Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Halak na kinasih barang na pinaborsih, seng bulih masuk hu kuria ni Jahowa.
2 Seng bulih anak salong-salongan masuk hu kuria ni Jahowa; age bani sundut na pasapuluhkon seng bulih ginomparni masuk hu kuria ni Jahowa.
3 Seng bulih halak Amon pakon halak Moab masuk hu kuria ni Jahowa, age sundut na pasapuluhkon seng bulih masuk humbani sidea hu kuria ni Jahowa ronsi sadokah ni dokahni,
4 halani lang ialo-alo sidea nasiam marhitei ruti pakon bah bani dalan, sanggah luar nasiam hun Masir, pakon halani na iupahi sidea mangimbang nasiam si Bileam, anak ni si Beor, na hun Petor i Padang Aram laho mamurai nasiam.
5 Age pe sonai seng ra Jahowa Naibatamu mambalosi hata ni si Bileam; tapi ipahusor Jahowa Naibatamu do papa ai gabe pasu-pasu bamu, halani holong ni uhur ni Jahowa, Naibatamu mangidah ham.
6 Seng bulih pindahanmu hadameion ni sidea barang hasonangan ni sidea sadokah ham manggoluh ronsi sadokah ni dokahni.
7 Seng bulih magigi uhurmu mangidah halak Edom, ai saninamu do ia; seng bulih magigi uhurmu mangidah halak Masir, ai halak dagang do ham na ijia i tanohni.
8 Dakdanak na itubuhkon bani sidea bani sundut patoluhon, bulih do masuk hubagas kuria ni Jahowa.
9 Anggo bingkat ham hu parporangan laho mangimbang munsuhmu, maningon ramotanmu do dirimu dompak sagala hajahaton.
10 Anggo adong i tongah-tongah nasiam sahalak na butak, halani mambur bonihni borngin, maningon luar ia hu darat ni parsaranan ai, seng bulih masuk ia hubagas parsaranan ai;
11 tapi marayak golap ari paridionni ma angkulani ibagas bah, anjaha anggo domma sundut mata ni ari, boi ma ia masuk hu parsaranan ai,
12 Maningon adong bamu i darat ni parsaranan ai sada ianan, anjaha hujai ma ham hu duru.
13 Ambah ni sinjatamu maningon dong bamu sada tajak-tajak, ase anggo laho ham hu duru, hurakonmu ma sada lubang, anjaha rungkubonmu ma ginagatmu ai.
14 Ai Jahowa Naibatamu do mardalan-dalan i tongah-tongah ni parsarananmu laho paluahkon ham pakon mangondoskon munsuhmu bamu. Halani ai maningon pansing do parsarananmu, ase ulang adong Idahon-Ni na so patut i tongah-tongahmu, ase ulang surut Ia Hun bamu.
15 Seng bulih ondoskononmu sada jabolon mulak hubani tuanni, na dob lintun humbani tuanni hu bamu;
16 maningon i lambungmu, i tongah-tongahmu do ia marianan, bani ianan na pinilihni ibagas sada humbani hutamu, barang ija sidearan ninuhurni; seng bulih odaronmu ia.
17 Seng bulih dong humbani boru ni halak Israel, na mangondoskon dirini bani ugama parriah-riahon, anjaha seng bulih dong humbani anak ni halak Israel, na mangondoskon dirini bani ugama parriah-riahon.
18 Seng bulih boanonmu upah parriah-riahon barang duit boli ni baliang hu rumah ni Jahowa Naibatamu, laho manggalar atap ija utang bagah-bagahmu, ai magigi do uhur ni Jahowa Naibatamu mangidah haduasi ai.
19 Seng bulih jaloonmu bunga humbani hasomanmu, barang bunga ni duit, barang bunga ni sipanganon, barang bunga ni atap aha pe na marbunga ipapinjamkon halak.
20 Humbani halak na legan bulih do jaloonmu bunga, tapi anggo hubani hasomanmu seng bulih pabungahononmu atap aha pe, ase ipasu-pasu Jahowa Naibata sagala na jinamah ni tanganmu, bani tanoh simasukanmu bahen parbagiananmu.
21 Anggo marbagah-bagah ham hubani Jahowa Naibatamu, ulang ma ipananget-nanget ham laho manggalari ai, sai tungguon ni Jahowa Naibatamu do ai hun bamu, anjaha gabe dousa do ai bamu.
22 Tapi ambit lang marbagah-bagah ham seng dousa ai bamu.
23 Maningon ramotkononmu anjaha pasaudonmu do sagala na dob puas humbani pamanganmu, ai na dob binagah-bagahkonmu do ai humbani rosuh ni uhurmu hubani Jahowa Naibatamu, sagala na dob niluarhonmu marhitei pamanganmu.
24 Anggo masuk ham hubagas pohon anggur ni hasomanmu, bulih do panganonmu humbani buah ni anggur ai age sadiha rosuh ni uhurmu, sabosur-bosurmu, tapi sada pe lang bulih balbahulhononmu.
25 Anggo masuk ham hu sisabion ni hasomanmu, bulih do buatonmu buyur ni ai bani tanganmu, tapi seng bulih sabihononmu sasabimu hubani juma ni hasomanmu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA