Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat negku Paulus, demulun Yésus Keristus, seburur rasul luk pinili' idi tinawar Allah pad mada' BalaNeh luk Do'.
2 Bala luk Do' ineh pijani' Allah mon dengan tang nabi-nabi, idi pangeh inayud bang Surat Allah.
3 Bala ineh ratnan AnakNeh, Tuhan Yésus Keristus, luk maya' inul lemulun pangeh mangun ratnan inul Daud;
4 iamo' maya inul Roh luk ngeligan pangeh ginala' dengan lalud rayeh ratnan Ieh Anak Allah, ngaceku tuiNeh ratnan até.
5 Ngaceku rat Neneh ui pangeh nengalap katu pad ui mangun ku rasul ngaceku Keristus, pelé ui nguit lemulun ratnan anid-anid pupu manu idi maya' pianNeh.
6 Idi rat arangdeh ineh muyuh rat Rum pana' luk tinawar Allah mangun ku pupu Yésus Keristus.
7 Ngaceku ineh ui ngayud kuan amung muyuh lun Rum, luk inan Allah mawa, idi luk tinawar mangun ku lun manu: Do' katu idi awang temurun kuan muyuh ratnan Allah Taman tau idi Tuhan tau Yésus Keristus.
8 Pun-pun ui maré ubur kuan Allahku bang Yésus Keristus ratnan amung-amung muyuh, ngaceku anu muyuh pangeh bida' aput tana' ini.
9 Ui ngakem kuan Allah dengan amung niatku dengan mada' Bala luk Do' ratnan AnakNeh. Idi Allah ineh miak ngegala' ratnan anun-anun luk bilaku matu. Allah kali' ratnan ui megéi' ngerawé nemuyuh
10 anidku sembayang. Ui mutuh Allah nima' negku ngikak nemuyuh nekini, maya' pianNeh luk do', ngaceku mio ui pian amé'.
11 Ngaceku ui geregan sikal nier nemuyuh, pad ui miak ngacing kuan muyuh peruan Roh luk nganau' nemuyuh lutep.
12 Ilungneh, amung-amung tau pad-pad buken ratnan anu anid-anid burur, do' ui idi muyuh pana'.
13 Do' muyuh ngerawé ini, O kinanak-kinanakku, tuda'-tuda' kua' ui sikal macing nemuyuh, iamo' macing nekini megéi' inan luk ngesabeng negku. Ui pian ngalap bua' rat arang muyuh, mepad kudeng arang lun pupu baken teh.
14 Ui ini inan baleh kuan amung lemulun, do' lun Grika idi kuan lun baken pana', do' kuan lun mileh idi kuan lun mebacé pana'.
15 Ineh punneh ui geregan tu-tu mada' Bala luk Do' kuan muyuh luk bang bawang Rum teh.
16 Ngaceku na ui migu' ngamo Bala luk Do' ineh; ngaceku ieh ineh lalud Allah luk ngacing ulun kuan anid-anid lemulun luk manu, pun-pun kuan lun Yahudi, idi kuan pun pupu baken pana'.
17 Ngaceku bang Bala luk Do' ineh, Allah ngelio ratnan lemulun ruen matu ngaceku anu rat punneh macing kekipedneh; maya' kudeng luk pangeh inayud, "Idi lemulun luk matu ineh miak mulun ngaceku anu."
18 Useh Allah uen ngelio rat surga kuan amung-amung sala' idi kekamen lemulun luk dat, luk ngang luk matu ku lawédeh luk dat.
19 Allah ngukum lemulun ngaceku luk kali'deh ratnan Allah megala' kuandeh, ngaceku Allah pangeh nengelio ineh nedeh.
20 Rat pun-pun tana' ini pinudut Allah, amung-amung kekamenNeh luk inalum, ieh ineh lalud idi ulun Allah luk meruked, pangeh sinier dengan megala' bang amung-amung luk pangeh pinudut. Ngaceku ineh ideh na miak ngor peh.
21 Ideh ngiti Allah, iamo' ideh na ngerayeh Neneh kudeng Allah, idi na ideh maré ubur kuanNeh. Iamo' ideh pangeh mangun mo'-mo' bang terawédeh, idi naitdeh luk mebacé mepanu' ku dacem.
22 Ideh ngamo bururdeh mileh, iamo' ideh mebacé.
23 Ideh na sembayang nan Allah luk meruked. Iamo' ideh sembayang nan akang luk inau' maya' ayu lemulun luk miak maté, idi suit, pung, idi menipeh pana'.
24 Ngaceku bacédeh ineh Allah nenima' nedeh bang amung-amung pian niatdeh luk melutak. Idi ideh ngelutak bururdeh arangdeh sebuleng.
25 Ideh ngelibal luk matu ratnan Allah dengan mebalih idi sembayang idi ngakem kuan luk pinudut Allah ku libal Ieh luk nemudut, idi luk buren ruked-ruked! Amin.
26 Ngaceku ineh Allah nemaré nedeh kuan amung-amung pinian bururdeh luk dat. Decur-decurdeh pana' maya' luk inandeh na pekalai ku libal luk inandeh pekalai.
27 Kudeng ineh teh deléi-deléi pana' necan luk inandeh pekalai dengan decur idi mepanu' ku lilideh seburur dengan seburur, ieh ineh, deléi dengan deléi nganau' kekamen luk dat, idi ngalap bang bururdeh ua' luk petulu dengan sala' luk ngeraruh ineh.
28 Idi ngaceku ideh ara' ngimet Allah bang terawédeh, idi ideh biré Allah kuan terawé luk melutak, pad ideh nganau' anun-anun luk na do'.
29 Niatdeh mepanu' ku amung-amung sala', luk dat, lili, idi terawé luk dat. Idi ideh mepanu' ku ét niat, ngaté, kedaluh, naluk, idi ideh ngedat, idi ngatum bala,
30 idi ideh ngesala', idi megateh niat inan Allah, mesido', medita' niat, idi ideh ngedita' bururdeh sebuleng, idi nakap ileh luk dat, idi ngelaba bala taman-tinan,
31 mebacé, na maya' jani', na mawa nelun, idi na méi' teh.
32 Ideh kali' ukum Allah luk pebala ratnan lemulun luk nganau' kudeng ineh na miak na mekaneh ukum maté. Iamo' baken ideh nganau' kudeng ini mo', iamo' ideh perurum dengan lemulun luk nganau' kudeng ineh teh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA