Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ite saq kuat imanne harus sabar lẽq kelemahan dengan saq lemah keyakinanne. Ndaq ite cume nyenengang diriqte mẽsaq.

² Sebalikne sebilang dengan lẽq antare ite harus nyenengang angen sepadente demi kesolahanne jari neguqang imanne.

³ Sẽngaq Almasih mẽsaq nẽnten mikirang diriq-Ne mẽsaq. Lẽq Kitab Suci tetulis maraq niki, "Selapuq penghinean saq ie pade tujuang tipaq Deside, sampun nimpe tiang."

⁴ Selapuq saq tetulis lẽq Kitab Suci mule tetulis jari ngajah ite, adẽq siq ketekunan dait penghiburan saq araq lẽq tulisan-tulisan nike ite mauq pengharepan.

⁵ Semoge Allah sumber ketekunan dait penghiburan nulung side pade jari idup dalem kerukunan sesuai kance pekayunan Deside Isa Almasih.

⁶ Sehingge siq sopoq angen dait sopoq suare, side pade selapuq ngemulieang Allah, Bapa Junjungante Saq Mulie Deside Isa Almasih.

⁷ Keranaq nike side pade wajib saling nerimaq pade ẽndah maraq Almasih nerimaq side pade jari ngemulieang Allah.

⁸ Sẽngaq, pade inget bahwe Almasih sampun ngelayanin dengan Yahudi demi kebenaran Allah dait jari ngukuhang janji-janji-Ne tipaq leluhurte.

⁹ Adẽq dengan bangse-bangse lain ẽndah ngemulieang Allah lantaran rahmat-Ne tipaq ie pade. Lẽq dalem Kitab Suci tetulis maraq niki, "Keranaq nike tiang gen mulieang Deside lẽq antare bangse-bangse, tiang gen nyanyiang zabur umaq pesẽngan Deside."

¹⁰ Araq ẽndah tetulis maraq niki, "Pade begembire bareng umat-Ne, hai bangse-bangse!"

¹¹ Dait niki ẽndah, "Pade puji Tuhan, selapuq bangse-bangse! Selapuq dengan pade puji Ie!"

¹² Dait niki ẽndah saq teucapang siq Yesaya, "Gen muncul sopoq dengan lẽman keturunan Isai, saq gen mrẽntah selapuq bangse-bangse; tipaq Ie bangse-bangse gen beharep."

¹³ Semoge Allah, sumber pengharepan nike, penoqin angen side pade siq sukecite dait damẽ sejahtere sẽngaq side pade percaye lẽq Ie dait siq kuase Roh Suci side pade gen sayan kuat, belimpah-limpah siq pengharepan.

¹⁴ Semeton-semeton senamian! Tiang yakin bahwe araq luwẽq gati hal saq solah lẽq side. Side pade sampun nenaoq selapuq-selapuqne dait bau saling ajah sopoq kance lainne.

¹⁵ Laguq lẽq hal tertentu, lẽq dalem surat niki tiang peringet side pade secare teges, lantaran rahmat saq sampun teicanin lẽq tiang.

¹⁶ Allah sampun ngutus tiang jari pelayan Deside Isa Almasih tipaq dengan bangse-bangse lain, tiang nyampẽang Kabar Solah lẽman Allah tipaq ie pade adẽq ie pade bau teterimaq siq Allah jari persembahan saq husus dait tesuciang siq Roh Suci.

¹⁷ Jari, lẽq dalem Deside Isa Almasih tiang merase bangge gati siq pelayanan tiang tipaq Allah niki.

¹⁸ Tiang ndẽq bani ngeraosang saq lain kecuali napi saq sampun tepiaq siq Almasih langan diriq tiang, tugas tiang bimbing dengan bangse-bangse lain adẽqne taat lẽq Allah langan ucapan-ucapan dait perbuatan-perbuatan tiang.

¹⁹ Langan keajaipan-keajaipan saq luar biase ẽndah selapuqne nike telaksane siq kuase Roh Suci. Kabar Solah mengenai Almasih sampun tiang sampẽang tipaq dengan-dengan mulai lẽman Yerusalem dateng Ilirikum.

²⁰ Tiang anggep sebagẽ kehormatan nyampẽang Kabar Solah lẽman Allah lẽq taoq-taoq lẽq mbẽ dengan-denganne ndẽqman dengah mengenai Almasih. Sẽngaq tiang ndẽq mẽlẽ begawẽan lẽq dasar saq sampun tetoloq siq dengan lain.

²¹ Araq tetulis lẽq Kitab Suci, "Dengan-dengan saq ndẽq uwah nerimaq berite mengenai Ie, gen serioq; dait ie pade saq ndẽq uwah dengah, gen ngerti."

²² Keranaq nike tiang rimpes gati araq halangan jari jangoq side pade.

²³ Laguq mangkin pegawẽan tiang lẽq daẽrah-daẽrah nike sampun tutuq. Sampun pire taun ngonẽqne tiang melẽt gati dateng jangoq side pade.

²⁴ Laun lamun tiang liwat lẽq kote side pade dalem kelampan tiang ojok Spanyol, tiang beharep lẽq derike tiang bedait kance side pade dait beseneng-seneng seberaq kance side pade. Sesampun nike tiang beharep side pade bau nulung tiang jari ngelanjutang kelampan tiang ojok Spanyol.

²⁵ Laguq mangkin tiang kenyeke dalem kelampan ojok Yerusalem jari ngatong sumbangan umaq dengan-dengan saq tehususang bagi Allah saq araq lẽq Yerusalem.

²⁶ Sẽngaq jemaah-jemaah lẽq Makedonia dait Akaya sampun setuju jari ngebẽng sumbangan tipaq dengan-dengan miskin lẽq antare dengan-dengan saq tehususang bagi Allah, lẽq Yerusalem.

²⁷ Seneng gati angen ie pade ngebẽng sumbangan nike. Mule sepatutne ie pade nulung semeton-semeton saq miskin lẽq Yerusalem nike; sẽngaq lẽman dengan-dengan Yahudi nike dengan bangse-bangse lain sampun nerimaq berkah lẽman Allah. Jari, dengan bangse-bangse lain nike patut ẽndah nulung dengan-dengan Yahudi siq berkah-berkah saq berue barang.

²⁸ Lamun tiang sampun nyelesẽang tugas niki, dait nyerahang selapuq sumbangan, tiang gen lalo ojok Spanyol dait nyelaloq lẽq kotende.

²⁹ Lamun tiang dateng tipaq side pade, tiang yakin bahwe tiang gen dateng siq penoq berkah Almasih umaq side pade.

³⁰ Demi Junjungante Saq Mulie Deside Isa Almasih dait demi kasih Roh Suci, sanget siq tiang tunas lẽq side pade, semoge side pade bedo'e bareng kance tiang lẽq arepan Allah mengenai perjuangan tiang.

³¹ Do'eang adẽq Allah nyelametang tiang lẽman dengan-dengan saq ndẽq percaye saq araq lẽq Yudea, adẽq tugas tiang ngatong sumbangan ojok Yerusalem niki teterimaq secare bagus siq dengan-dengan saq tehususang bagi Allah saq araq lẽq derike.

³² Siq pekayunan Allah, tiang gen dateng tipaq side pade siq sukecite dait gen merase tehibur lẽq tengaq-tengaq side pade.

³³ Semoge Allah, sumber damẽ sejahtere gen bareng kance side pade selapuq! Amin.

Roma

Video Roma 15

Ikuti Kami:

KONTAK | PARTISIPASI | DONASI