Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mayae Musale walora wali heere foloukoke a keleene nda heene enekei naeise, hila rabo elae halaeube yo hila rabo yambi yo naei are na hebaen-sebaen boromamile. Aei kena foise mokomambonde naei koli hara ebeijae.
2 Eyae mbemba mbemba aengkele ya-ya wali nibi mbainye orande yo na kena foise mokomamile. Naei hila rabore amminunde naeise nebei ro miyae naei foise mokomamile.
3 Rabuhine ban Yesus Wali Ondofolo Naei uwa foi naeibe Neyae bene enekei. Bukainyehike Allahle homofaene Wali Ondofolo yae Allahre nda a ukeunge: “Ware yae haranayeibote ungayete a beko yoni-yoni, Rare lon mae haraiseboke waise wanen hubawanale.”
4 Kena yae heraumayende yae Wali Ondofolore hila rabo haleyanne walora nane merau Allahle homofae isaei-isaei isaeyaende walora eyae rabo elae halemande Allah nuleungekoke a huluinye mokonde. Nebei wali mare kelewaime naeise, Allahle homofaene a faeu yoni-yoni na bere yae molaikoke.
5 Allah yae elae yemmele aei kena heraumabonde Naei kaliare no ban hee ban mokomale nane merau aei kenare aumenunde. Mayae kena mbai u mbai yae na hului na bulau wae aei Tuhan Yesus Wali Ondofolole Ako Allahre hili hebennele naeise, reyae Allahre riyanale mare hakonembombe Yesus Wali Ondofolo Naei a elelere hakonnele walora kena mbai u mbaise mokonembe nekembe.
6 (15:5)
7 Allahre bumane enainyekaende naeise, Yesus Wali Ondofolo yae mare ei ambokembe wanen maise naeise hi yae hire ei hawemembe.
8 U bene nekenayembe, Allah Naei a elele huluinye mokolere kelemmile naeise, Wali Ondofolo Yahudi yebaei bubaei yae meke. Neyae mokoungeboke Yahudi yobe naei kamehe naeise Allah yae nuleumiboke are na hele yeuboke.
9 Nane merau Yahudi ban ro miyae Allah yanekoi yase yae ei hawewaimi aerene Allahre hili hebenainyele naeise, Wali Ondofolo meke. Nebei naeise Allahle homofaene Yahudi Ondofolo kaban Daud nda a Allahre ukeunge, “Nebei aerene Yahudi ban ro miyae u nolo u kainye reyae Ware bumane ereikaenete nane merau Wa Ro foi naeise koi yae bae yae ereikote.”
10 Nane merau Allahle homofaene nda wanen molaikoke, “Yahudi ban ro miyae men, Yahudi ro miyae bele rei mai mbainye emansukelendere.”
11 Nane merau, “Mayae Yahudi ban ro miyae Tuhande bumane kaenne. Nane merau ro miyae nanemene koi bae bele yae Nare bumane kaenne.”
12 Nane merau Allahle yendo kayaalo Yesaya yae elele, “Yahudi yobe Isaite orona mena enaisonondera ro mbai enjakambonde, Yahudi ban ro miyaere mere mokommile. Naei elele are na hele inyaibondere Yahudi ban ro miyae rabo elae halenainyele yae nekenate.”
13 Allah yae mokonembe rabo elae halembe Naei elele a hului mokonde. Allahlena Roh elae walora mayae rabo elae halembe Allah nuleuboke are na hele inyaibonde naeise, reyae Allahre riyanale Naei a elelere hila rabo halaeunge yae Neyae mai kena rowenensimbe nane merau rei mai bele yae haungemembe.
14 Aka naei baeke naei, mai naeise reyae kena wauwau okoi, rabuhine ban u foi yoni-yoni helen mainya honayembe, isaei hebaen yoni-yoni are isaeyaeukoke, nane merau na hului hi yae hire kelennele.
15 Bena kelewamale are benen u bene nekenayembe naeise be rabuleubokale nda homone moloukokale, rabuhine ban Allah kena buhae aere ban mae heufekoke nane merau
16 ukeufe Yesus Wali Ondofolole kaliare Yahudi ban yo u nolo ukainye mokorele. Allahle Roh yae Allahre kena foise mokonainyele u mekaise Yahudi ban ro miyaere mokommibonde nane merau nebei yo hili era akau era wanen mae Allahre kena foise mokonainyele naeise, Allah ukeufe imam wanen mae Naei Wali Ondofololena a foi faeu foi Yahudi ban ro miyaere eremihuwende.
17 Yesus Wali Ondofolo bele mbainye nekendene, Allah ukeufe mokoimeyale kaliare embei aiko yae roweufehike kale.
18 Yesus Wali Ondofolo raei walora Yahudi ban ro miyae yaweremile Allah weumi a huluinye hakonainyele naeise, Wali Ondofololena a foi faeu foi huwamaele nane merau Allahle Roh elae yae ei aufebokene rambun emere-emere mokowale. Nebei bewate rambunde mo reyae a elerele, rambun hiwa a eyelei. Wali Ondofololena a foi faeu foi huwamaele Yerusalem yora huba raweubokale ekale nibi yo yanne Ilirikum yone huba eungemokoukokale.
19 (15:18)
20 Reyae kena koimeyale Wali Ondofolore onewainye ro miyaere mo a foi faeu foi hufelere. Nebei wanen mae hiwa yo yae ainyunuke jemaat mbainye reyae jemaat hibe arenunde belene.
21 Bukainyehike, Allahle homofaene Wali Ondofolole naeise nda wanen molaikoke, “Naei a kelaeimi yo roko mbai ei aiboi yo ijoko enainyerende nane merau Neyae keleumi are roko mbai eiboroiboi ro miyae enaisaeyembonde.”
22 Nebei kaliare mokowalene roko helen mai bokore erele naeise meungekabeukokale.
23 Ralo yae yakama yae mai bokore erelere raei kena kalebe mon ban selene. Nebeibe nda hee nekale kanina kalia mokoukokale baeufokene raei uwa mokoungehakale mai bokore erelere.
24 Reyae merau raungehikale Spanyol kanire erelere. Reyae rabo halaele nebei kulunne erewende mangkele hubaimakonde rei mai mbainye emakonde. Nebeisa Spanyolre erele naei era inyale reyae rabo halaele mayae na hului hakonsebombe.
25 Nebeibe Spanyol kanire ei mo, reyae nda hee Yesus Naei eleuboke wekeumi holona yo naei rambun arilaikoke bele Yerusalem yore roufendere.
26 Yerusalem yona Yesus Naei eleuboke wekeumi ro miyae hiwa wali rambun kalo hele wokene, jemaat-jemaat Makedonia kanina bele Akhaya kanina bele kena kaban kowate hakonaimibondere. Nebei yore inyaimile naeise rambun yoni-yoni arilaikoke.
27 Nda ro miyae kena rei mai sele yae hakonaimibondere, nana hesele naei baka ranne honole, rabuhine ban bena Allah yae Yahudi ro miyaere naeisa foi yae mokomeyeumi. Nebeisa Allah nibi mbai mokoungeboke Yahudi ban ro miyae na hului Yahudi ro miyae wanen mbai Naei foi kayee yaronate. Nebeinye Yahudi ban ro miyae na baka ranne huluinye Yahudi ro miyaere na wali rambun yoni-yoni yae hakonaimile.
28 Rambun nda yo yae arilaisikere Yerusalem yona yore isemile kalia mokorekonde riyau ufebondera, reyae kulun ufele Spanyol kanire erele. Nebei hee mangkele hubaimakonde naeise, mayae nekaube kanire erele.
29 Reyae raeisaei mai bokore erele hee, mai kalo moloungkokembe hului Wali Ondofolo raei walora na hului mokonembombe.
30 Aei Tuhan Yesus Wali Ondofolo mangkele nekaube aerene, nane merau Allahle Roh elae yeume aeise naeise kena buhae hemamile aerene, Reyae riyamale mangkele rangkele raei naeise Allahre ebeli bomanele:
31 Allah kena kole hului raei kena rei mai yae mai bokore merele nane merau mai nolone eyae kena foi u foi emansubande naeise, Allahre ebeli bonnembe Yudea kanina Allahre hila rabo ehalei holona me eisa Allah hayensekonde, nane merau nda rambun roufende kayeere Yerusalem yona Yesus Naei eleuboke wekeumi holona ro miyae na kena rei mai yae yaronaikonde.
32 (15:31)
33 Reyae ebeli banale Allah rei mai onomi foka no Kiyae mare nanemene ei haungemembe. Amin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA