Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Oreng se ekobiri otabana se la eketthok palananganna ta’ olle daddi anggotana ommadda PANGERAN.

² Oreng se lahir e lowarra neka ban sakabbinna toronanna sampe’ se kapeng sapolo, ta’ olle daddi ommadda PANGERAN.

³ Oreng Amon ban Mo’ab sarta toronanna sampe’ se kapeng sapolo ta’ olle daddi ommadda PANGERAN,

⁴ sabab reng-oreng jareya ta’ endha’ aberri’ kakan ban aeng ka ba’na e bakto ba’na badha e dhalem parjalanan kalowar dhari Messer. La’-mala’ reng-oreng jareya ngopae Bileyam, ana’na Beor dhari kottha Petor e Mesopotamia, esoro abasto ba’na.

⁵ Tape GUSTE Allahna ba’na ta’ kasokan meyarsa’agi Bileyam jareya. Sabaligga, babaston jareya bi’ PANGERAN eoba epadaddi berkat, sabab PANGERAN taresna ka ba’na.

⁶ Saabidda ba’na gi’ odhi’ ban salanjangnga, ja’ nolonge sa-bangsa jareya otaba mama’mor sa-bangsa jareya.

⁷ Ja’ nganggep kene’ ka oreng Edom, sabab oreng Edom jareya balana ba’na. Bariya keya ja’ nganggep kene’ ka oreng Messer sabab ba’na tao neng e nagarana.

⁸ Molae dhari angkadan se kapeng tello’ ban saterrossa, toronanna reng-oreng jareya olle daddi ommadda PANGERAN."

⁹ "Mon ba’na teppa’na aperrang, ba’na kodu ajauwi sabarang se bisa manajjis.

¹⁰ Mon oreng daddi najjis polana kalowar manne e bakto tedhung, oreng jareya kodu kalowar dhari parkemahanna ban neng e lowar.

¹¹ Mon la para’ compet are, oreng jareya kodu mandhi ban e bakto compet are olle abali ka parkemahanna.

¹² Ba’na kodu nyadhiya’agi kennengngan e lowaranna parkemahan kaangguy kennengnganna akemme otaba akopadhang.

¹³ Mon ba’na entara ka jadhiya, salaenna ngeba pa-apa se ekaparlo, ba’na kodu ngeba keya kaju kaangguy ngale lobang kennengnganna akopadhang ban kaangguy notobi lobang jareya.

¹⁴ GUSTE Allah asarengnge ba’na e parkemahanna kaangguy ajaga kasalameddanna ba’na ban aparenga kamennangan ka ba’na e dhalem ngadhebbi so-mosona. Daddi jaga sopaja parkemahanna ba’na teptep berse. Ja’ sampe’ badha lalakon se ta’ patot e antarana ba’na, sopaja PANGERAN ta’ adinggallagi ba’na."

¹⁵ "Mon badha dunor buru dhari lorana pas entar menta tolong ka ba’na sopaja salamedda, oreng jareya ja’ soro mole.

¹⁶ Dunor jareya olle neng e sala settonga kotthana ba’na menorot peleyanna dibi’, ban ba’na ta’ olle mabengnges ka oreng jareya.

¹⁷ Oreng Isra’il, lalake’ otaba babine’, ta’ olle daddi sondel e kowel pamojja’an se kemma’a bai.

¹⁸ Bariya keya pesse ollena nyondel ta’ olle giba ka Padalemman Socce epamajara neyat, sabab GUSTE Allahna ba’na baji’ ka sondel se badha e kowel pamojja’an se kemma’a bai, ban baji’ ka opa ollena nyondel.

¹⁹ Mon ba’na maenjam pesse ka oreng manca, ba’na olle menta budhu’. Tape mon ba’na maenjam pesse otaba kakanan otaba barang laen ka oreng sabangsana, enjaman jareya ta’ olle pentae budhu’. Toro’ parenta reya, me’ olle ba’na eberkadi bi’ GUSTE Allahna e dhalem sabarang se elakone ba’na e nagara se ekennengngana ba’na jareya.

²⁰ (23:19)

²¹ Mon badha se ejanjiyagi ba’na ka GUSTE Allahna, ja’ rot-panyorot se neptebbana janji jareya, sabab GUSTE Allah teptep nagiya janjina ba’na, ban ba’na dusa mon ta’ neptebbi janji jareya.

²² Ba’na ta’ dusa mon ta’ ajanji ka PANGERAN.

²³ Tape mon ba’na kalaban sokalella ajanji ka GUSTE Allahna, ba’na wajib neptebbi janji jareya.

²⁴ Mon ba’na teppa’na ajalan lebat e kebbun anggurra oreng, ba’na olle ngakan buwana anggurra sakencengnga ba’na bannya’na, tape ta’ olle ngeba anggur jareya ebaddhai budhak otaba baddha laenna.

²⁵ Mon ba’na teppa’na ajalan lebat e teggalla oreng se etamenne gandum, ba’na olle ngakan gandumma se epetthek bi’ tanangnga, tape ta’ olle ngetthok gandum jareya ngangguy are’."

Ulangan

Video Ulangan 23

Ikuti Kami:

KONTAK | PARTISIPASI | DONASI