju, anjaha songon gara ni apuy do ia mata-Ni.
15 Nahei-Ni songon tombaga na ilala ibagas panloburan, sora-Ni songon parhasak ni bah banggal.
16 Ijolom do pitu bintang ibagas tangan-Ni siamun, anjaha humbani pamangan-Ni luar do podang sidua mata na marot, anjaha bohi-Ni marsinalsal songon mata ni ari sanggah hadetenganni.
17 Sanggah huidah Ia, tompas ma ahu songon na matei i lobei ni nahei-Ni. Jadi itampeihon ma tangan siamun-Ni hu bangku, nini ma, “Ulang mabiar! Ahu do Na Parlobei pakon Na Parpudi,
18 anjaha na manggoluh. Na dob matei do Ahu, anjaha tonggor ma, na manggoluh do Ahu ronsi sadokah ni dokahni, anjaha Bangku do anakkunsi ni hamatean pakon nagori toruh.
19 Ase suratkon ma na ni idahmu, ai ma na masa sonari, age na laho masa ope i pudi ni on.
20 Anjaha on do rusia pasal bintang na pitu, na nididahmu bani tangan siamun-Ku pakon parsuluhan omas na pitu in: Ia bintang na pitu in, in ma malekat ni kuria na pitu in, anjaha na pitu parsuluhan in, in ma na pitu kuria in.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA