Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saamponna ganeka kaula nengale malaekat kaempa ngadek e padduna bume se pa’-empa’. Kat-malaekat ganeka nahan angen se pa’-empa’ e bume sopaja tadha’ angen e tenggangan otaba e tase’, otabana e ka’-bungka’an.

² Kaula pas nengale malaekat laen kalowar dhari temor, abakta segel dhari Allah se odhi’. Malaekat ganeka adikane malaekat se kaempa gella’ se ampon olle kobasa dhari Allah kaangguy marosak tenggangan sareng tase’; sowarana kaja.

³ Dhabuna malaekat ganeka, "Tenggangan ban tase’ reya ja’ duli rosak gallu, bariya keya ka’-bungka’an, sabellunna sengko’ ban malaekat laenna masange tandha segel e dhaina para abdina Allah."

⁴ Kaula pas ngatore oneng ja’ badha saratos pa’ polo empa’ ebu oreng se dhaina epasange tandha segel dhari Allah. Reng-oreng ganeka dhari dhubellas suku bangsa Isra’il;

⁵ dhari saneyap suku dhubellas ebu oreng, enggi paneka: suku Yehuda, Ruben, Gad,

⁶ Asyer, Naftali, Manasye,

⁷ Simeyon, Lewi, Isakhar,

⁸ Zebulon, Yusup ban Benyamin.

⁹ Saamponna ganeka kaula ngabas pole, laju nengale manossa talebat bannya’na, akadi omba’ — tadha’ oreng settonga se bisa ngetong bannya’na. Manossa ganeka asalla dhari saneyap bangsa, suku, nagara ban basa. Sadaja ngagem juba te-pote, sambi neggu’ dhaunna palma, addhep ka tahta ban ka Cacempe gella’.

¹⁰ Reng-oreng ganeka pas aera’ epakaja, "Kasalameddan asalla dhari Allah, se alenggi e tahta, ban dhari Cacempe rowa!"

¹¹ Sadajana malaekat ngadek e sakalenglengnga tahta ban para pamimpin sarta mahlok se pa’-empa’ ka’issa’. Kat-malaekat ganeka asojut e adha’na tahta, pas nyemba ka Allah.

¹² Sadaja padha adhabu, "Amin! Molja’agi Allah se agung ban bicaksana. Salerana patot narema ocaban sokkor ban panghormadan sabannya’na. Salerana kobasa ban kowat salanjangnga! Amin!"

¹³ Sala settong e antarana para pamimpin gella’ atanya ka kaula, "Reng-oreng se ajuba pote jareya sapa, ban dhari dhimma?"

¹⁴ "Kaula ta’ oneng, guste; sampeyan dibi’ se oneng," saodda kaula. Pamimpin ganeka pas adhabu ka kaula, "Jareya reng-oreng se la salamet ngalebadi bakto panganeyaja’an se talebat berra’. Reng-oreng jareya la nyassa jubana ban dharana Cacempe sampe’ pote.

¹⁵ Jareya sababba sateya manjeng e adha’na tahtana Allah, ban abakte ka Salerana seyang malem e Padalemman Socce. Ban Salerana se alenggi e tahta rowa bakal hadira e seddi’na reng-oreng jareya kaangguy ngaobi reng-oreng jareya.

¹⁶ Reng-oreng jareya ta’ kera tao lapar otaba pelka’ pole; ta’ kera ekello’ are otabana panas se ngeltak pole,

¹⁷ sabab Cacempe se alenggi e nga’-tengnga’anna tahta rowa se bakal ngowana reng-oreng jareya. Salerana bakal nontona reng-oreng jareya ka aeng se madhateng kaodhi’an. Ban Allah bakal ngessoda aeng mata dhari matana reng-oreng jareya."

Wahyu

Video Wahyu 7

Ikuti Kami:

KONTAK | PARTISIPASI | DONASI