Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian saq araq lẽq Roma, saq tekasihin siq Allah dait saq sampun tepilẽq jari dengan-dengan saq tehususang bagi Allah. Tiang, Paulus, sampun tepilẽq siq Allah jari rasul-Ne dait ẽndah nyampẽang Kabar Solah lẽman Allah.

² Kabar Solah nike sampun tejanjiqang siq Allah lẽq jaman laẽq langan perantarean nabi-nabi-Ne dait sampun tetulis lẽq Kitab Suci.

³ Kabar Solah nike mengenai Bije-Ne, Junjungante Saq Mulie Deside Isa Almasih. Secare manusie Deside Isa nike keturunan Daud,

⁴ laguq secare ilahi Deside Isa nike setetune Bije saq asalne lẽman Allah. Hal nike tenyatayang lẽman kuase saq luar biase sewaktu Deside Isa idup malik lẽman ninggal.

⁵ Langan Deside Isa ẽndah Allah ngicanin tiang paice dait jabatan rasul jari bimbing selapuq bangse adẽq ie pade percaye dait taat tipaq Bije saq asalne lẽman Allah adẽq pesẽngan-Ne temulieang.

⁶ Saq temaksut selapuq bangse nike, lantong side pade saq araq lẽq Roma; sẽngaq side pade ẽndah sampun temanikang jari dowẽn Deside Isa Almasih.

⁷ Nike lantaranne tiang nulis tipaq side pade. Semoge Allah Bapante dait Junjungante Saq Mulie Deside Isa Almasih, ngicanin rahmat dait damẽ sejahtere tipaq side pade.

⁸ Pertame-tame, langan Deside Isa Almasih, tiang ngucapang syukur lẽq Allah lantaran semeton-semeton senamian; sẽngaq seantẽro dunie sampun dengah bahwe side pade tetu-tetu percaye lẽq Almasih.

⁹ Tiang tetep inget lẽq side pade lamun tiang bedo'e. Allah jari saksi bahwe napi saq tiang ucapang niki mule tetu. Ie Allah saq tiang layanin sepenoq angen siq nyampẽang Kabar Solah mengenai Bije-Ne.

¹⁰ Tiang tunas lẽq Allah mudah-mudahan mangkin tiang teijinang dateng tipaq side pade.

¹¹ Sẽngaq tiang melẽt gati bedait kance side pade, adẽq tiang bau bagiang tipaq side pade paice-paice rohani jari neguqang side pade.

¹² Maksut tiang, lantaran ite pade-pade sampun bedowẽ iman lẽq dalem Deside Isa Almasih, jari ite bau saling hibur dait saling neguqang.

¹³ Semeton senamian, tiang mẽlẽ adẽq side pade nenaoq bahwe setetune sampun pire kali tiang beniat gen jangoq side pade, laguq araq doang halanganne. Tiang melẽt adẽq lẽq antare side pade pegawẽan tiang araq ẽndah hasilne maraq pegawẽan tiang sampun berhasil lẽq antare dengan bangse-bangse lain.

¹⁴ Sẽngaq tiang bedowẽ kewajiban tipaq selapuq bangse: Dengan Yunani atao saq ndẽq Yunani, saq sekolah atao saq ndẽq sekolah.

¹⁵ Keranaq nike tiang ẽndah melẽt gati nyampẽang Kabar Solah nike tipaq side pade saq araq lẽq Roma.

¹⁶ Tiang tetu-tetu percaye lẽq Kabar Solah nike, sẽngaq Kabar Solah nike kekuatan Allah jari nyelametang selapuq dengan saq percaye; penembẽqne dengan Yahudi, beterus dengan bangse-bangse lain ẽndah.

¹⁷ Sẽngaq lẽq dalem Kabar Solah nike Allah nyatayang berembẽ manusie tejariang kenaq lẽq arepan-Ne sehingge hubungan manusie kance Allah jari solah malik; hal nike langan beriman lẽq Allah lẽman penembẽq jangke dateng penutuq. Nike pade maraq saq tetulis lẽq Kitab Suci, "Dengan saq tejariang kenaq lẽq arepan Allah sehingge hubunganne kance Allah jari solah malik, ie gen idup siq iman!"

¹⁸ Lẽman sorge Allah nyatayang murke-Ne tipaq selapuq dose dait kejahatan manusie, sẽngaq kejahatan jari penghalang manusie nenaoq kebenaran mengenai Allah.

¹⁹ Napi saq bau tetaoq siq manusie mengenai Allah sampun jelas lẽq dalem atẽ nurani manusie, sẽngaq Allah mẽsaq sampun nyatayang hal nike tipaq manusie.

²⁰ Lẽman Allah cipteang dunie, sipat-sipat Allah saq ndẽq penggitan, keadaan-Ne sebagẽ Allah dait kuase-Ne saq kekel, sampun bau tepahamin siq manusie langan selapuq saq sampun tecipteang. Jari, manusie tetu-tetu ndẽq bedowẽ alasan napi juaq jari ndẽq kenal kance Allah.

²¹ Manusie nenaoq Allah, laguq manusie ndẽq mulieang Ie sebagẽ Allah, dait ndẽqne ẽndah besyukur tipaq Allah. Sebalikne, atẽ ie pade saq bodo sampun jari peteng.

²² Ie pade merase diriqne bijaksane, padahal setetune bodo.

²³ Nẽnten Allah saq kekel saq ie pade sembah, laguq tetato-tetato saq ruene maraq mahluk saq bau matẽ, misalne: Manusie, kedit, binatang saq benaẽ empat dait binatang saq ngumang.

²⁴ Keranaq nike Allah menengang ie pade tekuasein siq kemẽlẽq angen ie pade jari gawẽq saq bejat. Sehingge ie pade piaq hal-hal saq merilaq lẽq sepadene mẽsaq.

²⁵ Sẽngaq ie pade gentiq kebenaran Allah siq duste dait mulieang serte nyembah mahluk, siq ngelupaqang Penciptene saq harus tepuji selaẽq-laẽqne, amin.

²⁶ Sẽngaq manusie ngelaksaneang hal saq maraq nike, jari Allah menengang ie pade turut napsune saq hine. Dengan-dengan nine lẽq antare ie pade ndẽqne berangen malik lẽq dengan mame maraq saq biase lẽq manusie, laguq malahan berangen kance sepade ninene.

²⁷ Dengan mame ẽndah maraq nike; ie pade ndẽqne malik secare wajar berubungan kance dengan nine, laguq birahi lẽq sepade mamene. Dengan mame gawẽq perbuatan saq merilaq tipaq sepade mamene, sehingge ie pade nerimaq pembalesan saq setimpal kance perbuatan ie pade saq jahat nike.

²⁸ Sẽngaq manusie ndẽq merase perlu nenaoq Allah, make Allah menengang pikiran ie pade jari sẽde sehingge ie pade ngelaksaneang hal-hal saq ndẽq kanggo telaksaneang.

²⁹ Pikiran ie pade penoq siq selapuq hal saq jahat, saq ndẽq kenaq; penoq siq keserakahan, lengẽ angenne, penoq siq dengki, napsu mẽlẽ nyematẽq, besiaq, nipu dait dendem, ndẽqne peduli lẽq Tuhan,

³⁰ ie pade demen nyumpaq, tukang pitnah, sombong dait kurang ajar, meriq lẽq Allah. Ie pade ceket gati boyaq care-care baru jari miaq kejahatan, ngelawan dengan toaq.

³¹ Ie pade ndẽq bedowẽ akal budi, ndẽq setie dait ndẽq bedowẽ belas kasihan.

³² Ie pade nenaoq bahwe menurut hukum Allah, dengan saq ngelaksaneang selapuq hal nike patut tehukum matẽ, laguq timaq maraq nike ie pade tetep ngelaksaneang ẽndah hal-hal nike; dait malahan ie pade setuju lamun dengan lain ẽndah ngelaksaneang hal nike.

Roma

Video Roma 1

Ikuti Kami:

KONTAK | PARTISIPASI | DONASI