Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isi buku inji tentang api sai dinyatako ulih-Ni Isa Almasih tentang peristiwa-peristiwa sai haga tejadi. Allah ngeni pandai jama Almasih in Ia nunjukko jama jelma-jelma sai ngebantu Allah api sai geluk haga tejadi. Almasih ngutus malaikat-Ni jama Yohanes, jelma sai ngebantu-Ni, untuk ngeni pandai peristiwa-peristiwa udi jama ia.

² Maka Yohanes pun nyeritako sunyin sai diliakni udi; rik inji laporanni tentang luhot jak Allah sai dikuatko ulih-Ni Isa Almasih liwat kesaksian-Ni.

³ Bebahagiado jelma sai ngebacako rik jelma sai ngedengiko tentang nubuat buku inji rik taat api sai tetulis di delomni. Mani mak mesaka lagi sunyinni inji haga tejadi.

⁴ Puari-puari sai wat di kepitu jemaah di daerah Asia! Nyak, Yohanes, ngeharap keti dianugerahko berkat rik sejahtera jak Allah -- yakdo Ia sai wat, sai radu wat, rik sai wat seterusni -- rik juga jak kepitu ruh sai wat di hadap takhta-Ni Allah,

⁵ rik jak Isa Almasih, saksi sai setia. Iado sai mula-mula dihurikko luot jak kematian rik Iado sai bekuasa atas raja-raja dunia. Isa mengasihi ram, rik jama kematian-Ni Ia ngebebasko ram jak dusa-dusa ram,

⁶ rik ngejadiko ram sai bangsa khusus imam-imam, sai ngelayani Allah, Bapa-Ni. Isa Almasih udido sai agung rik bekuasa untuk selama-lamani. Amin!

⁷ Liak, Ia ratong disalok awan! Sunyin jelma haga ngeliak Ia, termasuk juga tian sai radu nikam-Ni. Sunyin bangsa di bumi haga bebatui mani Ia. Ya, pasti! Amin!

⁸ "Nyakdo sai mula-mula rik sai paling akher," ani Tuhan Allah, sai wat, sai radu wat, rik sai wat seterusni, Sai Mahakuasa.

⁹ Nyak, Yohanes, puarimu sai gegoh nasib jama keti delom penderitaan sai dialami unggal jelma sai nutuk Almasih. Ram tabah menderita sebagai umat kedau-Ni. Nyak ditokko mik Pulau Patmos mani nyak nyebarko luhot jak Allah, sai dikuatko ulih-Ni Isa liwat kesaksian-Ni.

¹⁰ Pada rani Tuhan, nyak dikuasai ulih Ruh-Ni Allah, raduni nyak ngedengi suara sai keras -- injuk bunyi trumpet -- cawa di kudanku.

¹¹ Suara udi cawa, "Tulisdo api sai niku liak, rik kirimkodo buku udi jama pitu jemaah sai berikut: Efesus, Smirna, Pergamus, Tiatira, Sardis, Filadelpia rik Laodikia."

¹² Nyak ngerilong mik kudan untuk ngeliak sapa udi sai cawa jama nyak. Raduni nyak ngeliak pitu biji cukut lampu sai disani jak emas.

¹³ Di tengah-tengah cukut-cukut lampu udi cecok sai jelma sai keliakan injuk manusia. Ia makai jubah sai kejungni sampai di cukut. Di dada-Ni Ia makai salok dada emas.

¹⁴ Buok-Ni handak injuk bulu biri-biri, gegoh handakni kapas. Mata-Ni benyala-nyala injuk apui;

¹⁵ cukut-Ni mancarko sinar injuk tembaga sai disuah. Suara-Ni injuk bunyi way terjun sai balak.

¹⁶ Culuk kanan-Ni nyating pitu bintang, rik jak banguk-Ni luah sebilah pedang tajam sai bemata rua. Pudak-Ni besinar injuk matarani di rani dawah.

¹⁷ Waktu nyak ngeliak-Ni, nyak sujud di hadap-Ni injuk jelma mati. Kidang Ia ngepikko culuk kanan-Ni jama nyak raduni cawa, "Dang rabai! Nyakdo sai mula-mula rik paling akher.

¹⁸ Nyakdo Ia sai hurik! Nyak radu mati, kidang liakdo, Nyak hurik untuk selama-lamani. Nyak bekuasa atas kematian, rik atas dunia ulun mati.

¹⁹ Ulihni seno, tulisdo hal-hal sai niku liak, yakdo hal-hal sai wat tano inji, rik hal-hal sai haga tejadi kanah.

²⁰ Injido rahasia jak pitu bintang sai niku liak di culuk kanan-Ku, rik jak pitu cukut lampu emas udi: Pitu bintang udi iado para malaikat kepitu jemaah, rik pitu cukut lampu udi iado kepitu jemaah."

Wahyu

Video Wahyu 1

Ikuti Kami:

KONTAK | PARTISIPASI | DONASI