Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Do' tau luk mepicet anu ngedengan lemulun luk melaya', idi aleg tau ngerawé burur tau sebuleng.
2 Do' anid-anid burur tau ngawang niat kinanak tau, pad ngacing peruan kuandeh, pelé anudeh uen ngepicet.
3 Ngaceku Keristus pana' na nengerawé bururNeh sebuleng, iamo' kudeng luk pangeh inayud, "Idi amung-amung adu' lemulun luk ngilang Namu, pangeh mebpeh luun bururku."
4 Ngaceku amung-amung luk pangeh inayud bang Surat Allah, pangeh inayud pad mangun ku bada' kuan tau, pelé tau ngalap rapet ratnan ulai niat idi ubuk luk barén kuan tau bang surat ineh.
5 Do' Allah, luk lawa ulai niat idi ubuk teh, maré kuan muyuh sebuleng niat arang muyuh sebuleng, maya' ayu Keristus Yésus,
6 pad dengan sebuleng niat idi sebuleng tang, muyuh ngerayeh Allah, ieh ineh Taman Tuhan tau Yésus Keristus.
7 Do' muyuh perurum seburur dengan seburur, mepad kudeng Keristus pangeh nengalap nemuyuh kuan rayeh Allah.
8 Ui pebala nemuyuh, idi Keristus pangeh ngasa' nelun Yahudi, pad ngegala' ratnan Allah lutep maya' jani'. Ieh ngeriput pejani'Neh kuan tepun-tepun tau;
9 pelé lun pupu baken pana' miak ngerayeh Allah ngaceku éi'Neh, maya' kudeng luk pangeh inayud, "Idi ini punneh ui ngubur Namu arang lun pupu baken, idi menani ngubur ngadanMu."
10 Idi teh keburi'neh, "Mawang niat, O lun pupu baken, dengan pupu luk pinili' Allah."
11 Idi teh, "Ngubur Tuhan ineh, O amung lun pupu baken. Ngubur neneh, O amung-amung pupu,"
12 Idi kebala Yesaya teh, "Idi inul Isai ineh miak macing teh, idi Ieh miak uen ngikit pad ngimet lun pupu baken, idi ideh miak merapet Neneh."
13 Do' Allah, luk lawa rapet ineh, manu' niat muyuh ku awang idi pedo' bang anu muyuh, pad ratnan lalud Roh Meligan, muyuh mepanu' ku rapet.
14 O kinanak-kinanakku, ui kali' muyuh mepanu' ku luk do' idi ileh, pad muyuh miak mada' seburur dengan seburur.
15 Iamo' bang surat ini, ui mekuu' ngayud pad nganau' nemuyuh ngerawé ratnan tuda'-tuda' bala. Ui mekuu' ngayud ini ngaceku katu luk biré Allah kuanku,
16 pad ui mangun ku lun duken Keristus Yésus kuan lun pupu baken. Ui ngakem mepad kudeng imam idi mada' Bala luk Do' ratnan Allah, pad lun pupu baken ineh miak lapen Allah mangun ku aceh baré luk petulu idi luk uen ngeligan ratnan Roh Allah.
17 Ngaceku ineh bang Keristus Yésus ui ngedita' bururku ratnan amung-amung luk ui nganau' ngaceku Allah.
18 Ui mekuu' pebala ratnan luk inau' Keristus mo' dengan bururku, pad nguit lun pupu baken ineh maya' bala Allah. Ini pangeh inau' dengan bala idi kekamen,
19 dengan lalud tanu' idi kekamen luk nan mawa, idi dengan lalud Roh Meligan, pad ngimun rat Yerusalim idi macing déi' Ilirikum ui pangeh nemada' megala' Bala luk Do' ratnan Keristus.
20 Idi pianku mada' Bala luk Do' su luk inan ngadan Keristus ineh nateh bida', pad ui na mudut ruma' pa luun diri lun baken.
21 Maya' kudeng luk pangeh inayud, "Lemulun luk na nekali' bala ratnan Ieh miak nier, idi lemulun luk na neninger ineh miak kali'."
22 Ngaceku ineh, tuda'-tuda' kua' ui sikal macing nemuyuh. Iamo' ui mula' sabeng.
23 Iamo' nekini kekamenku bang bawang ini pangeh, idi ngaceku bang tuda'-tuda' lak ui geregan macing nemuyuh,
24 kareb ui nalan amé' bawang Spaniol, idi ui merapet, bang dalanku, miak umak ngikak nemuyuh idi muyuh miak ngedengan negku pad ui amé' déi' kareb ui pangeh netudo dengan muyuh segageh.
25 Iamo' nekini ui amé' déi' Yerusalim sikal nguit usin kuan lun manu.
26 Ngaceku sidang-sidang déi' Makedonia idi Akaya sikal ngamung usin kuan lun manu luk masi' déi' Yerusalim.
27 Niatdeh sebuleng sigio pian nganau' ineh. Setuneh petulu ideh ngedengan kinanak-kinanak luk masi' ineh, ngaceku lun Yahudi pangeh nengacing peruan kuan lun pupu baken. Idi petulu lun pupu baken ineh ngasa' nelun Yahudi ineh dengan binawehdeh.
28 Kareb ui pangeh nenganau' ini idi pangeh nemaré kuandeh luk pangeh pimung ineh, idi ui sikal nalan amé' déi' Spaniol lemaba bawang muyuh.
29 Ui kali' kareb ui macing nemuyuh, idi ui macing mepanu' ku peruan ratnan Keristus.
30 Ui mutuh nemuyuh, O kinanak-kinanakku, ngaceku ratnan Tuhan tau Yésus Keristus idi ngaceku ratnan awa Roh Meligan, ngekél burur muyuh denganku bang sembayang inan Allah ngaceku ui,
31 pad ui mepuit ratnan lun luk na manu déi' Yudia, idi kekamenku kuan Yerusalim miak petulu dengan pian lun manu ineh.
32 Kudeng ini pian Allah, ui miak macing nemuyuh dengan mawang niat, idi ngato erurku dengan muyuh.
33 Do' Allah luk lawa awang ineh tudo dengan muyuh anid-anid burur. Amin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA