Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Dilaki si nggo ikebiri ntah pe si nggo ikeret kelaminna la banci iatanken i bas perpulungen bangsa TUHAN.
2 Anak si tubuh la erkiteken perjabun, ras kerina sinursurna, seh ku sundut pesepuluhken la banci iatanken i bas perpulungen bangsa TUHAN.
3 Bangsa Amon ntah bangsa Moap, ras kerina sinursurna, aminna pe sundut pesepuluhken, la banci iatanken i bas perpulungen bangsa TUHAN.
4 Sabap sanga kam ndarat i Mesir nari la ia nggit mere kam man ras minem. Iupahina si Bileam anak Beor, i kota Petor nari i Mesopotami guna numpahi kam.
5 Tapi la ibegiken TUHAN Dibatandu si Bileam. Emaka IsalihkenNa sumpahna ndai jadi pasu-pasu erkiteken keleng AteNa man bandu.
6 Kidekah kam sada bangsa denga, ula ndigan pe isampatindu bangsa-bangsa enda, ntah erbahanca maka senang akapna.
7 Ula igombangindu bangsa Edom, sabap keluargandu denga kap e. Ula igombangindu bangsa Mesir, erkiteken i negerina kam mbarenda tading.
8 Adi sinursur bangsa si dua e, mulai i bas sundut si peteluken nari banci ia bengket ku bas perpulungen bangsa TUHAN."
9 "Sanga kam i bas ingan erkemah tupung paksa perang, jagai man bandu i bas asa kai si erbanca kam la bersih rikutken aturen agama.
10 Adi sekalak dilaki lanai bersih erkiteken ernipi ia erlua-lua i bas berngi e, arus maka ndarat ia i bas ingan erkemah e nari, dingen tading i darat.
11 Karabenna ridilah ia, janah kenca sundut matawari maka banci ia mulihken ku bas ingan erkemah.
12 Sikapkenlah sada ingan man kakus i darat ingan erkemah e.
13 Baba ciken, maka adi atendu ku ture, banci ikurukndu lubang ras itamburindu ka.
14 Jaga lah maka tetap badia inganndu erkemah e, sabap TUHAN Dibatandu ras kam i bas inganndu erkemah ngampang-ngampangi kam, gelah menang kam ngelawan musuh-musuhndu. Ula ban si la metunggung maka ula kam itadingken TUHAN."
15 "Adi sekalak budak kiam i bas mpuna nari ndahi kam mindo gelah ia ikawali, ula ulihkenndu ka ia man empuna.
16 Banci ia tading i bas kotandu si ipilihna, janah ula bahan si la mehuli man bana.
17 La banci kalak Israel pendahinna erlua-lua i bas rumah pertoton kalak perbegu, subuk ia dilaki ntah diberu.
18 Duit si icariken alu dalan si bage pe, la banci ibaba ku rumah TUHAN Dibatandu jadi penggenepi sada sumpah. Ciga ate TUHAN man kalak si pendahinna erlua-lua i rumah pertoton kalak perbegu.
19 Adi ipinjamkenndu sen ntah pangan, ntah kai gia si deban, man temanndu sapih-sapih kam bangsa Israel, ula bahan erbunga.
20 Kai si ipinjamkenndu e man bangsa si deban banci ibahanndu erbunga tapi la banci ibahanndu erbunga adi si minjam e sapih-sapih kam bangsa Israel. Ikutkenlah peraturen enda, maka TUHAN Dibatandu masu-masu kam i bas kerina si idahikenndu i bas negeri si nandangi iinganindu e.
21 Adi kam erbahan perpadanen man TUHAN Dibatandu ula pelawen-lawen nehken perpadanenndu e, sabap lalap nge ituntut TUHAN padanndu e; emaka erdosa kam adi la isehkenndu padanndu e.
22 Labo erdosa adi la pe kam erban perpadanen man TUHAN,
23 tapi adi kam jine erpadan alu ukurndu ersuruh, inget nehken padanndu e.
24 Adi kam mentas arah sada dalan i bas kebun anggur kalak, banci ipanndu buah anggur e asa besurndu, tapi la banci ibabandu tare ragandu ndarat i bas kebun e nari.
25 Adi kam mentas arah dalan i bas juma kalak, banci iputikindu pagena man gugutenndu, tapi la banci sada ngkebena pe isabindu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA