Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Tau le’baka nipasulu’ lisere’ katauanna, yareka le’baka nipolong katauanna takkuleai a’jari umma’Na Batara.
2 Tau nilassukanga natenapa na’nikka tau toana, kammayatompa sikontu jari-jarina sa’genna makasampuloa lapisi’na, takkulleai a’jari anggota umma’Na Batara.
3 Tu Amon siagang tu Moab kammayatompa jari-jarina ke’nanga sa’genna makasampuloa lapisi’, takkulleai a’jari anggota umma’Na Batara,
4 lanri tena naero’ ke’nanga assareko kanre siagang je’ne’ inung lalang pa’jappannu assulu’ battu ri Mesir. Ba’lalo nagaji ke’nanga Bileam, ana’na Beor battu ri kota Petor ri Mesopotamia, untu’ antunraiko.
5 Mingka taerokai Karaeng Allata’alanu ampilangngeri Bileam. Kabalekanna Napinrai anjo tunraya a’jari barakka’, lanri mangngamaseangi ri kau.
6 Lalang sikontu tallasa’na, tena sikali naNatulungi anjo bansa-bansaya yareka tena sikali naNapa’jari salewangang ke’nanga.
7 Teako cini’ tunai tu Edom, lanri anjo ke’nanga sari’battannu. Tea tongko cini’ tunai tu Mesir, lanri le’bakko ammantang ri pa’rasanganna ke’nanga.
8 Appakkaramula ri lapisi’ makatallua siagang jari-jarina ke’nanga akkullei a’jari anggota umma’Na Batara."
9 "Ri wattunnu sitabang a’bundu’, musti nuliliangi sikamma apa akkullea ampa’jari ra’masakko.
10 Punna nia’ tau a’jari ra’masa’ lanri assulu’na je’ne’ kebo’ katauanna ri wattunna tinro, musti nabokoi kemaya nampa pantara’ ammantang.
11 Punna lakaruemmo, musti a’je’neki siagang punna labumo alloa akkullemi ammotere’ mange ri kemaya.
12 Musti appasadiako tampa’ ri pantaranganna pakkemaanga tampa’ pa’jambangang.
13 Punna mange anjoreng, angngerangko pakkakasa’ siagang se’re pakkeke untu’ angngeke kali’bong tampa’ pa’jambangang, siagang untu’ antambungi ammotere’.
14 Karaeng Allata’alanu anrurungangko lalang ri pakkemaanga untu’ alla’langngiko siagang untu’ assareko pammetang mae ri musu-musunnu. Jari, jagai sollanna tuli matangkasa’ pakkemaannu. Teako nia’ apa-apa tenaya nasiratang ri alla’nu, sollanna tena Nabokoiko Batara."
15 "Punna nia’ ata lari battu ri karaenna nampa battu mae ri kau appala’ pa’la’langngang, teako suroi ammotere’.
16 Akkullei ammantang ri kalase’renna kotanu napilea, siagang tena nukkulle anggaukang panggaukang sekke’ mae ri ia.
17 Se’rea tu Israel, baji’ bura’ne kammayatompa baine, takkulleai a’jari pagau’ bawang ri balla’-balla’ panynyombanga.
18 Kammayatompa anjo doe’ nagappaya battu ri panggaukang bawanna, takkulleai nierang mae ri Balla’Na Karaeng Allata’alanu untu’ pa’bayara’ tinja’, nasaba’ tanangaiyai Karaeng Allata’alanu pagau’ bawanga ri balla’-balla’ panynyombanga mae ri rewataya siagang tena todong nangai wassele’ gau’ bawanga.
19 Punna assareko angnginrang mae ri bansa maraenga, akkulleko appala’ je’ne’ doe’. Mingka punna assareko angnginrang doe’ yareka kanre-kanreang yareka barang-barang maraengannaya mae ri julu bansanu, takkulleako angngalle je’ne’ doe’ battu ri ia. Turuki anjo parentaya, na Nabarakkakiko Karaeng Allata’alanu lalang sikontu apa nugaukanga ri pa’rasangang nupammantangngia.
20 (23:19)
21 Punna nia’ apa-apa nupa’janjiang mae ri Karaeng Allata’alanu, teako pamono’-monoki untu’ anrupai anjo janjinnu, lanri tuli Natuntu’na Karaeng Allata’alanu ri kau, siagang dorakako punna tena nanurupai.
22 Tena nanudoraka punna tena nu’janji mae ri Batara.
23 Mingka punna ero’ kalennu tonji nanu’janji, musti nurupai anjo janjinnu.
24 Punna sitabangko a’jappa ri koko anggoro’na taua, akkullei nukanre rappo anggoro’na siapa-siapa jaina nukaeroki, mingka takkulleai nupasse’re lalang ri karanjeng.
25 Punna sitabangko a’jappa ri koko gandunna taua, akkullei nukanre gandung nukattilika siagang limannu, mingka takkulleai nualle siagang pakkatto."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA