Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ram sai temon-temon yakin api sai ram percayai, harusdo besabar tehadap keberatan-keberatan jelma sai lemoh keyakinanni. Dang ram haga nyenangko diri ram tenggalan gaoh.

² Sebalikni ram masing-masing harus nyenangko hati peperda puari ram untuk kebetikanni, in keyakinanni betambah kuat.

³ Mani Almasih pun mak mikerko kesenangan-Ni tenggalan. Di delom Alkitab tetulis injuk reji, "Sunyin celaan sai ditujuko jama Niku radu jatuh di atasku."

⁴ Sunyin sai tesurat di delom Alkitab iado untuk ngajar ram. Mani pelajaran sai ram terima jak Alkitab ngejadiko ram tabah rik kuat sehingga ram dapok beharap jama Allah.

⁵ Semoga Allah, sai ngeniko ketabahan rik penghiburan jama manusia, nulung keti untuk hurik jama sehati, nutuk teladan-Ni Isa Almasih.

⁶ Jama sehati Puari-puari sunyinni jama-jama dapok memuji Allah, Bapa Tuhan ram Isa Almasih.

⁷ Ulihni seno hagani Puari-puari nerima peperda keti jama senang hati, gegoh injuk Almasih juga nerima keti untuk ngemuliako Allah.

⁸ Mani, ingokdo, bahwa Almasih radu ngelayani ulun Yahudi untuk nunjukko bahwa Allah setia delom memenuhi janji-janji-Ni jama nenek muyang ram.

⁹ Isa juga nyani bangsa-bangsa bareh muliako Allah mani kebetikan hati-Ni jama tian. Di delom Alkitab tetulis injuk reji, "Ulihni seno nyak haga memuji Niku di hantara bangsa-bangsa, nyak haga nyanyiko pujian untuk gelar-Mu."

¹⁰ Wat tetulis injuk reji muneh, "Begembirado jejama umat-Ni Allah sai tepilih, hai bangsa-bangsa!"

¹¹ Rik inji muneh, "Pujido Allah, hai sunyin bangsa, hagani sunyin jelma memuji Ia!"

¹² Rik inji muneh sai dicawako ulihni Yesaya, "Jak keturunan Isai haga muncul sai jelma sai haga merintah bangsa-bangsa; jama Iado bangsa-bangsa ano haga beharap."

¹³ Allahdo rang keti beharap. Semoga Ia ngisi hatimu jama sunyin sukacita rik sejahtera mani keti percaya jama Ia, in jama kuasa Ruh-Ni Allah keti makin beharap jama Allah.

¹⁴ Puari-puariku! Nyak yakin bahwa wat lamon nihan hal sai betik jama niku. Keti pun pandai sunyinni rik dapok ngajar peperda keti juga.

¹⁵ Kidang mengenai hal-hal sai tantu, nyak tegas ngingokko keti delom surat inji, mani Allah radu nganugerahko jama nyak tugas ano.

¹⁶ Ia radu ngejadiko nyak jelma sai ngelayani Isa Almasih untuk diutus jama bangsa-bangsa sai lain Yahudi. Rik nyak betindak sebagai imam, sai ngabarko Kabar Betik jak Allah, in ulun-ulun sai lain Yahudi jadi suatu persembahan jama Allah sai dapok diterima ulih-Ni. Semoga Ruh-Ni Allah nyani tian jadi suatu persembahan sai khusus untuk Allah.

¹⁷ Jadi mani nyak radu besatu jama Isa Almasih, maka nyak ngasi ngerasa bangga atas guaianku bagi Allah.

¹⁸ Nyak bani cawa injuk reno angkah mengenai api sai radu dilakuko Almasih liwat nyak untuk ngejadiko jelma-jelma sai lain Yahudi taat jama Allah. Nyak ngelakuko ano jama cawa-cawa maupun perbuatan,

¹⁹ sai disertai keanehan-keanehan rik hal-hal luar biasa; sunyinni ano ulih kuasa Ruh-Ni Allah. Kabar Betik tentang Almasih radu nyak kabarko seluruhni jama ulun-ulun, mulai jak Yerusalem sampai di Ilirikum.

²⁰ Cita-citaku iado ngabarko Kabar Betik jak Allah di rang-rang di dipa jelma makkung ngedengi tentang Almasih. Mani nyak mak haga ngebangun guaian pada dasar sai dipikko ulih ulun bareh.

²¹ Di delom Alkitab tetulis, "Jelma-jelma sai makkung pernah nerima kabar tentang Ia haga ngeliak; rik tian sai makkung pernah ngedengi, haga ngerti."

²² Udi sebabni radu risok nyak tehalang untuk napol keti.

²³ Kidang tano guaiku di daerah-daerah udi radu selesai. Betahun-tahun sakani nyak mirak napol keti.

²⁴ Kanah kik nyak liu kotamu delom lapahku mik Spanyol, kuharap dapok betungga jama keti rik begembira serebok jama keti. Radu jak seno kuharap keti dapok ngebantu nyak untuk lapahku mik Spanyol seno.

²⁵ Kidang tano inji nyak haga mik di Yerusalem untuk ngusung bantuan bagi umat-Ni Allah di dudi.

²⁶ Mani jemaah-jemaah di Makedonia rik Akhaya radu menyetujui untuk ngeniko sumbangan jama puari-puari sai mejerih di hantara umat-Ni Allah di Yerusalem.

²⁷ Jama senang hati tian mutusko untuk bebuat udi. Sangun sebenorni tian patut nulung puari-puari sai mejerih di Yerusalem udi; mani jak ulun-ulun Yahudido ulun-ulun lain Yahudi ano radu nerima berkat-berkat-Ni Allah. Jadi, ulun-ulun lain Yahudi udi patut juga nulung ulun-ulun Yahudi jama berkat-berkat berupa barang.

²⁸ Kik nyak radu nyelesaiko tugasku inji, rik nyerahko jama tian sai di Yerusalem udi sumbangan sai radu dikumpulko udi, maka nyak haga berangkat mik negeri Spanyol ngeliu kotamu.

²⁹ Kik nyak ratong jama niku, pasti nyak ratong jama lamon berkat jak Almasih untuk keti.

³⁰ Demi Tuhan ram Isa Almasih, rik demi kasih sai dikeniko ulih Ruh-Ni Allah, nyak ngilu nihan jama niku, semoga keti turut bedua temon-temon jejama nyak jama Allah untuk nyak.

³¹ Beduado in Allah ngelepasko nyak jak culuk ulun-ulun sai mak percaya di Yudea, rik in tugasku untuk ngusung sumbangan mik Yerusalem diterima jama senang hati ulih umat-Ni Allah di dudi.

³² Jama injuk reno, kik Allah ngehagako, nyak dapok ratong jama niku jama hati sai senang. Rik nyak haga ngerasa tehibur di tengah-tengah keti.

³³ Mudah-mudahan Allah, sai ngeniko sejahtera jama manusia, menyertai Puari sunyinni. Amin.

Roma

Video Roma 15

Ikuti Kami:

KONTAK | PARTISIPASI | DONASI