1 Utatku mita kon Rum inta kinotabi i Allah bo inta aim pinilií-Nya sim baliíondon umat-Nya. Aku'oi im piniliídon i Allah bo aim binalií-Nya intau inta mopota'au in Habar Mopia nongkon i-Nia.
2 Habar Mopia tatua aindon pinodandi i Allah kon tungkuḷ intua inta pinongin nabi-Nya mita bo inta pinaisdon kom bonu im Buk Mosuci.
3 Habar Mopia tatua in soaáḷbií ki Adií i Allah, inta ki Tuhan naton, ki Yesus Kristus. Inta aka podudui in awak ilo-ilow na'a, yo Sia tua in turunanbií i Daud.
4 Ta'e podudui ko'i Allah yo Sia tua ing ki Adiíbií i Allah. Tua komintan nonyata kong kawasa inta totok moḷoben inta nokobiag ko'i-Nia nongkong kinopatoian-Nya.
5 Bo pinongin i-Nia doman tua ki Allah nobogoi in totabi ko'i-Nakoí nobalií rasul, si mopotutui in daḷan kom bayongan intau simbaí mopirisaya bo motoindudui ko'i-Nia.
6 Imakusud in singog bayongan intau tua im mo'ikowbií doman. Mo'ikow inoinií domandon sim mobalií umat i Yesus Kristus.
7 Tuamai nomais aku'oi kon surat ko'i monimu. Po'igumon makow ko'i Allah inta ki Amaí naton bo ki Tuhan Yesus Kristus mobogoi im barakat bo kobiagan motompia ko'i monimu.
8 Muna-munamai pongin i Yesus Kristus, aku'oi mopoyaput in sukur moaíntoí ko'i Allah lantaran mo'ikow in totok bidon mopirisaya ko'i Kristus.
9 Umuranku kotoropan i mo'ikow aka mosambayang in aku'oi. Kinota'auanbií i Allah kon onu in siningogku tua in totu'ubií. Siata ing ki Allah inta oaíidan-Nya inaidanku takin gina motulid, oaíidan tatua im mopoyaput in Habar Mopia soaáḷ ki Adií-Nya.
10 Po'igumonkupa doman makow ko'i Allah simbaí ogoian-Nyapa ing kasampatan tana'a makow in aku'oi mokipodungkuḷ ko'i monimu.
11 Aku'oi mo'ibogdon totok moyodungkuḷ monimu simbaí mota'aupa mosilai ko'i monimu kon onu inta aim pinonotabi in Roho i Allah simbaí modugangdon moropot im pirisaya monimu.
12 Nana'a im makusudku, lantaran kita bo tumpaḷadon mopirisaya ko'i Yesus Kristus, daí musti umuran mosirigonan ing kita.
13 Utatku mita! Ibogonku im baí kota'auan doman monimu kom mokakitdon aku'oi mo'ibog mamangoi mokipodungkuḷ ko'i monimu, tongaí tantuí oyuíon in ḷabot. Sin ibogonku im baí oyuíon doman bungai in oaíidanku kon sigad monimu naí inta ain nobalií kon yuaí-yuaík in intau mita inta de'eman Yahudi kon tampat mita ibanea.
14 Sin tuabií ing kowajibanku kom bayongan bangusa, intau nomangarti andeka inta diaípa nomangarti, inta nosikoḷah andeka inta diaípa nosikoḷah.
15 Tuabií manangka i mo'ibogdon totok aku'oi mopoyaput in Habar Mopia tatua ko'i monimu inta nogutun kon Rum.
16 Mopirisayabií totok in aku'oi kon Habar Mopia tatua, sin Habar Mopia tatua ing kakuatanbií i Allah moposaḷamat kom bayongan intau inta mopirisaya; muna-munamai intau in Yahudi, bo bangusa doman ibanea.
17 Sim pinongin Habar Mopia tatua ki Allah nopo'ontongdon kon naí onda in caranya hubungan intau takin i Allah notompiadon bui: caranya kon tua in tongaíbií mopirisaya ko'i Allah nongkon pinomangkoianpamai modapot im pangabisan. Tua in naí inta aim pinais kom bonu im Buk Mosuci, nana'a, "Intau nopirisayadon ko'i Allah, sahingga hubungannya takin i Allah notompiadon bui, bo intau tatua in mobiagbií!"
