Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isi buku hitu nantesaki kajadia-kajadia anu majadi bara maipia, anu nipopaisani nu Alatala ka i Yesus Kristus. I Yesus nitudu nu Alatala mompopaisani kajadia haitu ka topangoseaka Ia ala rasanira anu domo masae majadi. Jadi i Yesus nombatudu *malaekaNa hau mompopaisani anu majadi haitu ka batuaNa i Yohanes.

² Bo yaku, i Yohanes, nompasimbayu pura-pura anu nikitaku, haitumo tesa lako nte Alatala bo anu nipopaisani i Yesus Kristus.

³ Masana mpuu tona anu mombabaca tesa-tesa niboto riara buku hitu ka todea, bo masana muni tona mangepe bo mompariara anu nitulisi riarana. Apa domo masae pura-pura kajadia nitesa ri sii mpuu-mpuu kana majadi.

⁴ Sampesuvu-sampesuvu sampomparasaya anu nonturo ri pitu ngata ri propinsi Asia . Yaku, i Yohanes, merapi komiu mantarima katinonto bo belo lako nte Alatala anu nariamo lako ri lamba pamulana, bo naria sii-sii, bo maria sampe ri kasae-saena. Bo kuperapi ratarimamiu belo bo katinonto muni lako nte papitu Nosa nu Alatala anu naria ri ngayo Gadera Kamagaua nu Alatala,

⁵ bo lako nte i Yesus Kristus. Iamo sabi anu namala raparasaya, Iamo tona paratama nipakatuvu mpanjili lako ri kamateNa. Iamo nomparenta pura-pura magau riara dunia. Ia nompotove kita bo nombakabasaka kita lako ri dosata ante raa kamateNa.

⁶ Kita nipajadiNa todea riara poparentaNa, kita nipajadiNa *topanggeni pesomba anu manggeni pesomba ka TuamaNa Alatala. Masipato i Yesus ratoiya bo rabila, bo masipato Ia momparenta sampe ri kasae-saena! Amin!

⁷ Peintamo! Ia makava nibungu kulimu. Ia rakita ntona pura-pura, nau ira anu nombatosu usuna. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!

⁸ Tupu Alatala nanguli, "Yakumo hii Pamulana bo Kaupuna. Yaku naria mamimo lako ri lamba pamulana, Yaku naria sii-sii bo Yaku batena maria sampe ri kasae-saena. Yakumo toNeliu KakuasaKu."

⁹ Yaku hii i Yohanes, sampesuvumiu sampomparasaya. Yaku nombarasai susa bo pari nasimbayu ante pura-pura topangoseaka i Yesus, bo yaku muni najadi todea riara PoparentaNa nasimbayu ante pura-pura topangoseaka i Yesus, bo yaku muni nosabara tempo nipandasa, nasimbayu ante pura-pura topangoseaka i Yesus. Yaku nitaniaka ri levuto Patmos, sabana nompatolele Tesa nu Alatala bo pepatuduki i Yesus.

¹⁰ Tempo Eo Petupu yaku nikuasai Nosa Gasa nu Alatala, bo niepeku suara lako ri puriku namangga mpuu mpo moni *ntabue.

¹¹ Suara haitu nanguli ivei: "Tulisimo anu mukita bo pakatu ka todea topomparasaya nonturo ri pitu ngata, haitumo ngata-ngata Efesus, Smirna, Pergamus, Tiatira, Sardis, Filadelfia bo Laodikia. "

¹² Nangepe haitu, neili yaku mompeintaka isema notesa ka yaku. Tempo yaku neili, nikitaku papitu kada mpoindo bulava.

¹³ Ri olo kada mpoindo haitu naria saito tona, lenjena mpo Ana nu Manusia. Baju nipasuaNa nandoe mpuu nakava ri kadaNa, bo bambaraNa nibeve bulava.

¹⁴ BalenggaNa bo buluaNa naramputi mpo kapa bo salju. Bo mataNa narega mpo vaya nu apu.

¹⁵ KadaNa nenggila mpo tambaga nitunu ri apu. Bo suaraNa namangga mpo soo nu uve oge.

¹⁶ Ri pale ngganaNa naria pitu-angu betue, bo lako ri ngangaNa nesuvu samata guma nomata ntimali anu natada mpuu. Bo lenjeNa mpo vanta nu eo natongo.

¹⁷ Nikitakupa Ia, kaliu-liu nadungga ntuobomo yaku ri ngayoNa mpo tomate. Tapi Ia nombatuu pale ngganaNa ri karoku bo nanguli ka yaku, "Nee maeka. Yakumo hii Pamulana bo Kaupuna.

¹⁸ Yakumo hii anu Natuvu. Bara ipia Yaku namatemo. Tapi peintamo, sii-sii Yaku natuvu mpanjili sampe ri kasae-saena. Yakumo nakuasa nantipale gunji kamatea bo *ponturo ntomate.

¹⁹ Jadi, tulisimo pura-pura anu nikitamu, nau anu najadi sii-sii, nau anu majadi bara maipia.

²⁰ Dopa nisanimu batuana pitu-angu betue nikitamu ri pale ngganaKu hitu bo papitu kada mpoindo bulava. Jadi kupakalanto batuana ivei: pitu-angu betue haitu nirapaka papitu malaeka anu nanggeniaka todea topomparasaya anu nonturo ri pitu-ngata. Bo papitu kada mpoindo bulava haitu nirapaka todea topomparasaya anu naria ri pitu-ngata haitu."

Wahyu

Video Wahyu 1

Ikuti Kami:

KONTAK | PARTISIPASI | DONASI