Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sampesuvu-sampesuvu ri ngata mbaso Roma: Sura hitu lako nte yaku i Paulus, batua i Yesus Kristus. Alatala nompelisi bo nombasuro yaku mompatolele Kareba Belo lako nte Ia.

² Kareba haitu nijanjiNa nggaulu bo nipopaisaniNa ka *nabi-nabiNa. Pura-pura haitu nitulisi riara Buku Gasa.

³ Kareba Belo haitu notesaki Ana nu Alatala, haitumo Tuputa Yesus Kristus. I Yesus najadi manusia apa Ia nipoanaka lako ri muli Magau Daud. Bo kagasaNa nasimbayu nte kagasa nu Alatala sabana Ia Ana nu Alatala mami. Nisanita Ia mpuu-mpuu Ana nu Alatala sabana Alatala nompakatuvu Ia mpanjili lako ri kamateNa ante kuasa nipokumaaka.

⁴ (1:3)

⁵ Alatala nabelo raraNa nte yaku bo yaku nipajadiNa suroNa sabana i Yesus. Yaku niposuroNa mompatolele Kareba Belo ka tona ri umba-umba ri dunia bo manggeniaka ira momparasaya bo matundu nte i Yesus, ala Ia rabila bo rapakaoge

⁶ Komiu ri ngata Roma muni nireke todea anu nipokio nu Alatala mangoseaka i Yesus Kristus.

⁷ Jadi siamo sampe nitulisiku sura hitu ka komiu pura-pura ri ngata Roma, komiu anu nipotove nu Alatala bo nipokioNa majadi todeaNa. Kuperapi Tuamata Alatala bo i Pue Yesus Kristus mombadekei belo ka komiu bo mompakatinonto raramiu.

⁸ I Yesus Kristus nantulungi yaku nosukuru nte Tupuku Alatala. Pamula-mulana yaku nosukuru sabana lele pomparasayamiu i Yesus niepe ntonamo ri umba-umba ri dunia.

⁹ Nisani nu Alatala yaku nasaro nosambaya ka komiu. Yaku batena ante rara mpuu-mpuu nombatui pokarajaa nidekei nu Alatala ka yaku, haitumo nompatolele Kareba nu AnaNa.

¹⁰ Kuperapi mpuu-mpuu nte Alatala, ane rapodotaNa, rapalogaNa yaku tou mosinggava nte komiu.

¹¹ Apa naoge mpuu raraku mosinggava nte komiu ala yaku mamala mombabagi pedekei nu Alatala ka komiu, haitumo Nosa Gasa anu mompakaroso pomparasayamiu.

¹² Patujuku ala yaku muni rapakaroso sabana pomparasayamiu, jadi kita mpasanggani-nggani mosipakaroso rara.

¹³ Sampesuvu-sampesuvu, kana rasanimiu nadea ngganimo yaku nonia tou mosinggava nte komiu tapi nasaro natelava sampe sii-sii. Patujuku mosinggava nte komiu ala madea komiu mangoseaka i Pue Yesus nasimbayu mpo anu najadi nte tona ledo toYahudi ri ngata ntanina.

¹⁴ Yaku madota mosinggava nte komiu sabana kana kupatolele Kareba Belo ka pura-pura tona ri dunia, ledo nipelisiku bara tona ri kota, bara tona ri bulu, bara toposikola bara ledo.

¹⁵ Haitumo sampe naoge raraku mompatolele Kareba Belo ka komiu toponturo ri ngata Roma muni.

¹⁶ Ledo naeya mataku nompatolele Kareba Belo. Apa Kareba Belo haitu pareva nu Alatala mompakasalama pura-pura tona anu nomparasaya i Yesus, pamula-mulana *toYahudi, bo muni tona ledo toYahudi.

¹⁷ Kareba Belo nompopaisani dala ka kita majadi manoa ri panggita nu Alatala, haitumo momparasaya i Yesus. Ledo ria dala ntanina, aga momparasaya lako ri pantepuuna sampe ri kaupuna. Apa nitulisi ri Buku Gasa ivei: "Tona nanoa ri panggita nu Alatala matuvu mabelo sabana pomparasayana."

¹⁸ Lako ri suruga Alatala nombahuku manusia anu ledo natundu nte Ia bo nokainggu nadaa. Pokainggura nadaa haitu nombalava tona mangisani pepatuduki nakana.

¹⁹ Nisani nu manusia inggu nu Alatala, sabana Alatala mboto nompopaisanina ka ira.

²⁰ Lako ri tempo dunia nipajadi nu Alatala sampe sii-sii, nisani nu manusia kuasaNa ledo naupu-upu bo Ia mpuu-mpuu Alatala. Nau ledo nikitata lenjeNa, nisanita Ia Alatala apa nisanita ingguNa lako ri pura-pura anu nipajadiNa ri dunia. Jadi ledo ria tona mamala manguli "Ledo nisani kami!"

²¹ Nisanira Alatala naria bo nisanira Ia masipato rabila, tapi ledo nibilara, bo ledo muni niulira tarima kasi nte Ia. Ira aga nompekirika anu ledo ria gunana. Pekirira nadoyo bo ledo nipahara anu nakana.

²² Pangulira iramo tonoto pekiri, tano aga todoyo!

²³ Ira ledo nadota netupu nte Alatala anu batena natuvu bo ledo mamate. Ira aga netupu nte anu nipoviara mboto nolenje mpo manusia, mpo tonji, mpo ule, bo mpo binata ntanina, anu kana mamate.

²⁴ Manusia ledo nadota netupu nte Alatala, jadi Alatala nompalamba ira mangoseaka dota rarara mboto bo nokainggu nadaa, sampe ira nosipakabuga.

²⁵ Ira nombasapuaka pepatuduki nakana anu notesaki inggu nu Alatala. Ira aga nangoseaka pepatuduki nasala. Ira ledo nadota nombasomba bo nangoseaka Alatala Topepajadi, ira aga nombasomba bo nangoseaka anu nipajadiNa. Kakanana aga Alatala Topepajadi masipato ratoiyata sampe ri kasae-saena. Amin.

²⁶ Ira ledo nadota netupu nte Alatala, jadi Alatala nompalamba ira mangoseaka dota rarara nabuga anu nepakaeya. Mombine-mombine domo nompokono langgai mpo biasana najadi nte manusia, tapi noberei simbo mombinemo.

²⁷ Ivesia muni langgai, domo mombine nipokonora tapi damo ira simbo langgai nosipogau. Pokainggura nepakaeya, langgai simbo langgai sampe kaupuna ira nantarima pobalasi anu masipato ka pokainggura nadaa.

²⁸ Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

²⁹ Mpengaya-ngaya pekiri nadaa bo natenggo riara ntaira. Ledo naosa rarara ante anu naria nte ira, navau rarara, nasiriati, nepatesi, nebagiu, bo nosinggarau. Ira nomboli rau rara, nantunturaka tona

³⁰ bo nompakadaa sanga ntona ntanina. Navuu matara nte Alatala, ira najampa, nalanga rara bo nangoe. Ira natau nangelo akala movia anu nadaa bo ledo natundu nte totuara.

³¹ Ira nadoyo, ledo namala raparasaya, ledo ria tovera bo ledo ria asi matara nanggita singgamanusiara.

³² Nisanira mami parenta nu Alatala anu nanguli tona nokainggu ivesia masipato rahuku sampe mamate. Tapi nau nisanira pokainggura haitu nadaa, kana nipoviara. Bo ane maria tona ntanina mantuntuni pokainggura nadaa, nadamba rarara.

Roma

Video Roma 1

Ikuti Kami:

KONTAK | PARTISIPASI | DONASI