Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de tamake 'o mala'ekati ngai soata 'ima'okode 'o dunia ma libuku soatoka. 'Ena yatahani 'o dadoko 'o dunia ma libuku soatino ge'ena, la 'uwa 'idadoko 'o tonaka ma dekuoka bolo 'o ngootoka, bolo 'o gota-gotaka.

² Ge'enaka de tamake 'o mala'ekati 'iregu moi 'isupu dina 'o wange ma siwarisa 'idadu, 'ena 'i'asa 'o capu ma Jo'oungu ma Dutuoka wo'ahu-'ahu ma ngale yakisino-nako 'awi nyawa. 'O mala'ekati ge'ena 'i'asoko yaamo-amokie 'o mala'ekati ngai soatika gee 'imadamakekau 'o kuasa ma Jo'oungu ma Dutuno ma ngale yatorou 'o tonaka de 'o ngooto.

³ 'O mala'ekati ge'ena kaingosekau, "'Uwasi niatorou 'o tonaka de 'o ngooto, bolo 'o gota-gota, nako 'o nyawa gee ma Jo'oungu ma Dutu wile-leleani manga mengako komiano-nakowasi de ma Jo'oungu ma Dutu 'awi capu."

⁴ Ge'enaka de ngoino 'isidemo 'ato naga ya 144.000 gee yakino-nakokau manga mengaka de ma Jo'oungu ma Dutu 'awi capu. 'O nyawa-nyawa go'ona 'o Israeloka 'o suku mogiooko de modidino.

⁵ 'O suku 'isinoimi yacaana mogiooko de modidi. Ma suku ge'ena ma ronga-ronga konee: 'o Yehuda, 'o Ruben, 'o Gad,

⁶ 'o Asyer, 'o Naftali, de 'o Manasye,

⁷ 'o Simeon, 'o Lewi, 'o Isakhar,

⁸ 'o Zebulon, 'o Yusuf de 'o Benyamin.

⁹ Ge'ena 'ipasa de takimakeli 'o nyawa posironga manga gudaioka, komoiwa ya'akunu yakidoimi. 'Ona ge'ena naga 'o sagala bangsano, 'o sagala sukuno, 'o sagala demo moi-moino 'o duniaka ne'ena. 'O nyawa yoku-kudai go'ona yoma'okode 'o koana ma go-gogere ma daarioka de 'o Domba ma Ngowaka 'awi daarioka, 'ona yomasinoaku 'o baju 'ikuru-kurutuku ya'are-'arese de ya'aono 'o bilere.

¹⁰ Ge'enaka de yakua-kuatie yosigasoko yongose 'ato, "Ngone pamake 'o laha nanga Jo'oungu ma Dutuno gee wogogerie 'o koana ma go-gogeroka, de 'o Domba ma Ngowakino gu'una!"

¹¹ 'O mala'ekati 'iodumu 'ima'okode 'isigilolitino 'o koana ma go-gogere de yopa-pareta de mita 'o barangi 'i'ahu-'ahu 'o ngai soata ge'ena. 'O mala'ekati ge'ena 'ikokibukuku 'o koana ma go-gogere ma bionoka de ma Jo'oungu ma Dutuka wisuba sigado ma biono dau 'o tonaoka 'itigiku.

¹² 'Ena 'imakokipoaka 'ingose 'ato, "Ma goungu! To ngone nanga Jo'oungu ma Dutu posironga wokumatioka, woku-kuasa, wokua-kuata de 'okia sonaa 'iodumu wanako. Nou, powisiarene de po'amalaha de powihoromati kaisi'ado-'adonika. 'Amin. Koge'enau."

¹³ Yopa-pareta gee wimoi wosano ngoino wongose 'ato, "'O nyawa gee manga baju 'ikuru-kurutuku ya'are-'arese no'ona nago'ona, de kiano yoboano?"

¹⁴ Ngoi tosango, "Ngoi kotanakowa 'Aba, ngona ma sirete nanako." So 'una wongose ngoino, "'O nyawa no'onau gee yoto-tongosono ma 'orasi yakidutuku 'o sikisaa ma dubuso. 'Ona manga juba ya'ujuokau de 'o Domba ma Ngowaka 'awi 'aunu so 'i'aresokau.

¹⁵ Ge'enau so 'ona yoma'okode ma Jo'oungu ma Dutu 'awi go-gogere ma daarioka, de wileleani ma Jo'oungu ma Dutu 'o wange de 'o obiri 'awi Woaka. De 'una 'asa naga de de 'ona, de wakijagano.

¹⁶ 'Ona 'asa koyamaowau 'o sawini de manga kibiti koidudunguawau; 'o wange ma sauku 'ikua-kuata 'asa koyakidaenuawau.

¹⁷ Sababu 'o Domba ma Ngowaka gee wogogerie 'o koana ma go-gogere ma dateoka 'asa wakisowohi 'ona. 'Una 'asa wakisi'asa 'o 'akere ma gububulika gee yakisiwango-wango. De ma Jo'oungu ma Dutu 'asa wakoki'ikiri to 'ona manga kongoro."

Wahyu

Video Wahyu 7

Ikuti Kami:

KONTAK | PARTISIPASI | DONASI