18 Nongkon soroga ki Allah nopo'ontong in toruí-Nya kom bayongan dosa bo oaíid inta mora'at, sin aid inta mora'at tua moḷamboi kon intau monota'au kon totunduí mobanar soaáḷ ki Allah.
19 Onu ing kinota'auan intau soaáḷ ki Allah nonyatadon kong gina in intau, sin aim pinonyata i Allah kon intau.
20 Pinangkoipamai Sia nomia kon dunia na'a, sipat mita i Allah inta diaí ko'ontongan, naí ka'ada'an-Nya saḷaku Allah bo kawasa-Nya inta mononoi, kinota'auan bidon in intau nongkon bayongan inta pinomia-Nya tua, sahingga intau diaíbií mota'au dumodia.
21 Intau nonota'au bidon ko'i Allah, ta'e diaíbií i hormat monia in Sia saḷaku Allah bo mosia doií doman mosukur ko'i-Nia. Sin soaáḷbií mita inta diaí im mangalenya im pikiron monia; nosindipdon gina monia.
22 Iraimai monia mobijaksana bidon mosia, padahaḷ mosia tua nobodokbií.
23 De'emanbií ki Allah inta mononoi in sumbaían monia, ta'e patongbií inta naí batangan im mahaḷuk mita inta mato-matoipabií; umpamanya: Intau, ḷagapan, mahaḷuk mita inta opat in sioḷnya bo mahaḷuk mita inta mayak ḷumandai.
24 Tuamai pinomayakdon makow i Allah mosia kinawasaan ibog ing gina monia mogaid kon inta moromuk, sahingga mosia mogaid kon onu inta mokokotor kon awak monia tontanií.
25 Ki Allah inta mobanar toliuanbií monia in onu inta diaí totu'u. Mosia in doiíbií mosumbah kon inta nomia, ta'e tongaíbií inta pinomia in sumbaían monia. Padahaḷ bo inta nomiabií tua im musti dayowon modapot ing kopaḷutan dunia na'a. Amin.
26 Lantaran nogaidon kon natua, daí pinomayakdon makow i Allah im mosia dinumudui kon ibog monia inta moko'oyak. Bobay mita doií bidon kon ḷoḷaki naí biasamai saḷaku tabiat in intau, ta'e mosia mo'ibog bidon kon tumpaḷa bobay.
27 Naí doman tua in ḷoḷaki, mosia monaḷaímaidon ko'i buḷoi monia bo mongibogdon kon tumpaḷa ḷoḷaki, tuamai mosia motarima kon tontuliínya podudui aid monia tatua.
28 Bo lantaran irasa in intau kon diaíbií paraḷu mosia monota'au ko'i Allah, daí pinomayak bidon makow i Allah ing kogoguya'atan in raian monia, sahingga in nogaidon mosia kon soaáḷ mita inta ilarang.
29 Gina monia nopulingdon yagi-yagi inta mora'at, inta diaí nobanar, moturaí, aid mokotor, yoya'atan gina; ibog molimod, ibog moropatoi, ibog monguboḷ bo motaguí kong gina bo mo'ibo-ibog doman mongonguman kon soaáḷ intau ibanea.
30 Mosia mo'ibog doman mopora'a-ra'atmai kon tangoi intau ibanea, mokaḷakuang bo diaí ko'endar. Mosakií doman gina monia ko'i Allah bo mo'ibog doman totok mongonguman kon inta diaí totu'u. Mosia mopandoi doman motayak kon cara mita mobagu kom pogaid kon inta mora'at. Mosia mo'ibog moḷawang kong guyanga.
31 Mosia in doiíbií mosimangartian diaí doman mosatia, bo diaí doman in totabian kon tumpaḷa intau.
32 Kinota'auanbií monia kom podudui in hukum i Allah, intau inta mogaid kom bayongan tua patusbií hukumon modapot matoi. Ta'e umpakahbií natua yo aidanbií doman monia intua komintan; bo malah aka intau ibanea momia kon soaáḷ mita naí inta inaidan monia tua yo mosatujubií doman i mosia.

Studi Alkitab lengkap, silahkan lihat Alkitab SABDA :: Roma 1
Studi Alkitab mobile, silahkan lihat Alkitab Mobi :: Roma 1

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke